Joshua Hlɛ
O Tafun Nyiɛkpɔɔ Joshua Wɔ Yɛklo
1
O Tafun Nyiɛkpɔɔ sumifun Moses kumu kɔkro kre, kee ŋga o Tafun Nyiɛkpɔɔ na yo Nun biblɔ Joshua, Moses sumifun wre pan yi kre mbo, 2 “Ni sumifun Moses wre ku, kena yiri mu leele pre yiɛklu, mbe ŋu na pre Jordan lɔɔ kre kun mbe sɛ tra ŋga mbe pe ŋga kre na. 3 Lawee ŋga nu e jeelee we taan kpan, mbe e ŋga ki yi, imi na ndaa ki yo Moses pan kre. 4 E sam yi mu yire tablɔ tra ŋga kii wa tapan haa kre na, mbe sɛ su Lebanon nyuɛ yire na nyjeeri haa wa, mbe yire wa mbe sɛ su Euphrates lɔɔ ŋga kii wa na shie yilafinhaa kre na. Hittite leele tra kre kro chaa, mu sɛ su epo kpɔɔ ŋga kii wa na shie yilatohaa kre na, bawa yi e sam. 5 Joshua, ndro n wa mbe jaa yiri mbe yire mu yiɛ fio, hali mbe sɛ su mu kumu ble. Imi na ndaa taa Moses kro kre, pan mbe taa mu kro, mba mu wa fio.6 Kena gbun ta, mu yire gbiŋmbi, ŋgi na hin? Ŋu mu yiɛklu na ni leele pre ni, mbe pe sɛ tra ŋga kee na ndaa da mu pe tolɛɛlɛ ŋga, na mbe pe ŋga ki yi kre mbe pe ki wru mbe tni. 7 Gbun ta, mu yire gbiŋmbi. Le na mu li mbra nyjɛ ni sumifun Moses na mu nyina yire kro na. Maa shia yi wa kamɛŋɛ, ndee kalie, mbe ki ti mu kee ŋga mu pe kro nyu mbe mu ŋga. 8 Le na mu na mbra hlɛ kre tɔɔnri nyjila kro nu, mbra ki kee yire jawa lafo na blee, mbe ki ti mu jaa li ki kee kro na, mbe ki ti mu kee kro nyu mbe mu ŋga. 9 Sɔɔnri na ni yo mu pan na mu gbun ta, mbe yire gbiŋmbi. Maa fiɛ, a maa ti mbe gbun yɔ mu na, ŋgi na hin? Mna mu tro kpan, mi mu Tafun Nyiɛkpɔɔ wree wa mu kro.”
10 Bawa Joshua na yo Israel leele pre loplombo mblɛ praa wa pe nyu na pre pan mbo, 11 “E tro leele pre kro na, e yo pe pan na, pe sro cha mbe tɛɛ, mna ble taarɛ pie Jordan lɔɔ kre kun mbe sɛ tra ŋga pe Tafun Nyiɛkpɔɔ wre yo we pe ŋga kre wru mbe tni.”
12 A Joshua na kna mu yo Reuben sele leele, na Gad sele leele, na Manasseh leele yɔɔ kre pan mbo, 13 “E sɔɔnri na, o Tafun Nyiɛkpɔɔ sumifun Moses na yo e pan na, o Tafun Nyiɛkpɔɔ wre na yo na, we e ŋga Jordan lɔɔ kre lawee tra ŋga kii wa yilafinhaa kre mbe e tnii? Kre tra kre nu o nyi kre. 14 Kena ee chiɛlɛ, na e biile, na e yurɛ kro ti tra ŋga Moses na e ŋga Jordan lɔɔ ŋga yila finhaa ŋga nu mna, la, ŋunɔwifɛɛnlɛ mblɛ pee wa e nu pre we yiɛklu mbe lɔɔ kre kun, mbe sɛ wii ya e wolo pre na, 15 mbe sɛ su na o Tafun Nyiɛkpɔɔ wre we pe ŋga lawee mbe pe tni, imi na u pe mu e ŋga ŋga. Mbe e tra ŋga o Tafun Nyiɛkpɔɔ wre yo we pe ŋga kre, mbe pe ki ta tun. Mbe e chiin ndru mbe paan e tra ŋga o Tafun Nyiɛkpɔɔ sumifun Moses na e ŋga Jordan lɔɔ kro na shie yila finhaa kre, mbe e ki wru mbe tni.”
16 A pra kna mu yo Joshua pan mbo, “Kee ŋga mu yo o pan kpan, oo li ki na. A mna mu o tun kpan, oo sɛ. 17 Imi na o naa Moses kee ndru kre, pan oo ndie tɛɛ mu pan, la, ŋga o tali yi na, o Tafun Nyiɛkpɔɔ u taa mu kro, imi na wra taa Moses kro kre. 18 Lewo ŋmba we yiri mbe mu nyu kee taan, mbo wa li mu nyu kee ŋga mu yo o pan kro na kre, u fna mbe o u gbo, la, gbun ta, mu yire gbiŋmbi.”