Leviticus Hlɛ
Yurɛ Sroo Sra Wɔɔ
1
O Tafun Nyiɛkpɔɔ na paara Moses ni Yoŋgo Nyuŋgo ŋga nu wre Nyiɛkpɔɔ na Moses naa fni kre nu, mna yo u pan mbo, 2 “Yo Israel leele pre pan na, na wa paan yurɔ ni mbe sra wɔ mbe ni ŋga kre, yurɔ wre fna mbe pe nuu, ndee mbɔɔ, ndee sugbɔ.3 Na wa chaa mbe nuu tɛɛ mbe sra wɔ, kena u pan na nablɛm, ŋmba u n na fumnɔ ni. U pan na u ni o Tafun Nyiɛkpɔɔ Yoŋgo Nyuŋgo kre jlonwee nyu na, kre Nyiɛkpɔɔ we u sra kre shɔ. 4 Ki fna mbe u kɛnyi taa yurɔ wre ndra na, kre o Tafun Nyiɛkpɔɔ we sra wɔɔ kre shɔ na sisam tinkɛɛ sra yi. 5 Kena u nablɛm pɔlɔ wre gbo wa, mbe Aaron bibilɛ srawɔfɛɛnlɛ pre yurɔ wre nyimi yire wru mbe yi nyaara sragbunu ŋga kii wa mu yire Yoŋgo Nyuŋgo kre jlonwee nyu na wa kre kokoe yire kro na. 6 Kena u yurɔ wre ŋɔni, mbe u knumu. 7 Mbe Aaron bibilɛ srawɔfɛɛnlɛ pre kejenyi taa sragbunu kre na mbe kanhun le yi na. 8 Mbe Aaron bibilɛ pre yurɔ wre kaara yire, na u ndra, na u nyina yire taa kejenyi yire na. 9 Kena ŋmba u pan na sra yurɔ wre ni kre yurɔ wre lɛɛ, na u jekpɔlɔ yire je, mbe srawɔfun ŋmba u tnumu tuni ki ble kre yi sro sragbunu kre na. Kre yurɛ sroo sra ŋga ndiom tna o Tafun Nyiɛkpɔɔ wre pan.
10 Na mbɔɔ, ndee sugbɔ ni wa chaa mbe yurɔ sroo sra wɔ kre, u fna mbe pe yurɔ blɔ ŋmba u n na fumnɔ. 11 A ki fna mbe u u gbo sragbunu kre nyjeeri haa wa, o Tafun Nyiɛkpɔɔ wre yiɛ, mbe srawɔfɛɛnlɛ pre u nyimi wru mbe yi nyaara sragbunu kre kokoe yire kro na. 12 Na u u knumu mu kɔ, mbe srawɔfun ŋmba u tnumu tuni ki ble kre u kaara kre taa sragbunu kanhun kre na, kre na u ndra, na u nyina yire ni kro. 13 Kena u yurɔ wre lɛɛ yirɛ yire je, na u jekpɔɛ yire ni, mbe srawɔfun wre yi chaa kaara yire nu mbe yi sro sragbunu kre na. Kre sra kre ndiom tna o Tafun Nyiɛkpɔɔ wre pan.
14 Na hanyini ni wa pan mbe yurɔ sroo sra wɔ naa, hanyini wre fna mbe pe kotro, ndee katoo kotro ŋmba u n lɛ chichie. 15 Mbe srawɔfun wre sɛ yire na u ni sragbunu kre na, mbe u yulɔ ŋmaa mbe kɔ, mbe u ndra kre sro sragbunu kre na, mbe u soo mbe u nyimi yire nu mbe wo sragbunu kre kokoo nunu na. 16 Mbe u hanyini wre fuŋmbɔɔ na yirɛ nyjɛ yii wa ki nu kro wɔ mbe wa sragbunu kre yila finhaa, mna pe ki tɔɔnrɔ woni kre. 17 Mbe u hanyini wre yii u kuɛn na, mbe u tini mbe u nyaa, waa shia u kuɛn yire wla u na, mbe u u taa sragbunu kre na kro mbe u sro. Kre sra kre ndiom tna o Tafun Nyiɛkpɔɔ pan.