3 We e dwan e chiɛ na, mbe e dwan e seele nu.

4 We e biile dwan, mbe yirɛ nyjɛ ee luu tra dwan, mbe e pɔɔri yurɛ kro biile dwan.

5 We sro nyjɛ ee le kakɛɛ nu, na lawee nyjɛ nu e sro pini kro dwan.

6 Na e yili fimi na we e dwan, a na e ndru mu pan katoo we e dwan.

7 Na e loŋgoolo yiri mu e taan, o Tafun Nyiɛkpɔɔ we ti e pe ja. Kolo nunu pie yii mbe pan, la, kooloe kɔɔnashin pie kɔɔ vru mbe yili fɛ mbe sɛ.

8 E Tafun Nyiɛkpɔɔ wre we e sroe tɛɛ hɛɛ dwan, yire na yirɛ nyjɛ na ee kɛ taa kro ni. E Tafun Nyiɛkpɔɔ wre we e dwan tra ŋga u e kaan kre nu.

9 O Tafun Nyiɛkpɔɔ wre we e wru mbe pe u leele cheche. Imi na wra nyu yo mna da mna e ŋga kre, na ee li e Tafun Nyiɛkpɔɔ wre nyu kee na mbe taa u kolo na wala. 10 Kena leele mblɛ pee wa tra na kro we nya na o Tafun Nyiɛkpɔɔ wre mɛɛ kii wa e na, a pie e fiɛ. 11 O Tafun Nyiɛkpɔɔ wre we ti mbe yirɛ chichiele bɔ e na, e lɛɛ biile, na e pɔɔri yurɛ, na e yirɛ nyjɛ ee luu tra kro, we ti mbe yi nɛɛ tra ŋga wra da mna e tolɛɛlɛ ŋga na we e ŋga kre nu. 12 O Tafun Nyiɛkpɔɔ we ti nyiɛ yiri nyjeeri mbe pan mbe wo e tra na ki nyjila nu, mbe e kɛ nyu tnumu kro dwan. Ee ta mbe waŋgrɛ tataara jin, la, yire wa jin ndro pan. 13 E Tafun Nyiɛkpɔɔ wre we ti e yiɛklu waŋgra pan nyjila kro nu, yaa kro to pe pan fio. Na ee ndie tɛɛ kee nyjɛ e Tafun Nyiɛkpɔɔ wre yo, a ndaa yi yuu e pan aŋga ŋga na, mbe dɔɔta na ee taa yi na wala, kena nyjila kro nu we e yire nyjeeri, yaa pan tra fio. 14 Yaashia laa kee nyjɛ ni yuu e pan aŋga ŋga na, mbe kna mbe le kokoo na, mbe sɛ taa sɛɛnlɛ yire kro mbra yi sumi.

15 La, na e n ndie tɛɛ e Tafun Nyiɛkpɔɔ wre pan, mu dɔɔta na ee li u mbra nyjɛ ni e kaan aŋga ŋga na, yire suŋgɔ nyjɛ krɛrɛ we pan e pan, mbe paan e fɛ mbe kun.

16 We e sun e chiɛ na, mbe e sun e seele nu.

17 E sro nyjɛ e le kakɛɛ nu, na lawee ŋga nu e sro pini kro we yi sun.

18 We e lɛɛ biile sun, mbe yirɛ nyjɛ ee luu tra sun, mbe e pɔɔri yurɛ kro biile sun.

19 Na e yili fimi na we e sun, a na e ndru mu pan katoo mbe u e sun.

20 O Tafun Nyiɛkpɔɔ wre we ti mbe suŋgɔ, na tutom, na tɔɔra pan e na, yira ŋga na ee kɛ taa kro na, mbe sɛ su na we e kla mbe ki e fo. Ŋgi na hin? Sisam nyjɛ e pe, mu u je kre ndra na. 21 O Tafun Nyiɛkpɔɔ wre we ti yira nyini nyini to e na, mbe sɛ su na we e kla mbe yili tra ŋga nu e lee mbe sɛ ki wru mbe tni kre nu. 22 O Tafun Nyiɛkpɔɔ wre we ti mbe yira ŋga kie jaa lewo chɔɔn, na yira ŋga kie ti mbe wejiŋge wɛɛri lewo na, na yira ŋga kie ti mbe lewo tintin, na ndram wrɛŋgɛ kpakpa, na wam sisaa, na kaandɔɔ ŋmba we ti mbe yirɛ nyjɛ ee luu kro jaa kla. Yire kanyana nyjɛ we kro e na mbe sɛ su na ee ku. 23 Nyiɛ yiɛ we sheli mbe pe na swafre yi mbe ki ti nyiɛ wa jaa pan, mbe tra ŋga e taanla ŋga sheli na tɔɔnrɔ yi. 24 Ŋga nyiɛ wa na paan kre ndra na, bloŋgo bribri ee na nyaa mbe sɛ su na ee kla.

25 O Tafun Nyiɛkpɔɔ we ti mbe e loŋgoolo e ja. Kolo nunu ee yii mbe sɛ wi na pe ni, la, ee kooloe nɛɛrɛ vru mbe fɛ mbe sɛ, a e kee we waŋgra leele kro ndio tra ŋga nu. 26 A na pe e gbo mu wo, hanyiɛlɛ mblɛ pe tro nyiɛ yiɛ na, na yurɛ mblɛ pe tro tra pie e kaara ka, a ndro wa pe piɛri mbe pe laa e gboolo na. 27 O Tafun Nyiɛkpɔɔ wre we ti mbe laŋmbɛɛ nyjɛ yira to Egypt leele na kre to e na, yire na atinyi, na klɛ nyjɛ yi yaa, na haŋmbaara nyjɛ yie ti e na yua, a yire yira nyjɛ krɛrɛ yaa jaa ka tra. 28 O Tafun Nyiɛkpɔɔ wre we ti mbe tɔɔlɛɛ, na fuunro, na tutom wo e na. 29 A lafo chrichri na kuraa ee na tali mbra tro, imi na fuun tali kre. Yira ŋga ee na pini kro wa nyu mbe e ŋga, a ble nyini ŋga pie e fiŋge, mbe e yirɛ shɔ e pan jaŋga na, a yaa ndro ta mbe u e shɔ.

30 Blɔ we chlɔ shɔ na we kɔɔ u leŋge, la, e loŋgoolo pre wa we kɔɔ u wru mbra chaa. E plɛ we kalonyi, la, yaa yi ta mbe tni. Ee afoo see pe, la, yaa yi sɛnyi ta mbe kun mbe li. 31 E loŋgoolo we e nui yii mbe gbo e yiɛ na, la, yaa pe kaara ka ta mbe ka. Pie e bubunlɔ yii jaŋga mbe sɛ na pe ni, a pia ndru mbe pan na pe ni mbe e ŋga. Pie e mbaala foolo, a ndro n wa mbe pe shɔ mbe e ŋga. 32 Pie e bibilɛ, na e bichiɛlɛ yii mbe sɛ waŋgra fɔŋgɔ nu, a blenyini ŋga ee na pe chaa mbe nya, a faŋga ka wa pe e nu mbe tɛɛ mbe sɛ pe shɔ. 33 Leele mblɛ e n chin pie pan mbe sro nyjɛ e e faŋga tɛɛ mu ta e tra nu yire wru mbe sɛ li, a yira ŋga ee ta e ble nyjɛ ee li kro nu yi na pie ndrashelee tɛɛ mbra e fiŋge. 34 A kee nyjɛ ee nya nyiɛlɛ ni kre we e ndio mbe e wa tɔɔlɛɛ na. 35 O Tafun Nyiɛkpɔɔ wre we ti mbe laŋmbɛɛ nyjɛ yi yaa to to e kosie na e jewrɛ na, a yaa jaa yi tra, yie e tɔ mbe yire e jewrɛ na mbe sɛ su e ndrɛ na.

36 O Tafun Nyiɛkpɔɔ wre we yire na e ŋunu ŋmba e tɛɛ eyɛ na wre ni mbe sɛ waŋgra fɔŋgɔ ŋga yire, ndee e tolɛɛlɛ nsra chin nu. Bawa ee sɛɛnlɛ nyjɛ pe kɛɛn tɛɛ mu tɛ, na nyjɛ pe dnɛ tɛɛ mu pe sumi. 37 Waŋgrɛ leele mblɛ nu o Tafun Nyiɛkpɔɔ we e ni mbe sɛ kre, na pe kee nyjɛ yi e da yire nya, kie pe fo, mbe praa kefuɛn yuu e na, mbra e pini mbra tɛɛ.

38 Ee yirɛ luu tataara e seele nu, la, chiɛri yɛ ee ta mbe kun. Ŋgi na hin? Kpatɔ we paan yi ka. 39 Ee afoe see pe, mbe yi kun, la, yaa yi simi ta mbe gbɔ, ndee mbe tre sɛnyi ta mbe kun. Ŋgi na hin? Fiɛnlɛ we yi ka. 40 Olive tinyi we pe e tra kre nu poŋgo, la, yaa olive simi ta mbe yaka pe. Ŋgi na hin? Yi sɛnyi yire we mbru mbe wo bibre. 41 Ee bibilɛ, na bichiɛlɛ se, la, yaa pe nya eyɛ jaara. Ŋgi na hin? Pie pe yii ŋunɔ mbe sɛ na pe ni. 42 Kpatɔ we nɛɛ mbe pan mbe e tinyi, na e see yirɛ ka peii.

43 Fuŋu ŋmba u yiri waŋgra ka nu mu pan mu tni mu chaa e nu we uyɛ ta, mbe jaŋga ta e na, la, we ti mbe e je kpɔɔ. 44 Fuŋu wre we ta mbra e jini, la, yire wa ta mbe u jin. We yiɛklu e na, mbe yire kna mbe kro tɔ kala kro na.

45 Israel leele, na e n li o Tafun Nyiɛkpɔɔ mbra na u kee ŋga u e kaa ŋga na, we mbe yire suŋgɔ nyjɛ krɛrɛ e kɔŋgɔ ni, mbe paan e tɔ, mbe e kla. 46 Na ki pan ma, ndro kro we yire na e nanae nya mbe chin na o Tafun Nyiɛkpɔɔ suŋgɔ ki e yii. 47 Ŋga e nsra e Tafun Nyiɛkpɔɔ wre sumi yɛshɔɔrɔ kpɔɔ ni nyjila ŋga nu wra tia e kɛ na nyu kre, 48 ki tia klo, nyumu gbɔɔ, na wejiwaara troo, na shian fiŋge ni ee sɛ e loŋgoolo mblɛ o Tafun Nyiɛkpɔɔ wre we ti pe yiri mbe e taan kre sumi, a pie e fiŋge mbe gbo.

49 O Tafun Nyiɛkpɔɔ wre we ti waŋgra ka yiri haa leelee ka nu mbe yiri mbe e taan, waŋgra kre we pe nyaanyaa imi na nyuu waa nyaanyaa kre, tra nyukɔɔrɔ na pie yiri mbe pan, waŋgra ŋga leele yolo nɔɔ yaa loo. 50 Pe kee we pe fiɛrɛ ni, a pia blɛlɔɔ le mbe nya, ndee mbe biile fooro chin. 51 Pie e yurɛ mblɛ e poorii yii mbe ka, mbe e sroe nyjɛ e luu kun mbe li, mbe sɛ su na pie e kla. Pia e shɔlɔ, na simi fɔŋgɔ gbɔwo, na olive kro wru mbe sɛ, e nui, na mbaala, na e sikaala kro, pia wa ti e pan, mbe sɛ su na pie e kla. 52 Pie paan kakpɔɛ nyjɛ yii wa e tra ŋga nu kro fɛ mbe kun, mbe sɛ su na mboe gedenyi nyjɛ e sin mu yi fɛ mu kun kre, na pie yi juari mbe wo. Kakpɔɛ nyjɛ o Tafun Nyiɛkpɔɔ wre e ŋga yire kro, pie yi kro fɛ mbe kun tra kre nu.

53 Kanyana ŋga e loŋgoolo we ti mbe ki e da nyjila ŋga nu pe e fɛ mu kun kre ndra na, e bibilɛ, na e bichiɛlɛ mblɛ o Tafun Nyiɛkpɔɔ wre e ŋga pre ee na kaa.

54 Hali lewo ŋmba u uyɛ ta, a u lɛɛ tna e nu kre wa u ndro soo fooro chin, ndee mbe u chɔ ŋmba u kori, na u biile mblɛ pe kro kre fooro le, 55 mbe pe wa ŋga u pɔ ŋmba we gbo mbra kaa kre kaara ka. Ŋgi na hin? Kre kaara kre chiin kie kro u pan mbe wra kaan ki na, kanyana ŋga e loŋgoolo we ti mbe ki e da, nyjila ŋga nu pie pan mbe e kakpɔɛ yire fɛ mbe kun kre na. 56 Chlɔ ŋmba u uyɛ ta, mu u uyɛ shɔ mu li e nu, a u n na chaa mbe jele waa kan tra kre, we lamsusrom li u plɔ ŋmba u kori, na u biblɔ, na u bichlɔ na. 57 Hali biseere kro yira ŋga ki tuuri u pan nyjila ŋga ni u u biile sii kre, na biile pre kro we jawala sisaa le na pe ni. Ŋgi na hin? Na we ta, mbe wra pɔ ŋmba u se, na kro yira ŋga kie to kre ndra mbe ka, nyjila ŋga nu loŋgoolo we e kakpɔɛ fɛ mbe kun mbe ti mbe kanyana e da kre nu.

58 Na e nsraa dɔɔta mu li mbra nyjɛ kee pe nyunɔ hlɛ ŋga nu ŋga na, a e nsraa e Tafun Nyiɛkpɔɔ wre yɛnyiŋge mɛɛ ŋga kii fiɛrɛ ni ŋga fiɛ kre, 59 o Tafun Nyiɛkpɔɔ we ti mbe yira nyjɛ yii fiɛrɛ ni pan mbe to yire na e nanae na, a we ti kanyana nyjɛ nyu yia jaa to, na yira fuɛn nyjɛ yia jaa tra pan mbe to e na. 60 A we ti Egypt yira nyjɛ e fiɛ yire kro pan mbe to to e na, mbe kun mbe mbra e na. 61 O Tafun Nyiɛkpɔɔ wre we ti mbe yira nyininyini, na kanyana nyininyini nyjɛ kee yi n wa Mbra Hlɛ ŋga nu ŋga pan e na, mbe sɛ su na ee kla. 62 E nɛɛ na wɔɛlɛɛ nyjɛ yii wa nyiɛ yiɛ na yi, la, ee kro fiɛn. Ŋgi na hin? E n li e Tafun Nyiɛkpɔɔ wre nyu kee na.

63 Imi na ki tna o Tafun Nyiɛkpɔɔ wre pan a u tia e eyɛ ta e tnimu nu, mu nɛɛ ŋga, pan chɔɔ kie tna u pan na we e kla putuu. We e kɔ mbe yili tra ŋga e shie mbe sɛ wru mbe tni kre nu.

64 A o Tafun Nyiɛkpɔɔ wre we e gbun mbe nyina waŋgrɛ nu kro, mbe yire tra nyukɔɔrɔ kokoo nunu na, mbe sɛ su ki nyukɔɔrɔ kokoo nunu na. Bawa ee sɛɛnlɛ nyjɛ pe tɛ kɛɛn ni, na nyjɛ pe pe dnɛ ni sumi. E tolɛɛlɛ pre kuraa nsra yire sɛɛnlɛ yire kee chin fa. 65 A waŋgrɛ yire leele nu yaa wejinyiŋge ta, a yaa titɛɛ ta mbe tni mbe wuu. Bawa o Tafun Nyiɛkpɔɔ wre we ti mbe e jawalafun e nu, mbe e yiɛ wa mbe le chiin mbe sɛ pra, mbe ki ti e dankna kro kɔ. 66 Ee na kawa na e ŋmaa ni, na lafo na yi o, na blee yi o, fiɛrɛ we e yii. Ŋgi na hin? Na e n chin ŋga kie e da. 67 Na nyiŋge se mbe e na yuu mbo, “Yila ki kɔ yira ɛ!” A na yila waa kɔ mbe na yuu mbo, “Nyiŋge ki se yira ɛ!” Ŋgi na hin? Fiɛrɛ kee nyjɛ e nu kre, na kee nyjɛ ee nya yire ndra na yi. 68 O Tafun Nyiɛkpɔɔ wre we ti e ndru krɔɛ ni mbe sɛ Egypt na, kre kolo ŋga ndaa yo na mba ti e ndru mbe yii na fio. Bawa ee na chaa mbe eyɛ prɛ mbe e loŋgoolo ŋga, mbe pe e pe letaala, la, yaa ndro ta mbe u e lɔ.