32
Tra na nyjeeri,e ndie tɛɛ ni kee ŋga na,
e kee ŋga mbe yo ŋga loo
chiriri.
2 Pan kee nyjɛ ni e nyina yire,
we pe na nyiɛ ki woni,
mbe ni nyu kee pe na,
mɛŋɛ ki woni.
Pan yie pe na mɛŋɛ wo,
nyaa fɔnyi na,
mbe pe na nyiɛ ki paan,
na woni nyaa nyjɛ yi funi
fɔnyi na.
3 Mbe o Tafun Nyiɛkpɔɔ mɛɛ kpali,
e ti mbe o o Nyiɛkpɔɔ ŋga mɛɛ,
u kpɔɔmu kre na.
4 O Tafun Nyiɛkpɔɔ wre,
pan u nyi na dnɛ kpɔɔ titi yi,
u tnumu kro nyu chasi,
a u kolo kro fraka.
Nyiɛkpɔɔ kprafun wi,
wraa sisaa pe,
a u fraka,
mu na kpra lii kee kro nu.
5 La, u leele pre sisaa pe u na,
nyifɛɛrɛ kee nyjɛ pe pe kre tia,
pe n fna mbe pe u biile na,
pe sisam tia pe n fraka.
6 Kena yire kee nyjɛ ni ee tɛɛ,
mbe e Tafun Nyiɛkpɔɔ wre
fɔlɔ tɔ ra?
Jijiele, na jawala lafɛɛnlɛ,
e Lɛ ma kree?
A wre ma wra e wa,
mna e pe waŋgra poŋgo kree?
7 E fafa ble yire sɔɔnri,
e fafa leele pre kee jawa.
E e lɛɛlɛ wie,
pie kaalɛɛ nyjɛ yira pe yire kee,
bɔ e pan.
E e loplombo wie,
pie e nyina kee nyjɛ
yira pe yire nɔɔ.
8 Ŋga Nyiɛkpɔɔ Jaŋgafun wre,
na tra yɔɔlɛ
mu waŋgra leele ŋga,
na pe ta krɔyira kre,
nyjila ŋga wraa Adam nanae
pre yɔɔlɛ
mbe pe ŋga tni hɛɛ kre,
wra sam gbun gbun pe pan.
Kre nyjila kre wra Israel leele jawa
na we pe ŋga tra mbe pe yɔɔlɛ
imi na pe nɛɛmu da.
9 La, Jacob nanae pre wra wɔ
na u wolo lɛ.
10 Tablɔ tra gbeŋglen
ŋga nu fuflɛ gbuun kpɔɔ,
bawa wra kɛ tɔ pe na,
mna pe le, na pe dɔɔtaa
na wre titi nyibie ni.
11 Pan u nyi na nyuu ŋmba,
u u biile nyina nyjeeri yiree wi,
na pe wa shie mbe sɛ to tra,
mbe u u kuɛn nyaa
mbe u tɔwi mbe wa to,
pan o Tafun Nyiɛkpɔɔ
na u leele pre pe mbe pia to.
12 O Tafun Nyiɛkpɔɔ wre chiin
wra yiɛklu u leele pre pan,
waŋgra ka sɛɛn ka nsra ya u na.
13 Wra tia pra nyambie lawee,
leele ni mna pe trɛ shɔ,
mna tia pra sro nyjɛ pra fali
trɛ yire nu wru mu li.
Wra tia pra srɛ ta
dnɛ weele nu mu li,
a pra olive tinyi luu,
dnɛ lawee yire nu,
a yira yiri.
14 Pe nui, na pe sikaala
naa nyinimi nyumu taa tataara.
Pe mbaala, na pe sikaala,
na pe nui na nyu mu kpɔɔ kpɔɔ,
a pan pe shɔlɔ,
na pe tre sɛnyi nyjɛ ni pe simi
pini yire naa nyɔɔ.
15 Israel leele pre chɔɔ
praa yeeri Jeshurun na.
Pra peyɛ ta, la,
praa ndikana pini.
Pra sro ta na lii,
mna kpɔɔ kpɔɔ.
Nyjɛ krɛrɛ kɔkro,
pra Nyiɛkpɔɔ ŋmba,
wra pe wa wre ti.
Dnɛ kpɔɔ ŋmba na wi
pe shɔfun wre,
pra u je.
16 Pe sɛɛnlɛ yire sumii na tia
Nyiɛkpɔɔ na yenyjam wi pe na,
a pra u krɔ kun,
na pe afunyi sɛɛnlɛ yire ni.
17 Praa sra woni,
na ŋumufuɛn kaan,
sɛɛnlɛ waara nyjɛ yia jaa yaka pe,
sɛɛnlɛ fɔnyi
nyjɛ e tolɛɛlɛ pre nsra chin,
ndee mna yi sumi kple.
18 Pra Dnɛ kpɔɔ
ŋmba wi pe lɛ wre wa,
mna Nyiɛkpɔɔ ŋmba wi pe lɛ,
wre kee fɛɛ.
19 O Tafun Nyiɛkpɔɔ
na kre kee ŋga nya,
mna yila ki na mna pe je.
Ŋgi na hin?
U biile pre na tia u krɔ na kun.
20 A wra yo mbo,
“Mbe yiɛ wɔ pe na,
mbe le imi na pie taa.”
Ŋgi na hin?
Pre nyjila ŋga leele mblɛ,
pe ndie kan,
a pe kee n kpra ni.
21 Pra tia ndaa yenyjam wi,
na pe kafinɛ sɛɛnlɛ yire ni,
mna tia krɔ na ni kun,
na pe sɛɛnlɛ waara
kpokpo yire ni.
Pan chɔɔ mbe leele,
mblɛ pe n le mu nya plɛ wɔ,
mbe pe yenyjam wi na pe ni.
Jijiele waŋgra ka mbe wɔ,
mbe ki ti pe krɔ yii na pe ni.
22 Ŋgi na hin? Ni krɔkun,
na nyini na kanhun yi.
Kie sro, mbe yirɛ kro shɔ tra yiɛ na.
Nyuɛ we shɔ kro
mbe su yi nɔɔ na.
Hali mbe sɛ su kuulo ndoo
tra tapan.
23 Mbe ti mbe kanyana tataara pe da,
a mbe pe waari na ni snimi ni.
24 Mbe ti mbe klo sisaa to pe na,
a mbe ti kabro pe gbun,
a mbe ti yira sisaa ŋga
kie jaa ndro gbo to pe na,
a mbe ti nyaalam yurɛ mblɛ
pe nyai pe tɔ,
mbe wɔɔlɔ sisɛɛ pe niɔ mbe gbo.
25 Ŋunɔ we ti mbe pe biile ku ku
pe lete na peii,
pe nyanyjɛbɛɛlɛ, na bichabɛɛlɛ,
na bifimble, na blɛlɛɛlɛ
mblɛ ndra ki fniŋge kro,
fiɛrɛ we pe yii pe kalonyi nu.
26 Ndaa yo na mbe pe kla,
mbe ki ti mbe pe kee na yili
ndro kro ndra.
27 La, ndaa lɛɛlɛ pe loŋgo,
ŋmba u pe nyu kaanri wre na,
na kre ma wa ŋga ni pini kre nɔɔloo,
mbra uyɛ kpɔɔri mbra yuu na,
“Wre titi o pe ja,
pe Tafun Nyiɛkpɔɔ wre ma,
wra ja mu yire kee nyjɛ pe.
28 Israel waŋgra leele n jawala ni,
a pe n hachila ni.
29 Na ki pe na pra kala chin,
mnaa hachila ni,
na kala nɔɔ ndru,
pie na pe taa haa chin.
30 Na ki pe na pe Nyiɛkpɔɔ
ŋmba wi Dnɛ kpɔɔ
wre ma u pe prɛ,
mu pe loŋgoolo ŋga,
a ki tia u yiɛ wɔ pe na kre,
kaa ndro nunu
we leele kagbeŋge ni,
mbe leele shiin kagbeŋge kɛ ni.
31 Ŋgi na hin?
Pe loŋgoolo pre titi chin,
na pe dnɛ ŋga na pe kaan kre,
ki n jaŋga ni na
wre Dnɛ kpɔɔ ŋmba
na o kaan wre wi.
Pe loŋgoolo pre titi kuraa,
nyu nyaari na ki yuu.
32 Pan pe nyi to na Sodom
na Gomorrah nɔɔ leele lɛ,
a pan pe nyi na tre sɛnyi
nyjɛ yi sro,
mu pe na tuwe sisaa yi.
33 Tre sɛnyi simi nyjɛ pe pini yire,
yi nyu sheli na wɔɔ sisaa tuwe,
ŋga kii wa u nu kre yi.
34 Yire kepele nyjɛ krɛrɛ,
ni yi yii mu tɛɛ,
mu yi ndra mna ni yirɛ teeri.
35 Mi mbe lewo kee ŋga u pe
fɔlɔ tɔ u na.
Kia mu kuraa,
mbe pe mbulɔ.
A ble nyjɛ nu pie kala nya yire,
yi mbra mna,
kia mu mbe ni pe kla.”
36 O Tafun Nyiɛkpɔɔ wre,
we u leele pre kpra kun,
na u waa nya,
na pe faŋga kro kɔ.
A ki sɛ kro mblɛ pe le nyuŋgo,
na mblɛ pe n lefɛɛnlɛ ni kre,
we mblɛ pe u sumi
pre fooro chin.
37 Bawa o Tafun Nyiɛkpɔɔ wre,
we u leele pre wie na,
“Sena e sɛɛnlɛ
nyjɛ na e naa kaan yire sɛ hin?
38 Yire sɛɛnlɛ yire e naa e sra
nyina wee woni na kaan,
na e simi gbɔ wee kna
na woni yi na kre,
sena yi nyi hin?
E ti mbe yi yiri mbe pan
mbe ya e na, mbe e shɔ.
39 E le, e chin na mi nunu wi Nyiɛkpɔɔ.
Nyiɛkpɔɔ wa nyini n wa na,
mu ya ni na.
Mi ni lewo kuu,
a mi ni lewo kaan ŋmaa.
Mi ni tia lewo na yaa,
a mi ni lewo trai,
a ndro n wa,
mbe ja mbe lewo shɔ ni kɛɛ.
40 Ni kɛ yire nyjeeri na yuu na,
ŋga nii wa nyjila kro nu ŋga,
41 na ndaa ni brɔfiɛn ŋunɔ liɔ mu tɛɛ,
maa kɛ tini mu ki wru,
mbe kpra kun kre,
mblɛ pe ni pra,
na ni nyu kaanri kre,
mbe pe fɔlɔ tɔ.
42 Pe nyimi we na nuni ni snimi nyu na,
a ni brɔfiɛn ŋunɔ we pe kaara knumu.
Mblɛ pe gbo kre nyimi we na fuu,
a mblɛ pie yii ŋunɔ kre nyimi
we yili pe na.
A loŋgo wre yɛkulo pre kro,
pe ndrɛ we klɔ mbe to.”
43 Waŋgrɛ leele,
na Nyiɛkpɔɔ leele pre kro,
e yɛshɔɔrɔ li. Ŋgi na hin?
Mblɛ pe u sumifɛɛnlɛ gbo kre,
we pe gbo ka mbe fɔlɔ tɔ.
We u loŋgoolo pre fɔlɔ tɔ.
A we u tra kre,
na u leele pre ndra lɔ.
44 Moses, na Nun pɔ Joshua wre na mɛɛ kre kɔ mna leele pre nyina a pe kro na ki loo.
Moses Paara Haŋa
45 Ŋga Moses na yire kee yire nyina Israel leele pre kro pan mu kɔ kre, 46 a wra yo pe pan mbo, “E yire kee nyjɛ ni yo e pan aŋga ŋga kro yii kɛ shiin, mbe e yi yo e biile pan, mbe pe dɔɔta mbe li mbra nyjɛ kro na. 47 Kee nyjɛ ni e nyina kre, kewɛɛ ma, e ŋmaa kee yi. Na e taa yi na, e ŋmaa we tnu tra ŋga e Jordan lɔɔ kre kuun mbe sɛ wru kre nu.”
48 Ki ble kre lam, O Tafun Nyiɛkpɔɔ na yo Moses pan mbo, 49 “Sɛ Abarim nyuɛ yire nduu mu sɛ nyua Nebo ŋga kii wa Moab tra nu, mu yiɛ kan Jericho na kre na, sɛ yire wa mu Canaan tra kre le, kre tra kre mbe Israel leele pre ŋga mbe ki pe pe wo kre. 50 Kre nyua ŋga na mu nduu mbe yire kre, bawa mu ku, mbe mu leele kɔŋgɔ ni, imi na mu nyjɔ Aaron na ku nyua Hor na mna u leele kɔŋgɔ ni kre. 51 Ŋga ki tia yi na, e kro shiin na e shɔnlie ŋga e na ta ni nu kre wa Israel leele yiɛ na, ŋga e na da Meribah nyumu lawee yire nu Kadesh na Zin fimi tra kre nu kre. Ŋgi na hin? E nsra tia Israel leele pre na ni nya e nu na ni pe cheche. 52 Kre kee ŋga ndra na, mu yire haalee mbe tra kre nya, ma le tra ŋga mbe Israel leele pre ŋga kre nu.”