Exodus Hlɛ
Pra Israel Leele Pre Fiŋge Egypt Tra Nu
1
Jacob bibilɛ mblɛ wre na pre na sɛ Egypt tra nu pre mɛɛ yi kre. Ŋga praa shie kre, pre na pe chiɛlɛ na pe biile kro pra sɛ. 2 Reuben, na Simeon, na Levi, na Judah, 3 na Issachar, na Zebulun, na Benjamin, 4 na Dan, na Naphtali, na Gad, na Asher. 5 Jacob nɔɔ leele pre kro naa fuloe taarɛ na kɛ. U pɔ Joseph rɛ, na wree wa Egypt tra nu wa fa. 6 Mbakɔ kre, Joseph na u lɛbiile pre, na leele mblɛ pra sɛ Egypt tra nu pre kro na lɛ lɛ mna ku mu kɔ. 7 La, pe nanae pre na jiri mna nɛɛ tataara, mna faŋga ta, mna Egypt tra kre shɔ mu ta poŋgo.8 Yɛlɛ tataara yɛ kɔkro, ŋunu fɔŋgɔ wa na yiri Egypt tra nu, a u nsra Joseph kee ka chin. 9 Wre ŋunu wre wra yo u leele pan mbo, “E le, Israel leele pre nɛɛ, mu faŋga ni mu wɛ o na titi. 10 Kena e pan mbe o kachindɛ kolo ka cha na pe ni, na kre ma, pie nɛɛ mbe ya, a na ki waa pan na ŋunɔ kun, pie jaa sɛ ya o loŋgoolo na mbe pe wi na o ni, mbe kɔɔ fɛ mbe yili o tra ŋga nu.” 11 Kra tia Egypt leele pre na tinlɛ lefɛɛnlɛ wɔ mu tɛɛ pe na, mbe praa pe fiŋge, mbe ti praa tnumu tuni jaŋga na. A pra kakpɔɛ shiin yɛ kun, a yira pe ŋunu Pharaoh yirɛ tɛɛ haa, yi mɛɛ naa Pithom, na Rameses. 12 La, imi na Egypt leele pre naa Israel leele pre fiŋge kre, pan chɔɔ praa nɛɛi na yaa, mnaa tra kre shio na taa, kra tia Egypt leele pre naa Israel leele pre fiɛ, 13 ki tia pra ndrashelee tɛɛ mna tia praa tnumu tuni. 14 Pra tia praa tnumu tuni kpɔɔ, mbe sra wɔ pe na, pre praa pe tofae kuun pe pan, na pooro bri na pe nyinyi siin pe pan, na pe seele tnumu kro tuni, tnumu nyjɛ praa tuni jaŋga na kre kɔkro ni, Egypt leele pre naa ndrashelee lii pe na.
15 Egypt ŋunu wre na chiɛlɛ shiin mblɛ praa Hebrew leelea siirefɛɛnlɛ pre yiri a pra sii pre yeeri, wa mɛɛ na Shiphrah, a haŋu wre mɛɛ naa Puah, a wra yo pe pan mbo, 16 “Na e Hebrew leele siirefɛɛnlɛ pre yiri mbe pe se kre, nyjila ŋga ni pɔ wre paan mbe to kre, e u dɔɔta, na biblɔ wi, e u gbo, la, na chlɔ wi e u ti.” 17 La, chiɛlɛ shiin pre naa Nyiɛkpɔɔ fiɛ, ki tia pe nsra kee ŋga Egypt ŋunu wre na yo pe pan kre pe. Pe nsraa bibilɛ pre kuu. 18 Kraa wa wa a ŋunu wre na chiɛlɛ shiin pre yeeri mna pe wie mbo, “Mni a e pe ma, a e n na bibilɛ pre kuu hin?”
19 A pra kna mbo, “Hebrew leele pre chiɛlɛ pre n pe na Egypt chiɛlɛ pre lɛ, pee nyaanyaa see na, na mu loo na u wii see ni, ŋu naa yoo na mu da wa kre, na u se fuŋga ma.” 20 Ki tia Nyiɛkpɔɔ na nyu chiɛlɛ shiin pre na, mna tia Israel leele pre na nɛɛ, mna sheli mu ya. 21 Ŋga chiɛlɛ shiin pre naa Nyiɛkpɔɔ fiɛ kre ndra na, Nyiɛkpɔɔ na pe ŋga pre titi biile. 22 Kra tia Pharaoh na yo u leele pre pan mbo, “Biblɔ ŋmba Israel leele pre we se kpan, e u wa Nile lɔɔ kre nu, la, bichiɛlɛ pre rɛ, e pre ti.”