O Tafun Nyiɛkpɔɔ We Ndru//Mbe Pan Na E Ni
30
Na yire suŋgɔ na dwamu kee nyjɛ ni e nyina nyjɛ kro waa pan e na, a e waa yi yii kɛ shiin waŋgrɛ nyjɛ leele nu o Tafun Nyiɛkpɔɔ we e ni mbe e sɛ tni kre nu, 2 a yire na e biile waa ndru mu pan e Tafun Nyiɛkpɔɔ wre pan, maa li u kee na, na e loloŋgo kro ni, na e nyiɛ kro ni, imi na kee nyjɛ ni yuu e pan aŋga ŋga nyi ŋga kre, 3 kena e Tafun Nyiɛkpɔɔ wre we nyu e na, mbe e fooro le, mbe ndru mbe e yoori mbe yili waŋgrɛ nyjɛ nu wra e gbun mu nyina yire nu, mbe e nyu ble titɛɛ. 4 Hali na e nyina mu sɛ su tra nyu kɔɔnrɔ na, bawa e Tafun Nyiɛkpɔɔ wre we e yii mbe ndru mbe pan na e ni. 5 We ndru mbe pan na e ni e tolɛɛlɛ tra kre nu, mbe e pan mbe ki wru. We ti mbe e kɛ nyu kpɔɔ, mbe e nɛɛ mbe wɛ e tolɛɛlɛ pre na. 6 E Tafun Nyiɛkpɔɔ wre we yire na e nanae lolonyi chinɛ, mbe ki ti mbe e u kori na e lolonyi kro ni, na e nyiɛ kro ni, mbe ŋmaa ta. 7 E Tafun Nyiɛkpɔɔ we ti mbe yire suŋgɔ nyjɛ krɛrɛ sɛ e loŋgoolo mblɛ pe e pra, mu na e fiŋge kre yii. 8 A ee ndru mbe ndie tɛɛ o Tafun Nyiɛkpɔɔ wre pan, mbe taa u mbra nyjɛ ni e kaan aŋga ŋga na kro. 9 A e Tafun Nyiɛkpɔɔ wre we ti e kɛ nyu tnumu nyjɛ ee na tuni kro nyu. We ti mbe e lɛɛ biile nɛɛ, pre na e yurɛ biile, na e seele yirɛ nyjɛ ee luu kro. O Tafun Nyiɛkpɔɔ wre yiɛ we shɔ e na na, mbe u ti mbe e nyu, imi na u yiɛ na shɔ e lɛɛlɛ na kre, 10 na ee ndie tɛɛ e Tafun Nyiɛkpɔɔ wre pan, mbe li u mbra nyjɛ pe nyunɔ Mbra Hlɛ ŋga nu ŋga na, mbe kna mbe pan e Tafun Nyiɛkpɔɔ pan, na e lolonyi kro, na e nyiɛ kro ni.11 Mbra nyjɛ ni e kaan aŋga ŋga wa sheli e pan mbe tro, a yi haa wa le mbe tro mbe yaa jaa da yi na. 12 Nyjeeri ma yi nyi, mbe ki ti e na wie na, “Ŋmbi we nduu mbe sɛ yi wru mbe pan, mbe yi kee yo o pan, mbe o li yi na hin?” 13 Ndee epo kro yi nyi ree? Mbe ki ti e na wie na, “Ŋmbi we epo kun mbe sɛ yi wru mbe pan, mbe yi kee yo o pan, mbe o li yi na hin? 14 Pan ma ki nyi, kee kree wa mu mbra e na, kii wa e nyuu, na e lolonyi nu, kena e li ki na.
15 E le, aŋga ble ŋga kee shiin ni teeri e yiɛ, ŋmaa na kolo ŋga na ee tro mbe nyu, na kumu na dɔɔya, e ŋga e chaa wɔ. 16 Kena ni yuu e pan aŋga na e e Tafun Nyiɛkpɔɔ wre kori, e na tro kolo ŋga u chaa na, mbra lii u mbra na, mbe ki ti e ŋmaa ta, mbe nɛɛ, mbe e Tafun Nyiɛkpɔɔ wre e dwan tra ŋga nu e lee mbe sɛ ki wru kre nu. 17 La, na e lolonyi waa laa u kro, a e nsra ndie tɛɛ, maa tia yaka e tini mu laa a e sɛ na kosie kani sɛɛnlɛ yire yiɛ na yi sumi kre, 18 kena ni yuu e pan aŋga mbe e loo na, we e kla yɛŋgɛ. Yaa tni tra ŋga e Jordan lɔɔ kre kuun mbe sɛ wru kre nu mbe mu. 19 Aŋga, ni nyjeeri na tra yeeri mbe yi ni dansiɛrɛ li mbe taan, na ni ŋmaa na kumu, na dwamu na suŋgɔ tɛɛ e yiɛ. Kena e ŋmaa wɔ, mbe ki ti yire na e biile ŋmaa li, 20 mbe e e Tafun Nyiɛkpɔɔ wre kori, mbe ndie tɛɛ u pan, mbe mbra u na. Ŋgi na hin? E Tafun Nyiɛkpɔɔ wre wi e ŋmaa, a we ti e yɛlɛ tataara li tra ŋga na wra da mna e tolɛɛlɛ Abraham, na Isaac, na Jacob ŋga na we e ŋga ki yi kre nu.”