4 A Moses na dnɛ kpɛfrɛɛ shiin tɛ, a yira pe na jle wee yire yi. Ŋga nyiŋge na se bnimi kre, a wra yi tio mna nyua kre nduu, imi na o Tafun Nyiɛkpɔɔ na yo u pan kre.

5 Bawa o Tafun Nyiɛkpɔɔ na tii tlo nu mna pan mu yire u yiɛ, mna wre titi mɛɛ cheche kre yeeri mbo, “Mi wi Tafun Nyiɛkpɔɔ.” 6 A wra tro Moses yiɛ, mna kna mbo, “Mi wi Tafun Nyiɛkpɔɔ. Fooro chinfun, na dumifun wi mi. Ni krɔ na kun nyaanyaa, a ni koroo, na ni kpralie kpɔɔ. 7 A ni lii ni koroo nyu kee ŋga ni yo mu tɛɛ ni leele kro pan kre na nyjila kro nu, na sisam kee kro tii na kee. La, na ndro sisaa pe, ni u ndie tinii, hali mbe sɛ su u biile, na u nanae, na u nana jelijae kro na.”

8 Moses na pe nyaanyaa mna kosie kan tra mna u sumi. 9 A wra kna mbo, “Ni Tafun Nyiɛkpɔɔ, na mu chin na mu yiɛshɔ ni na yɛŋgɛ, ndaa mu tali na mu ti mbe wre na ŋu sɛ. Mu chin na leele mblɛ ndie kan, kena jande, o punɔɔ, na o sisam ti mu o kɛ, mu o wru mu pe mu leele.”

10 O Tafun Nyiɛkpɔɔ na yo Moses pan mbo, “Fuŋga mi na Israel leele pre we pan mbe nyu nunu pe. Pe yiɛ na, mbe kawako kee, nyjɛ yɛ yi n da mu pe waŋgra ka nu tun tra yiɛ na pe. Leele mblɛ nu e nyi pre kro we kawako kee nyjɛ mbe pe yire nya, a yie pe kawako ni titi. 11 E li ni mbra nyjɛ ni e kaan aŋga ŋga na. Mbe Amora leele, na Canaan, na Hittite, na Perizzite, na Hivite, na Jebusite leele pre ni e yiɛ. 12 Yire na leele mblɛ tra nu e shie mbe sɛ tni pre waa shia yira ka, mbe nyu nunu pe. Ŋgi na hin? Pie jaa kaari pɛlɛ mbe e ŋga. 13 Kena e pe sragbuɛnlɛɛ yire juari e wo, a dnɛ nyjɛ pe yire sholo na pilaasi yi, na yi peerii yire kro juari, e pe sɛɛn chlɔ Asherah kɛɛn nyjɛ pe kan gedenyi yire chile kro e wo.

14 Yaa shia sɛɛn ka sumi. Ŋgi na hin? Mi wi e Tafun Nyiɛkpɔɔ yenyjamfun. 15 Kena yire na tra kre leele waa shia yira ka mbe nyu nunu pe. Ŋgi na hin? Na pe shie pe sɛɛnlɛ yire sumi haa, ndee mbe sɛ sra wɔ mbe yi ŋga kre, pie kɔɔ e yeeri mbe e nyu cha, mbe e sɛ pe sɛɛnlɛ kaara yire yɛ ka. 16 A yaa shia ti mbe e bibilɛ pe bichiɛlɛ wru mbe leŋge, na kre ma, pie kɔɔ ti e ayɛte ni na, mbaa kɔɔ sɛ pe sɛɛnlɛ yire sumi. 17 Yaa shia yira nya mbe ki tɛɛ mbe sɛɛn pe mbra sumi.

18 E na ble kpɔɛ nyjɛ nu praa yiisi paanu ka yire lii. A imi na ni ki yo e pan kre, ble kɔɔnashin ni ee tɛɛ mbe paanu ŋga nu yiisi n wa ka, Abib nyiɛpɔ kre nu. Ŋgi na hin? Kre nyiɛpɔ kre nu e na yili Egypt tra nu.

19 Biblɔ jlo, na katoo yurɔ blɔ jlo kro ni wolo lɛ. 20 La, e mbɔɔ pɔ tɛɛ e bubnɔ blɔ jlo ndra lɔ, la, na yaa u ndra lɔ naa, kena e u yulɔ ka. Ki fna e biblɔ jlo kro ndra lɔ. A ndro waa shia pan ni yiɛ kɛwaara.

21 E ble kɔɔnanu tɛɛ e tnumu tun, la, ble kɔɔnashin ble kre mbe e wuu ki na, na fali nyjila yi o! Ndee na yirɛ kun nyjila yi o!

22 Na e paan mbe shɔlɔ fɔnyi kun jle kre, e yirɛ kun nyjila ble kpɔɛ yire li. Na e waa yi kun yɛlɛ kre nyukɔɔrɔ na mu kɔ, mbe e Asɛkɛ ble kpɔɛ yire li. 23 Yɛlɛ nunu na, ki fna mbe bilɛ pre pan mbe mi e Tafun Israel Nyiɛkpɔɔ wre sumi gbee taarɛ. 24 Mbe waŋgrɛ yire leele ni e yiɛ, mbe ka ya e tra sam na, a na e paan na ni sumi yɛlɛ nunu kre na gbee taarɛ, ndro wa jaa pan mbe wi na e ni, mbe e tra kre shɔ.

25 Na ki pan na ndro wa paan mbe sra wɔ yurɔ ni mbe ni ŋga, waashia paanu ŋga nu yiisi nyi ya yurɔ wre na. A kre klɛntro ble sra kaara kre ka n fna mbe nyiŋge se ki na.

26 A yɛlɛ nyu kpan, e pan na e see sro jle wee yire ni mi e Tafun Nyiɛkpɔɔ wre katoo. A wa waashia mbɔɔ, ndee sugbɔ pɔ sɔɔ na u lo nyinimi nyumu ni.”

27 A o Tafun Nyiɛkpɔɔ wre na ndru mu kna mu yo Moses pan mbo, “Yire kee nyjɛ nyunɔ mu tɛɛ. Ŋgi na hin? Yire kee nyjɛ na mbe yire mbe mi na ŋu, na Israel leele pre nyu nunu pe.” 28 A Moses na tni o Tafun Nyiɛkpɔɔ jaara ble fuloe shiin, lafo na blee, a u nsraa yaka kaa, a u nsraa nyumu gboo. A wra nyu nunu kre kee yire nyunɔ dnɛ kpɛfrɛɛ shiin yire na. Yire yi Mbra Kɛ yire.

29 Ŋga Moses na tii Sinai Nyua kre na kre, na dnɛ kpɛfrɛɛ shiin nyjɛ na pra Mbra Kɛ yire nyunɔ yiree wa u kɛɛ, a u yiɛ naa chiɛnri. Ŋgi na hin? Na wre na o Tafun Nyiɛkpɔɔ wre fni mu paara, la, wre nsra ki chin na u yiɛ chiɛnri. 30 Aaron na Israel leele pre na Moses nya na u yiɛ chiɛnri, a praa fiɛ na pie da u na. 31 La, Moses na pe yeeri, a Aaron na Israel leele pre loplombo pre na sɛ u pan, a wra paara pe pan. 32 Ŋga wra paara pe pan mu kɔ kre, a leele pre kro na pan mu fɛ mu u kun, a Moses na pe ŋga mbra nyjɛ o Tafun Nyiɛkpɔɔ na u ŋga Sinai nyua kre na yire. 33 Ŋga Moses na paara na pe ni mu kɔ kre, a wra sata tɛɛ mu yiɛ tɔ. 34 La, na ki pan na Moses shie mbe sɛ paara na o Tafun Nyiɛkpɔɔ ni Yoŋgo Nyuŋgo kre nu, mbe u sata kre laa yiɛ na. Na waa sɛ pan, mbe u mandiɛ nyjɛ Nyiɛkpɔɔ yo u pan yire kro bɔ Israel leele pre pan. 35 A na u pan na paara pe pan, pie nya na u yiɛ chiɛnri, mbe u ndru mbe sata kre tɛɛ mbe yiɛ tɔ na, fɔna waa na shie mbe sɛ paara na Nyiɛkpɔɔ ni na, kre wi ki laa.