3 A Nyiɛkpɔɔ na yo mbo, “Ndram ki saan.” Titɛɛ kre nu, a kra saan. 4 A wra nya na ŋga u pe kre nyu. A Nyiɛkpɔɔ na tia ndramsaanmu kre na laa wɔmu kre na, 5 a wra ndramsaanmu kre yeeri nyisee, mna wɔmu kre yeeri blee. Yila na kɔ, a nyiŋge na se, kre na yi ble ŋga kra yiɛ klu.

6 A Nyiɛkpɔɔ na yo mbo, “Nyumu ki yɔ shiin, mbe lalaa sni yi pan.” 7 A Nyiɛkpɔɔ na tia nyumu kre na yɔ shiin a ka na sɛ pɔ nyjeeri, a ka naa wa tapan, a lalaa na sni yi pan. 8 A Nyiɛkpɔɔ na yi lalaa kre yeeri nyiɛ yiɛ. Yila na kɔ, a nyiŋge na se kre na yi ble shiin wo.

9 Nyiɛkpɔɔ na yo mbo, “Nyumu ŋga kii wa tapan haa kre ki sɛ ble titɛɛ, mbe tra waa sni.” A kra pe ma. 10 A Nyiɛkpɔɔ na lawee ŋga ki yuwa kre yeeri tra, mna nyumu ŋga kra ble titɛɛ kre yeeri epo. A Nyiɛkpɔɔ na nya na ŋga u pe kre nyu.

11 A wra ndru mna yo mbo, “Tinyi na wrɛ, na nyaa nyini nyini yi fin tra yiɛ na, mbe sɛ sɛ imi na yi luuro nyi.” A yira pe ma. 12 A tinyi, na wrɛ, na nyaa nyini nyini na fin tra yiɛ na, mnaa sɛni imi na yi luuro nyi. Nyiɛkpɔɔ na nya na ŋga u pe kre nyu. 13 Yila na kɔ, a nyiŋge na se, kre na yi ble taarɛ wo.

14 A Nyiɛkpɔɔ na yo mbo, “Yirɛ nyjɛ yie ti lawee na nyaa yi yili mbe pan nyiɛ yiɛ na, imi kie pe mbe nyisee pe ki yɛ, na blee ni. Yire yie pe sɛmbɛɛrɛ yirɛ nyiɛ yiɛ na, mbra ble, na yɛlɛ, na nyjila nyina.” 15 Nyiɛkpɔɔ na yo mbo, “Yira chiɛnri nyjeeri, mbe ki ti lawee na nyaa.” A kra pe ma. 16 Nyiɛkpɔɔ na yila, na yeŋge gbeele, a yila naa yilii nyisee na, a yeŋge naa yilii blee, a wra wɔɛlɛɛ gbeele na. 17 Nyiɛkpɔɔ na tia yila, na yeŋge, na wɔɛlɛɛ yire na sɛ pɔ nyjeeri, 18 imi kie pe mbe lawee na nyaa tra lafo na blee, mbe ki ti nyisee pe ki yɛ na blee ni. Nyiɛkpɔɔ na nya na ŋga u pe kre nyu. 19 Yila na kɔ, a nyiŋge na se, kre na yi ble jijirɛwo.

20 A Nyiɛkpɔɔ na yo mbroe, na yurɛ nyini nyini tataara pe pan lɔɛ nu, mbe hanyiɛlɛ nyini nyini na tro nyiɛ yiɛ na. 21 Nyiɛkpɔɔ na lɔɔ yurɛ kpɔɛ, na lɔɔ yurɛ nyini nyini, na hanyiɛlɛ nyini nyini gbeele, mna nya na ŋga u pe kre nyu titi. 22 Nyiɛkpɔɔ na pe dwan kro mna yo lɔɔ yurɛ pre pan na pra sii mbe lɔɔ nyi. Pan wra yo hanyiɛlɛ pre pan na pe nɛɛ tra yiɛ na. 23 Yila na kɔ, a nyiŋge na se. Kre na yi ble kunɔ wo.

24 A Nyiɛkpɔɔ na yo mbo, “Yurɛ nyini nyini pe yili tra yiɛ na, katoo yurɛ, na nyaa lam yurɛ kro.” A kra pe. 25 Imi na Nyiɛkpɔɔ na nyaa lam yurɛ nyini nyini, na katoo yurɛ nyini nyini, na yurɛ mblɛ pe fulo gbun na gbeele yi kre, a wra nya na ŋga u pe kre nyu.

26 A Nyiɛkpɔɔ na yo mbo, “E ti mbe o lewo gbeele wre titi wrumu na, mbe pe pe na wre lɛ, mbe pe jaŋga ta mbroe, na hanyiɛlɛ, na katoo yurɛ, na nyaa lam yurɛ, na mblɛ pe fulo gbun na kro na.”

28 Wra pe dwan mna yo mbo, “E se mbe leele nɛɛ tra yiɛ na. Ni tra ŋga yirɛ kro le e kɛɛ, mbe e jaŋga ta mbroe, na hanyiɛlɛ, na yurɛ kro na.” 29 A Nyiɛkpɔɔ na yo mbo, “Tiŋge sɛŋgɛ ŋga nu bie nyi, na wrɛ sro ŋga nu bie nyi, a kii wa tra yiɛ na kro, yi pe e sro. 30 A ni yurɛ pre ŋga nyaa nyinyi, na wrɛ, yire yie pe pe sro, pre na hanyiɛlɛ pre ni.” A kra pe ma. 31 A Nyiɛkpɔɔ na yiɛ wa mna yirɛ nyjɛ u gbeele yire le kro, mna nya na yi kro nyu titi. Yila na kɔ, a nyiŋge na se, kre na yi blee kɔɔnanu ble.