2 Moses na Israel leele pre kro yeeri a pra pan mu ble titɛɛ, a wra yo pe pan mbo, “Yire titi na kee ŋga o Tafun Nyiɛkpɔɔ wre na pe Egypt ŋunu Pharaoh, na u sumifɛɛnlɛ, na u tra nu kre nya. 3 E na penlee kee badɛnyi, na kawako kee, na kekpɔɛ nyjɛ wra pe wa yire kro nya. 4 La, mu pan mu su aŋga ble ŋga nu, o Tafun Nyiɛkpɔɔ wre n e ŋga jawala mbe e tɛɛ mbe kala nɔɔloo tuun? A u n e ŋga nyiɛlɛ nyjɛ ni ee tɛɛ mbra nyaa? Ndee mu e ŋga ndiile nyjɛ ni ee tɛɛ mbra ndruu? 5 Yɛlɛ fuloe shiin nyjɛ nu ndaa yiɛklu e pan tablɔ tra kre nu kre, e yonyi nsra wla e na, a e kpawrɛ nsra knumu e jeelee na. 6 E nsra paanu ta mu ka, a e nsra simi ŋga ki n sheli, na ŋga ki sheli ta mu gbɔ. Ndaa e pe yire kee nyjɛ mbe ki ti e chin na ni mɛɛ yi Mi Wi.”

7 A nyjila ŋga nu o na da kre lawee ŋga nu o nyi ŋga nu kre, Heshbon ŋunu Sihon, na Bashan ŋunu Og, na pan mna wi na o ni, la, o na pe ja. 8 Mna pe tra kre shɔ, mna Reuben sele wolo, na Gad sele wolo, na Manasseh sele kre yɔɔ ŋga yi yi na pe krɔyira yi. 9 E dɔɔta na ee taa kee nyjɛ yii wa nyu nunu pee kre nu yire na, mbe ki ti e kee kee ŋga ee na pini kro nu.

10 Aŋga ble ŋga nu e kroo wa mu yire e Tafun Nyiɛkpɔɔ wre yiɛ, e yɛkulo, na e loplombo, na e lefɛɛnlɛ, na Israel leele bilɛ hamblɛ pre kro ni, 11 yire na e chiɛlɛ, na e biile, na fumblɔ mblɛ pee wa mu tni e nu, na tinyi kuun, na nyumu koori e pan kro. 12 E pan mu yire mna aŋga ble ŋga nu mbe yire na e Tafun Nyiɛkpɔɔ wre nyu nunu pe, kre nyu nunu ŋga we pe na e ni, mbe da mbe e ŋga, 13 mbe ki dansiɛrɛ li aŋga na u leele lɛ yire, mbe wre pe e Nyiɛkpɔɔ imi na wra nyu yo e pan, na imi na wra da mna e lɛɛlɛ Abraham, na Isaac, na Jacob ŋga kre. 14 Kre nyu nunu ŋga ni pini na daŋga ni ŋga, 15 yire mblɛ ee wa mu yire mna aŋga o Tafun Nyiɛkpɔɔ yiɛ ŋga chiin ni ma ni ki pini, la, mblɛ pe n wa mna aŋga kre kro chaa.

16 Yire titi chin imi o tnimu na nyi Egypt na, na imi na o na nyaari mu tro plɛ tra nu krɛrɛ mu pan mna. 17 E na leele mblɛ nu o na tro kre afunyi sɛɛnlɛ nyjɛ pra tinyi na dnɛ tɛɛ mu pe yire, na nyjɛ pra swafiŋge, na swanyiɛ tɛɛ mu pe yire nya. 18 E dɔɔ ta mbe blɔ, ndee chlɔ, ndee sele, ndee jlomu nyjɛ yii wa e nu aŋga ŋga, mbe pe leele wa kɔɔ krɔ kna mbe wa e Tafun Nyiɛkpɔɔ na, mbe sɛ waŋgrɛ yire kafinɛ nyiɛkpɔɛ yire sumi. E dɔɔta mbe e wa wa kɔɔ pe na didiŋge ŋga ki sro yi, mbe tni e nu mbe pe na tuwe sisaa yi. 19 Na wre ndro wre kee nyjɛ yii wa daŋga kre nu loo, mbe wra dwamu suni mbra uyɛ kaan, mbra jawa mbra yuu na, “Ŋga ni kolo ŋga mi titi chaa wru ŋga o, kee kro we nyu mbe ni ŋga.” Kre kee ŋga we pan na kanyana ni mblɛ pe kre sisam kre nyini pini, na mblɛ la kii wa ki pee na pre na. 20 O Tafun Nyiɛkpɔɔ wre wa wrefun wre sisam ti mbe u kɛ fio, u krɔ we kun na u ni kpɔɔ, a wa ti u krɔ nyjii. A yire suŋgɔ nyjɛ pe nyunɔ hlɛ ŋga nu ŋga kro we u yii, a o Tafun Nyiɛkpɔɔ wre we ufun wre nɔɔ pɔ mbe flo tra yiɛ na. 21 O Tafun Nyiɛkpɔɔ wre we ufun wre nunu chooli mbe wɔ Israel sele yire kro nu, mbe ti kanyana u da, suŋgɔ kee nyjɛ yii wa nyu nunu kee nyjɛ pe nyunɔ Mbra hlɛ kre nu kre kro we u da.

22 E biile mblɛ pie kɔɔ yiri mbakɔ kre, na fumblɔ mblɛ pie yiri haalee trɛ yɛ nu mbe pan e tra nu kre, we yire kanyana, na yira nyjɛ o Tafun Nyiɛkpɔɔ wre wa e na yire nya. 23 Tra kre kro we pe weŋge, na pua tuwe bri, kia jaa yaka luu, a yaka wa jaa ŋɔɔ mbe yili ki na, a tinyi wa jaa yiri ki na. Pan kie pe imi na Sodom na Gomorrah na kla kre, na imi na Admah, na Zeboiim chiɛ nyjɛ o Tafun Nyiɛkpɔɔ na u krɔkuɔn kpɔɔ ŋga kii fiɛrɛ ni kre tɛɛ mna yi kla kre yi. 24 Bawa waŋgrɛ yire kro leele we na wie mbo, “Yira ŋgi ki tia o Tafun Nyiɛkpɔɔ kre kee ŋga pe tra ŋga na ma hin? A ŋgi ki pan u krɔkuɔn kpɔɔ ŋga kii fiɛrɛ ni ŋga ni ma ŋga hin?” 25 A leele pre plɛ we yo na, “Ŋga leele mblɛ na o Tafun Nyiɛkpɔɔ wre, pe lɛɛlɛ Nyiɛkpɔɔ wre nyu nunu kre je, nyu nunu ŋga wra pe na pe ni ŋga wra pe wɔ mna yili Egypt na kre, kre ki pan na ki ni. 26 Pra laa u na mna sɛ na sɛɛnlɛ sumi, na kosie kani yi yiɛ, sɛɛnlɛ nyjɛ kee pe nsra chin fa, a wre Nyiɛkpɔɔ ma wra pe ŋga yi yi. 27 Kena kre ki tia o Tafun wre krɔkun na tra ŋga ni kpɔɔ kre, ‘a u tia suŋgɔ kee nyjɛ pe nyunɔ hlɛ ŋga nu yire kro tra kre yii.’ 28 Kre ki tia o Tafun Nyiɛkpɔɔ wre krɔ na kun na leele pre ni kpɔɔ, a wra pe kɔ mu yili pe tra kre nu, mna pe ni a pra sɛ tra fɔŋgɔ nu, imi na ki nyi aŋga ŋga.

29 Yirɛ nyjɛ yi ndra kre o Tafun Nyiɛkpɔɔ wre wee yi, la, nyjɛ u ndra yire rɛ, wre na o biile wee yi nyjila kro nu, mbe o yi le mbe li kee nyjɛ yii wa mbra nyjɛ nu na.”