Moses Kumu
34
Kee yire kɔkro Moses na yire Moab tra mbrɛrɛ kre nu mna sɛ nduu nyua ŋga pe yeeri Nebo kre na, mna sɛ nduu nyua Pisgah ŋga kra yiɛ ka Jericho na kre ndra na. Bawa o Tafun Nyiɛkpɔɔ wre na u nyina tra kre kro, mu yire Gilead tra na mu sɛ su chia ŋga pe yeeri Dan kre nyjeeri haa. 2 Wra u nyina Naphtali, na Ephraim, na Manasseh trɛ yire kro, kre na Judah tra kre, hali vim mu sɛ su Mediterranean epo kre yila to haa. 3 Wra u nyina Judah tra kre tapan haa, na tra mbrɛrɛ ŋga kraa wa mu sni mu yire Zoar na mu sɛ yili Jericho ŋga praa yeeri shuɛ tinyi kakpɔɔ kre na. 4 A o Tafun Nyiɛkpɔɔ wre na yo u pan mbo, “Tra ŋga kee na ndaa nyu yo mna da mna e tolɛɛlɛ Abraham, na Isaac, na Jacob ŋga, mna yo na, ‘Mbe pe nanae ŋga ki yi kre.’ Ni tia mu ki nya na nyini ni, la, mba ti mbe mu le ki nu.” 5 A Moses, o Tafun Nyiɛkpɔɔ sumifun wre na ku Moab tra nu wa, imi na o Tafun Nyiɛkpɔɔ wre na ki yo kre. 6 A pra u le Moab tra kre nu wa, landɛɛ ŋga kra yiɛ kan chia ŋga praa yeeri Beth Peor na kre nu, la, mu pan mu su aŋga na, ndro n chin mna u faŋga kre nyi. 7 Moses na ku, na u li yɛlɛ lafaa na fulo, ande na u nyaa, a faŋga wa u nu. 8 Israel leele pre na u nyɛni Moab tra mbrɛrɛ kre nu ble fulo na kɛ, pe paala kolo na.9 Nyjila ŋga ni Moses nsra ta mu ku kre, wra Joshua yeeri mna kɛ taa u na, a o Tafun Nyiɛkpɔɔ wre na Joshua ŋga kachindɛ. Ki tia Israel leele pre na ndie tɛɛ u pan, mna taa kee nyjɛ o Tafun Nyiɛkpɔɔ na yo Moses pan yire na. 10 Mu yire kre nyjila kre nu, Nyiɛkpɔɔ kee nyanyofun wa n da mu yiri Israel leele nu na Moses wi, a o Tafun Nyiɛkpɔɔ na wre yire mu paara. 11 A kre Nyiɛkpɔɔ kee nyanyofun wa n da mu kawako kee pe, a yi da na nyjɛ o Tafun Nyiɛkpɔɔ na Moses tun a wra sɛ pe Egypt ŋunu Pharaoh, na u loplombo, na u tra kre kro na kre ni. 12 Ŋgi na hin? Ndro n da mu jaŋga kpɔɔ kee ka pe, ndee mu fiɛrɛ kee nyjɛ Moses na pe Israel leele yiɛ na yire ka pe tun.