Leele Pre Na Yili Sinai Nyua Kre Jaara
33
O Tafun Nyiɛkpɔɔ na yo Moses pan mbo, “Ŋu na leele mblɛ mu wɔ mu yili Egypt tra nu pre, e yili e sɛ tra ŋga nyu ndaa yo na mbe Abraham, na Isaac, na Jacob, na pe nanae ŋga kre nu. 2 Mbe ti nyjeeri bituŋu pan mbe kɛ tɔ e na, a mbe Canaan, na Amora na, Hittite, na Perizzite, na Hivite, na Jebusite leele pre kro ni e pan. 3 Tra taan titi na e shie kre. La, mi titi wa taa e na mbe sɛ. Ŋgi na hin? Ndikambla lɛ yire, na kre ma mbe kɔɔ sɛ e kla kolo.”4 Ŋga leele pre na kee ŋga loo kre, a pra nyɛni chichie, kra tia pe nsra pe yɛ san na swa yirɛ ni na. 5 Ŋgi na hin? Na o Tafun Nyiɛkpɔɔ yo Moses pan na u yo pe pan mbo, “E ndie kan titi, ki tia na ni yo mi na yire we nyaari chiɛri, mbe e kla kro. Kena e e swɛ yirɛ yire wɔ eyɛ na, mbe ni chin kee ŋga mbe e tɛɛ mbe pe.” 6 Ŋga pra yili nyua Sinai jaara kre, Israel leele pre nsra swa yirɛ le peyɛ na na.
Yoŋgo Nyuŋgo Kre
7 Nyjila ŋga nu Israel leele pre we tni lawee ka nu kpan, Moses we Yoŋgo Nyuŋgo kre wru mbe laa leele pre na chiɛri, mbe sɛ ki kan. Kre Yoŋgo Nyuŋgo kre nu o Tafun Nyiɛkpɔɔ na u leele pre naa fni. Kena na ki pan na wa chaa mbe Nyiɛkpɔɔ wie kee ka, bawa we yili mbe sɛ. 8 Nyjila ŋga ni Moses we yili mbra shie wa kre, mbe leele pre yili mbe yire pe yonyi nyinyi yire jlonwee nyu na mbra u le, mbe u sɛ le Yoŋgo Nyuŋgo kre nu. 9 Na ki pan na Moses sɛ le wa, mbe tlo kpɔɔ ŋga ki pe na pilaasi yi kre pan mbe yire mbe Yoŋgo Nyuŋgo kre nyu tɔ. Mbe o Tafun Nyiɛkpɔɔ na paara Moses ni. 10 Kena na leele pre waa tlo ŋga ki pe na pilaasi yi kre nya Yoŋgo Nyuŋgo kre nyu na, mbe pe kro yiɛ juule tra. 11 Bawa o Tafun Nyiɛkpɔɔ na Moses we na peyɛ yiɛ le mbra paara, na ndro na u nunu pe paara. Na pe kɔ mbe Moses ndru mbe pan pe tnihaa wa. La, na ki pan ma, mbe Nun pɔ yirifuŋu Joshua, ŋmba wra yaa Moses na wre kro u yoŋgo nyuŋgo nu.
Nyiɛkpɔɔ Nyu Ŋga Wra Yo
12 Moses na yo o Tafun Nyiɛkpɔɔ pan mbo, “Ki pe kpra na mu yo ni pan na ni yiɛklu na leele mblɛ ni mbe sɛ tra kre nu. La, mu n ni nyina ŋmba mi na wre we sɛ. Mu yo ni pan na mu ni chin titi, a mu yiɛ shɔ ni na. 13 Kena na mu yiɛ shɔ ni na yɛŋgɛ waa, kena ni nyina mu jawala, mbe ki ti ni mu sumi kpɔɔ, mbe mu yiɛ shɔ ni na kpɔɔ mbe ya. Nyiɛkpɔɔ, sɔɔnri na ŋu mna kre waŋgra ŋga leele wɔ mbe pe pe mu wolo.”
14 A o Tafun Nyiɛkpɔɔ na kna mbo, “Mi na ŋu we sɛ, a mbe ti mu wuu.” 15 A Moses na kna mbo, “Na mu chin na ma ya o na mbe o sɛ, kena maa ti mbe o yili lawee ŋga nu. 16 Na mu n ya o na a o sɛ, mni leele we pe mbe chin na mu yiɛ shɔ mi na mu leele pre na hin? Na muu wa o nu, kre kie ti mbe o yili oyɛ na leele hamblɛ pre ni tra yiɛ na.”
17 A o Tafun Nyiɛkpɔɔ na yo Moses pan mbo, “Kee ŋga mu wie kre, mbe ki pe ma mbe mu ŋga. Ŋgi na hin? Ni mu chin titi, a ni yiɛshɔ mu na.”
18 A Moses na kna mbo, “Jande, ti mbe ni mu yɛnyiŋge nya.”
19 A o Tafun Nyiɛkpɔɔ na yo u pan mbo, “Mbe ti mbe ni yɛnyiŋge kre tro mu yiɛ, a mbe ni mɛɛ cheche kre kpali mbe mu loo. Mi wi mu Tafun Nyiɛkpɔɔ. Mblɛ fooro ni chaa mbe chin, pre fooro mbe chin, a mblɛ ni chaa mbe dumi, pre mbe dumi.”
20 A Nyiɛkpɔɔ na yo u pan mbo, “Ŋu Moses, ma jaa ni yiɛ lam nya. Ŋgi na hin? Ndro n wa mbe ni yiɛ nya mbe ŋmaa ta. 21 Lawee wa ni jaara mna mbe mu jaa pan mbe yire dnɛ na. 22 Na ni yɛnyiŋge kre waa na tro, mbe mu le dnɛ kre wee nu, mbe kɛ tɛɛ mbe mu tɔ, mbe sɛ su na mbe tro tun. 23 Kena ni chin mbe ni kɛ kre laa mu na, kena mu ni krɔkro nya, la, ma ni yiɛ lam nya.”