Moses Na Leele Pre Dwan
“O Tafun Nyiɛkpɔɔ wre
na yiri nyua Sinai na mu pan.
Pan wra yili na yila yi,
mna to Edom na,
a u leele na u nya nyua Paran na,
a wraa chiɛnri.
Wre na Nyjeeri bitumblɔ
kagbenyi kɛ na lɛ,
a kanhun naa nyini u kalie kɛ.
3 Kpra na, o Tafun Nyiɛkpɔɔ
ŋu mu mu leele kori,
a mblɛ pe pe u wolo pre
krɛrɛ wa mu kɛɛ.
Ŋu yiɛ pe kro we pan mbe kosie kan,
mbe mu paara mbe pe nyina,
4 mbra nyjɛ Moses na o ŋga yire,
o tolɛɛ Jacob nanae pre krɔyira
titi na yi yire mbra yire.
5 Israel leele pre chɔɔ praa yeeri aJeshurun,
kena nyjila ŋga ni Israel loplombo pre
na pe sele yire kro we fni kre,
o Tafun Nyiɛkpɔɔ wre na wi pe ŋunu.”
6 Moses na yo na,
“Nyiɛkpɔɔ u Reuben jlom
leele ndra tun tɔɔnrɔ,
mbe pe nɔɔ wa kɔ,
a pia nɛɛ.”
7 A wra Judah kee yo mbo,
“O Tafun Nyiɛkpɔɔ jande,
Judah nyɛnɛɛ loo
mu ndru mu pan na u ni u leele nu.
Wre titi jaŋga ni wra wi mu uyɛ shɔ,
kena jande ya u na mu wi
mu u shɔ u loŋgoolo kɛɛ.”
8 A wra Levi jlom kee yo mbo,
“O Tafun Nyiɛkpɔɔ,
yire mu Urim na Thummim yire na,
mu o nyina ŋga mu chaa,
lewo ŋmba na mna nyu wre wee yi.
Mna pe pe mu le Massah,
na Meribah nyumu lawee kre nu.
9 Pra taa mu nyu kee na kpra ni
mu wɛ pe lɛɛlɛ,
na pe loolo, na pe biile kee na,
mna li mu mbra yire na,
mna kpra li,
mu nyu nunu kee kre na.
10 Mu mbra yire,
pra Israel leele pre nyina yi yi,
mnaa tuwe ndiom tɛɛn sroi,
na mu kaan,
mnaa yurɛ popomblo sroi
mu sragbunu kre na na mu kaan.
11 O Tafun Nyiɛkpɔɔ,
nyjɛ Levi leele pini kro dwan,
mu ti mbe mu yiɛshɔ,
pe kɛnyu tnumu kro na.
Mblɛ pe yirii na u taanla kre,
sɛlɛ gbun mu kuari,
ti mbe mblɛ pe pe pra kre,
wa ja mbe yiri na.”
12 Mu wru Benjamin jlom haa, wra yo mbo,
“Mblɛ o Tafun Nyiɛkpɔɔ wre kori pre,
we tni pe nu,
mbe kɛ tɔ pe na nyjila kro nu.”
13 A wra yo Joseph nanae pan mbo,
“O Tafun Nyiɛkpɔɔ wre u e tra dwan,
mbe mɛŋɛ yiri nyjeeri mbe wo ki na,
mbe u ti nyumu vru tra kre nu
mbra fuu.
14 Nyiɛkpɔɔ u ti na yila na yeŋge yili,
mbe pe yirɛ chichiele ta
pe seele nu nyjila kro nu.
15 U ti mbe pe see yirɛ chichiele,
nyjɛ yii wa fafa nyambie nu yire ta,
mbe yirɛ nyjɛ pe luu nyuɛ na ja,
mbe sɛ chiriri.
16 U ti mbe pe yirɛ chichiele ta,
mbe yili tra,
mbe ŋmba wraa wa mu tni nyaa,
ŋga kraa shio wre nyu pe na.
Nyiɛkpɔɔ u ti mbe kee nyjɛ krɛrɛ pan
Joseph nanae na.
Ŋgi na hin?
Pre na lɛ u lɛbiile pre ndra.
17 Ephraim na Manasseh ŋunɔwifɛɛnlɛ
pre kee fiɛrɛ ni.
A faŋgaa wa pe nu,
na nyaalam nuu wi,
mbe jaa wi mbe waŋgrɛ ŋunɔ,
mbe chan.”
18 Wra yo Zebulun na Issachar jlom pan mbo,
“Zebulun wolo,
e ti mbe e yiɛshɔ e fimi yilee kre na,
mbe Issachar wolo yiɛshɔ,
pe katoo tnɛɛ na.
19 Pie leele yeeri mbe sɛ fni nyua na,
mbe sra ŋga ki fraka wɔ,
yirɛ nyjɛ pie na taa epo nu,
na yirɛ nyjɛ yii wa
mu ndra epo tanyiɛ nu,
yire na pie yire mbe peyɛ ta.”
20 Wra yo Gad jlom pan mbo,
“Nyiɛkpɔɔ ŋmba u tia Gad tra kpɔɔ
wre wo yi mɛɛ.
Gad jlom kre we pe na jira,
ŋmba u ja mu yurɔ yii na kaa wi.
21 Pre pra tra chichie le mu wɔ,
tra ŋga ki fna pe yɛklo ŋga kre,
wre pra ŋga ki yi.
A na o Tafun wre leele
yɛkulo pre kro fni kre,
Gad wraa ŋga ki fraka
o Tafun wre pan pini,
mna na Israel leele pre nyina
o Tafun Nyiɛkpɔɔ wre kprakuɔn.”
22 Wra yo Dan jlom pan mbo,
“Dan rɛ, jira pɔ wi,
a u ye mu yili Bashan tra nu.”
23 Wra yo Naphtali jlom pan mbo,
“O Tafun Nyiɛkpɔɔ wre nyu mu na titi,
a ki tia mu dwamu nɛɛ,
mu tra nyu we yire Galilee tapla kre na
mbe sɛ su ki tapan haa.”
24 Wra yo Asher jlom pan mbo,
“Asher, pe mu dwan
mu wɛ mu wolo hamblɛ pre na.
Nyiɛkpɔɔ u ti mbe mu yɛnyiŋge ta,
mu lɛ biile pre nu,
mbe simi li wo bɔ mu tra nu.
25 Nyiɛkpɔɔ u ti,
mbe mu jlonwee krɔɛ kan yirɛ,
pe tɔɔnrɔ na swanyiɛ fre.
Mbe mu faŋga ta mbe sɛ su,
ble nyjɛ mu li kro nu.
26 Yaka n wa mu da,
na Israel leele Nyiɛkpɔɔ wre ni,
wre u kila na tro nyjeeri
na paan na yaa mu na,
na u kpɔɔmu nyina tloe nu.
27 Nyiɛkpɔɔ ŋmba uu wa nyjila kro nu,
wre wi mu fɛnkaari,
a we mu yii kɛnyi na nyjila kro nu,
mbe mu loŋgo ni mu yiɛ,
mbe yo na, ‘U kla.’
28 A Israel leele we tni wejinyiŋge nu,
a pia pe loŋgoolo nya na,
mɛŋɛ we wo pe na,
mbe ki ti mbe shɔlɔ,
na simi fɔŋgɔ bɔ pe na.
29 Israel leele, e wo yi dwamu.
Ndro n wa mu da na e ni,
o Tafun Nyiɛkpɔɔ wre titi,
u e ŋga ŋmaa.
Wre u kɛ toni e na, na yaa e na,
mu tia e na wii na yilii.
E loŋgoolo we pan mbe e tali,
mbe e pe fooro le,
a ee pe taanla mbe tro.”