Deborah Na Barak
4
Ehud kumu kɔkro kre, Israel leele pre na ndru mna sisaa pe o Tafun Nyiɛkpɔɔ wre yiɛ. 2 A kra tia o Tafun Nyiɛkpɔɔ wre na pe wru mu le Canaan ŋunu ŋmba wraa wa mu tni Hazor na, a praa u yeeri Jabin wre kɛɛ. Wre ŋunu wre ŋunɔwifɛɛnlɛ lopom mɛɛ na yi Sisera, a wraa wa mu tni chia ŋga praa yeeri Harosheth-Haggoyim kre na. 3 Ŋunu wre naa wa na tɔɔnrɔ sookɛɛ lafɛɛ kɔɔnanyjirɛ ni, a wra ndrashelee tɛɛ mna Israel leele pre fiŋge yɛlɛ fulo, a kra tia pra nyɛni mna o Tafun Nyiɛkpɔɔ wre yeeri mbe u ya pe na.4 Kre nyjila kre na Lappidoth chɔ ŋmba praa yeeri Deborah wre, na Nyiɛkpɔɔ keenyanyofun wi, a wre na wi Israel leele pre yɛklo. 5 Shuɛ tiŋge ka naa wa Ramah, na Bethel lalaa, a kraa wa Ephraim nyambie lawee ka nu, bawa wraa shie na jiin na leele pre lalɛɛ kaalɛɛ lii. 6 Ki ble ka Deborah na ndro tun a wra sɛ Abinoam biblɔ Barak ŋmba wra yiri Kedesh ŋga kraa wa Naphtali jlom leele tra nu kre yeeri, a wra pan, a wra yo u pan mbo, “O Tafun Nyiɛkpɔɔ, Israel leele Nyiɛkpɔɔ wre yo mu pan na, ‘Sɛ wifɛɛnlɛ kagbenyi kɛ wɔ mu yili Naphtali na Zebulun jlom leele nu, mu yiɛklu pe pan mu sɛ na pe ni nyua Tabor na. 7 Mbe ŋunu Jabin ŋunɔwifɛɛnlɛ lopom Sisera wre fana, wre na u sookɛɛ, na yi tnifɛɛnlɛ kro ni, mbe pe sɛ wi na e ni Kishon lɔɔ kre nu, mbe ni pe wru mbe le e kɛɛ.’”
8 A Barak na kna mna yo Deborah pan mbo, “Na mu ka sɛ, kena mbe sɛ, la, na mi na ŋu ma oo sɛ, kena mba sɛ.”
9 A Deborah na kna mbo, “Peere ma, mi na ŋu we sɛ. La, oo sɛ wi mbe yili, a ŋu wa mɛɛ ta, ŋgi na hin? Chlɔ kɛɛ o Tafun Nyiɛkpɔɔ wre we Sisera le.” A Deborah na uyɛ kna a wre na Barak na sɛ Kadesh na. 10 Barak na kɛ wa mna Zebulun na Naphtali jlom leele kagbenyi kɛ yeeri, a wre na pre na Deborah na sɛ.
11 Kre nyjila kre na blɔ wa praa u yeeri Heber, Kenite leele pre wa na wi. Pre leele pre, Moses nafun blɔ ŋmba praa yeeri Hobab wre nanae na lɛ. Wre Heber wre na sɛ u yoŋgo nyuŋgo kan tiŋge kpɔɔ ka jaara Zaanannim na mu mbra Kedesh na.
12 Ŋga Sisera na loo na Barak yiɛklu na ŋunɔwifɛɛnlɛ ni mu sɛ nyua Tabor na kre, 13 a Sisera na u tɔɔnrɔ sookɛɛ lafɛɛ kɔɔnanyjirɛ yire wru, mna u ŋunɔwifɛɛnlɛ wru mna yiɛklu pe pan, a pra yili Harosheth-Haggoyim na mna sɛ Kishon lɔɔ kre mbɛɛ na. 14 A Deborah na yo Barak pan mbo, “Sɛ, o Tafun Nyiɛkpɔɔ we yiɛklu mu pan, aŋga ble ŋga we Sisera le mu kɛɛ.” A Barak na tii nyua Tabor kre na, a u ŋunɔwifɛɛnlɛ kagbeŋge kɛ pre na taa u kro. 15 Ŋga Barak na u leele pre naa wii na shie yiɛ kre, o Tafun Nyiɛkpɔɔ wre na tia tutom na wo Sisera na u leele pre na pe sookɛɛ yire kro na, a kra tia pra u wifɛɛnlɛ pre gbo. A Sisera na fɛ jetnam na mna u sookaa ti. 16 A Barak na Sisera wifɛɛnlɛ pre kɔŋgɔ ni mna sɛ le na pe ni Harosheth-Haggoyim na, mna pe gbo wa peii, ndro nunu chom nsra kro.
17 Sisera na fɛ jetnam na mna sɛ lɛ Kenite ndro Heber wre chɔ ŋmba praa yeeri Jael wre yoŋgo nyuŋgo nu. Ŋga kra tia rɛ, na nyu nunu kaa wa Hazor ŋunu Jabin, na Kenite ndro Heber jlom yire lalaa. 18 Bawa Jael na yili mna sɛ Sisera fni mna yo u pan mbo, “Ni tafun, pan mbe o sɛ nyuŋgo, maa fiɛ.” A Sisera na le Jael pan nyuŋgo, a wra yira tɛɛ mna u tɔ.
19 A Sisera na kna mbo, “Gbɔɔ ni ta, ni ŋga nyumu ka mbe ni gbɔ.” A wra yurɔ hlɛ gbolo ka nyu nyaa, mna nɔnɔ kna mna u ŋga, a wra gbɔ, a wra ndru mu u tɔ yira kre ni. 20 A Sisera na kna mna yo Jael pan mbo, “Yire jlonwee nyu na, na ndro waa pan mu wie na, ndro wa le mu pan mna ra? Mbe mu yo, ‘Ɔɔhɔn.’” 21 Sisera na fna, ki tia ki nsra mu a wraa ŋnu, a Heber chɔ Jael wre na sɛ kaan ŋga ni pe yoŋgo nyuŋgo kani na mbra tra kre ka wru, mna hama wru mu ya, mna sɛ ki kan Sisera ndra na, mna ki koori a kra le u nu mu sɛ kan tra, a wra ku. 22 Ŋga Barak na da wa na Sisera chaa kre, a Jael na yili mna sɛ u fni mbo, “Pan mu le, mbe mu nyina ndro ŋmba mu chaa kre.” A wre na Barak na le nyuŋgo, na Sisera ŋmba pe kan kaan ni u ndra na mu mbra tra, a u ku mu sni.