Nyiɛkpɔɔ Leele Titi
7
Na e Tafun Nyiɛkpɔɔ wre waa le na e ni tra ŋga nu e shie mbe sɛ tni kre nu, a u waa Hittite leele, na Girgash leele, na Amora leele, na Canaan leele, na Perizzite leele, na Hivite leele, na Jebusite leele pre ni e yiɛ, yire waŋgrɛ kɔɔnashin yire kro kpɔɔ kpɔɔ, a pee faŋga ni mu wɛ e na, 2 la, na e Tafun Nyiɛkpɔɔ wre waa pre leele mblɛ le e kɛɛ, a e waa pe ja kre, e pe kla peii, yaashia pe yaka ti. Yire na pre waa shia yira ka, ndee mbe pe fooro le. 3 Yaa shia ti mbe e biile pe biile leŋge. 4 Na kre ma, pie ti mbe e biile pre laa ni kro, mbe sɛ na pe sɛɛnlɛ yire sumi, na ki pan ma e Nyiɛkpɔɔ wre krɔ we kun na e ni kpɔɔ, mbe u e kla nyaanyaa. 5 Kena na e waa pe ja kre, e pe sragbuɛnlɛɛ yire juari, e pe dnɛ nyjɛ pe peerii yire gbun e juari mbruru, mbe e pe Asherah sɛɛn chlɔ kɛɛn nyjɛ pe kan yire chile mbe wo, e pe sɛɛnlɛ yire sro. 6 E yi pe ma, ŋgi na hin? E pe o Tafun Nyiɛkpɔɔ wre wolo, a u e wɔ leele mblɛ pee wa tra ŋga yiɛ na kro nu, mu e pe u leele mblɛ kee ki u shian titi.7 Ki n pe na nɛɛ e na nɛɛ mu wɛ leele kro na kre ki tia o Tafun Nyiɛkpɔɔ na e kori, mu e wɔ na u leele lɛ yire, yire e nsra nɛɛ kuraa tra ŋga yiɛ na. 8 La, kori o Tafun Nyiɛkpɔɔ na e kori, mna li u daŋga ŋga wra da mna e tolɛɛlɛ ŋga na we u jaŋga kpɔɔ kre tɛɛ mbe e wɔ mbe yili tnibim ŋga nu e na nyi Egypt ŋunu Pharaoh kɛɛ kre nu. 9 Kena e jawa e chin na, e Tafun Nyiɛkpɔɔ wre chiin wi Nyiɛkpɔɔ, a u pe Nyiɛkpɔɔ kprafun, a u nyu nunu koroo kre u lii ki na na mblɛ pe u kori na lii u mbra na kre kaan, pre na pe nɔɔ leele kagbenyi tataara ni.
10 La, mblɛ pe u pra kre rɛ,
we pe ndie tini mbe pe kla,
pre leele pre,
wa pna na pe klaa ni.
11 Kena e le na ee li mbra nyjɛ ni e kaan aŋga nyjɛ kro na.
Nyiɛkpɔɔ Mbra Dwamu
12 Na e ndie tɛɛ yire mbra nyjɛ na, mu na lii yi na kpra ni, kena e Tafun Nyiɛkpɔɔ wre we li u koroo nyu nunu kre wra pe na e ni kre na, imi na wra da mna e tolɛɛlɛ ŋga kre. 13 We e kori mbe e dwan, mbe ti mbe e nɔɔ leele jiri tataara, mbe e tra dwan mbe ki ti mbe e shɔlɔ nyjɛ ee luu nyu, mbe e simi gbɔ wee ta, na olive simi ni. A we e dwan mbe ti e mbaala nɛɛ, na e katoo yurɛ ni tra ŋga kee na wra da mna e tolɛɛlɛ ŋga na we e ŋga kre na. 14 We e dwan mbe wɛ leele kro na. Blɔ, ndee Chlɔ n wa e nu mbe wa na sii, a e yurɔ wa n wa mbe pɔ la u kro. 15 O Tafun Nyiɛkpɔɔ we kɛ tɔ e na, mbe yili yira kro kɛɛ, a wa ti mbe yira fuɛn nyjɛ e na nya Egypt tra nu yire ka e wa gbun, la, mblɛ pe e pra kre na we ti mbe yi to. 16 Leele mblɛ o Tafun Nyiɛkpɔɔ we le e kɛɛ kre, e pe kla kro. Yaa ti mbe pe sɛɛnlɛ yire pe pɛlɛ mbe e ŋga mbe e sɛ yi sumi.
17 Yaashia yo eyɛ pan na, “Waŋgrɛ nyjɛ leele nɛɛ mu wɛ o na, kena mni oo pe mbe jaa pe ni hin?” 18 Yaashia pe fiɛ, e sɔɔnri kee ŋga e Tafun Nyiɛkpɔɔ wre na pe Pharaoh na Egypt leele kro na. 19 Yire titi na nya kawako kee, na kekpɔɛ, na jaŋga kee nyjɛ nu e Tafun Nyiɛkpɔɔ wre na e wɔ mu yili. Yire kee yire chɔɔ, pan we yi pe pre leele mblɛ e fiɛ ŋga na. 20 A we ti mbe sinaala kpɔɛ mblɛ pe yaa titi pan mbe pe niɔ, mbe sɛ su na pe mblɛ pie kro mbe fɛ mbe sɛ ndra pre kro we kla. 21 Kena yaa shia leele pre fiɛ, ŋgi na hin? E Tafun Nyiɛkpɔɔ ŋmba uu wa e nu wre kpɔɔ, a kee fiɛrɛ ni mu tro. 22 E Tafun Nyiɛkpɔɔ wre we waŋgrɛ yire leele pre ni e yiɛ, chɛchiɛri we na pe ni ni. Wa ti mbe e pe ni to poŋgo nyjila nunu nu, na kre ma nyaa yurɛ sisɛɛ pre we nɛɛ tra kre nu mbe wɛ e na. 23 La, e Tafun Nyiɛkpɔɔ wre we leele pre le e kɛɛ, a we ti mbe tutom wo pe na mbe sɛ su na we pe kla. 24 We pe ŋulo le e kɛɛ na, mbe e pe gbo mbe pe mɛɛ fun tra ŋga yiɛ na. A ndro n wa mbe jaa yire e yiɛ, ee pe kla peii. 25 E pe sɛɛnlɛ yire sro. A swanyiɛ, ndee swafinyi nyjɛ ni pe yi san kre, yaa shia ti mbe ka niŋge e yii, a yaa shia ka bali. Na kre ma, yie kaari pɛlɛ mbe e ŋga, ŋgi na hin? Yi pe afuŋgo yirɛ mu e Tafun Nyiɛkpɔɔ wre ŋga. 26 Yaashia pan na yire afuŋgo yirɛ nyjɛ ka ni e katoo, na kre ma suŋgɔ ŋga kii wa pe na kre we kna mbe to e na mbe e kla. E ti mbe yi kee e bin, mbe e yi le afuŋgo yirɛ. Ŋgi na hin? Na ndro taa yi na kena Nyiɛkpɔɔ suŋgɔ wa u na.