7 A Moses na Joshua yeeri mna yo u pan Israel leele pre kro yiɛ na mbo, “Faŋga le, mu gbun ta. Ŋgi na hin? Ŋu mu yiɛklu na leele pre ni, mbe le tra ŋga o Tafun Nyiɛkpɔɔ na da mna yo pe tolɛɛlɛ pan, na we pe ŋga ki yi, mbe mu ki yɔɔlɛ mbe pe ŋga mbe pe ta na krɔyira yi. 8 O Tafun Nyiɛkpɔɔ wre titi we yiɛklu mu pan, mbe ya mu na, wa mu ti, a wa laa mu kro fio. Maashia fiɛ, a maashia ti mbe mu sɔɔnrɔ ku.”

9 Moses na mbra yire nyunɔ mna yi wru mu Levi bibilɛ mblɛ na lɛ srawɔfɛɛnlɛ pre, na Israel loplombo pre kro kɛɛ, Levi bibilɛ pre chɔɔ praa nyu nunu danka kre tru. 10 A Moses na yo pe pan mbo, “Yɛlɛ kɔɔnashin nyukɔɔrɔ na kpan, yɛlɛ ŋga na pe fɔɔlɔɛ tii na kee kre, ble nyjɛ nu e sugbɛɛ ble lii kre, 11 na Israel leele pre kro pan mu fni o Tafun Nyiɛkpɔɔ yiɛ, lawee ŋga we wɔ nu kre, ki fna e yire mbra nyjɛ tɔɔnri pe yiɛ na mbe pe kro yi loo. 12 E leele pre kro yeeri mbe pe fni, bilɛ, na chiɛlɛ, na biile, na fumblɔ mblɛ pee wa mu tni e chiɛ na kre, mbe ki ti pe kro mbra yire loo, mbe tuan mbe e Tafun Nyiɛkpɔɔ wre fiɛ, mbe dɔɔta na pie li u mbra yire na. 13 Kre kolo ŋga na, e nanae mblɛ pe n mbra nyjɛ kee chin kre we yi loo, mbe tuan mbe e Tafun Nyiɛkpɔɔ wre fiɛ, nyjila ŋga ee li tra ŋga e Jordan lɔɔ kre kuun mbe sɛ wru kre nu.”

14 A Nyiɛkpɔɔ na yo Moses pan mbo, “Fuŋga rɛ, ble ŋga na mu ku kre mbra mna. Kena Joshua yeeri mbe e ni fni Yoŋgo Nyuŋgo ŋga nu o fnii kre jlonwee nyu na, mbe ni u nyina kee ŋga we pe.” Ki tia Moses na Joshua na sɛ o Tafun Nyiɛkpɔɔ fni Yoŋgo Nyuŋgo ŋga nu praa fnii kre nu. 15 A o Tafun Nyiɛkpɔɔ na uyɛ wɔ mna pe nyina tlo nu, a tlo kre na yire mu gede Yoŋgo Nyuŋgo kre jlonwee nyu na. 16 A Nyiɛkpɔɔ na yo Moses pan mbo, “Mu mu lɛɛlɛ kɔŋgɔ ni mbe sɛ wuu, a kia mu leele mblɛ we yiri mbe sɛ taa kafinɛ nyiɛkpɔɔ yire na tra ŋga nu pe lee ŋga nu. Pie ni je, mbe ni nyu nunu ŋga ni pe na pe ni kre kla. 17 Ŋga ble pie pe ma kre, ni krɔ we kun na pe ni kpɔɔ, mbe ni pe je, mbe yiɛ wɔ pe na, mbe ki ti mbe pe kla. A kanyana kpɔɛ tataara we pe da, a ŋga ble pie na pe yɛ wie na, ‘Ŋga Nyiɛkpɔɔ kɛ laa o na kre, kre ma ki tia o na kanyana nyjɛ nyini nyaa imi ŋgaa?’ 18 Ki ble kre, mbe yiɛ wɔ pe na titi yɛŋgɛ, sisam nyjɛ pe pe mu laa ni na mu sɛ taa sɛɛnlɛ na kre ndra na. 19 Kena mɛɛ ŋga nyunɔ mu tɛɛ, mu Israel leele pre nyina ki yi, mu ti mbe pe ki kɔ, mbe ki ni dansiɛrɛ li mbe pe taan. 20 Na ndaa pan na pe ni tra ŋga ki nyu mu tna kre nu, tra ŋga kee na ndaa nyu yo mna da mu pe tolɛɛlɛ ŋga kre, pie li mbe yɔɔ, mbe kpɔɔ kpɔɔ, mbe kna mbe sɛ taa sɛɛnlɛ kro mbra yi sumi, mbe ni je, mbe ni nyu nunu ŋga ndaa pe na pe ni kre kla. 21 A na kanyana kpɔɛ tataara waa pe da kre, kre mɛɛ ŋga we pe dansiɛrɛ kee mbe pe taan. Ŋgi na hin? Pe nanae kuraa wa mɛɛ kre fɛɛ. Ni pe jawala kee chin mu chin mu pan na pe ni tra ŋga kee na ndaa nyu yo mna da mna pe ŋga ŋga na.” 22 Ki tia Moses na mɛɛ kre nyunɔ, mna Israel leele pre nyina ki yi ki ble kre lam.

23 O Tafun Nyiɛkpɔɔ na paara Nun pɔ Joshua wre ni mbo, “Faŋga le, mu gbun ta. Ŋgi na hin? Ŋu mu le na Israel leele pre ni tra ŋga kee na ndaa nyu yo, mna da mu pe ŋga kre nu, a mi titi wa mu kro.”

24 Moses na mbra yire nyunɔ mu yire yi nyu na, mu hɛ su yi nyu kɔɔnrɔ na mu le hlɛ nu, ŋga wra kɔ kre, 25 a wra yire kee nyjɛ yo Levi mblɛ praa o Tafun Nyiɛkpɔɔ nyu nunu danka kre tru kre pan mbo, 26 “E Mbra hlɛ ŋga shɔ, e sɛ ki tɛɛ e Tafun Nyiɛkpɔɔ nyu nunu danka kre jaara. Bawa kie tni mbe pe dansiɛrɛ yira mbe e taan. 27 Ŋgi na hin? Ni chin imi na e ndikana nyi, na imi na e yirii na e Tafun Nyiɛkpɔɔ wre taanla. Ŋga e yiri mu e Tafun Nyiɛkpɔɔ wre taan nyjila ŋga ni nii ŋmaa ni ŋga, gbee mni yaa yiri mbe u taan ni kumu kɔkro hin? 28 E ti mbe e sele yire kro loplombo, na e lefɛɛnlɛ pre pan mbe fni ni yiɛ, mbe ni yire kee nyjɛ yo mbe pe loo, mbe ni nyjeeri na tra yeeri mbe ki dansiɛrɛ li mbe pe taan. 29 Ŋgi na hin? Ni chin na ni kumu kɔkro ee sisam pe mbe laa kooloe nyjɛ ni e nyina yire na. A ble yɛɛ wa na paan, kee sisaa we e da. Ŋgi na hin? Ee sisaa pe e Tafun Nyiɛkpɔɔ wre yiɛ na, mbe u pe mbe ki ti mbe u krɔkun, yirɛ nyjɛ e e kɛnyi tɛɛ mu gbeele ndra na.”

30 A Moses na Israel leele pre nyina mɛɛ kre kro.