Pra Yoŋgo Nyuŋgo Kre Kan
40
A o Tafun Nyiɛkpɔɔ na yo Moses pan mbo, 2 “Nyiɛpɔ jle kre ble ŋga ki yiɛ klu na, Yoŋgo Nyuŋgo ŋga nu mi na ni leele pre we na fnii kre kan. 3 Mbe mu Nyu Nunu Daka ŋga nu Mbra Kɛ yire we le kre tɛɛ Cheche Ndoo Titi kre lam, mbe yoŋgo wa ki nyu na. 4 Mbe mu pan tebru kre ni, mbe ki yirɛ bɛɛlɛ yire taa ki na, mbe pan na kania kaan kre ni, mbe ki mu yirɛ yire kan kan ki na. 5 Swanyiɛ sragbunu ŋga na pie na tuwe ndiom tɛɛn sroi kre tɛɛ Nyu Nunu Daka kre yɛsimi Cheche Ndoo wa, mbe mu yoŋgo wa jlonwee kre nyu na. 6 Mbe mu sragbunu ŋga na pie na yurɛ sro sra woni kre yire Yoŋgo Nyuŋgo kre yɛsimi. 7 Mbe mu yaawa kre tɛɛ sragbunu kre na Yoŋgo Nyuŋgo ŋga nu mi na ni leele pre we na fnii kre lalaa, mbe nyumu le ki nu mbe ki nyi. 8 Mbe mu lawee vala wo kre kan, mbe yoŋgo wa ki nyu na.9 Na mu kɔ mbe mu Yoŋgo Nyuŋgo kre, na ki yirɛ yire kro fa na simi cheche kre ni, mbe yi pe cheche ni pan.
10 Mbe mu chin mbe sragbunu kre, na ki yirɛ bɛɛlɛ fa simi kre ni mbe yi pe cheche poŋgo. 11 Na mu yire kɔ, mbe mu yaawa kre na ki taa yira kre pe cheche ma na.
12 Na mu kɔ mbe mu ti Aaron na u bibilɛ pre pan mbe yire Yoŋgo Nyuŋgo kre jlonwee nyu na, mbe mu pe weli paala kolo na. 13 Mbe mu Aaron le u srawɔfun dodonyi cheche yire, mbe u fa na simi ni, mbe ki ti u jaa ni srawɔɔ tnumu kre tun. 14 Mbe mu pan na u bibilɛ pre ni mbe pe le pe dodonyi yire. 15 Kena mu pe fa simi ni, imi na mu pe lɛ pe kre, mbe ki ti pe jaa ni srawɔɔ tnumu kre tun. Kre simi faa ŋga we ti mbe pre na pe nanae jaa pe ni srawɔfɛɛnlɛ nyjila kro nu.”
16 Moses na kee yire kro pe imi na o Tafun Nyiɛkpɔɔ na yo u pan kre. 17 Ŋga pra yili Egypt tra nu kre, ki yɛlɛ shiin wo kre nyiɛpɔ jle wo kre ble ŋga ki yiɛklu na, kre nu pra Yoŋgo Nyuŋgo kre kan. 18 Moses na yirɛ nyjɛ na yie kan yire kro tɛɛ tɛɛ tra, mna yi krɔɛ jeelee yire kan, mna yi paari kɛɛn kro wa, mna ki kɛɛn nyjɛ yie kan yire kro kan. 19 A wra yoŋgo nyaa mu Yoŋgo Nyuŋgo kre tɔ, mna ŋga kie taa ki ndra na haŋa kre nyaa mna ki tɔ na, imi na o Tafun Nyiɛkpɔɔ na yo kre. 20 A wra dnɛ kpɛfrɛɛ shiin yire wru mna yi le Nyu Nunu Daka kre lam. Mna ki kɛɛn yire le feelee yire nu, mna ki nyutɔŋgɔ ŋga yi fooro chin jɔɔn kre tɛɛ mu ki tɔ. 21 A wra Daka kre wru mu tɛɛ Cheche Ndoo Titi kre nu wa, mna yoŋgo wa ki nyu kre na. Kre kolo ŋga na wra tro mna Nyu Nunu Daka kre tɔ, mbe ndro wa ki nya, imi o Tafun Nyiɛkpɔɔ na yo kre.
22 A wra tebru ŋga na pie na paanu cheche taari kre tɛɛ Cheche Ndoo kre lam na shie nyjeeri haa. 23 Mna paanu nyjɛ praa teeri Nyiɛkpɔɔ pan yire taa ki na, imi na o Tafun Nyiɛkpɔɔ na yo Moses pan kre. 24 A wra kania kaan kre tɛɛ Cheche Ndoo kre lam, na shie tapan haa, mna yiɛ kan tebru kre na. 25 A wra kania kre mu mu tɛɛ Cheche Ndoo wa imi na o Tafun Nyiɛkpɔɔ na yo Moses pan kre. 26 A wra swanyiɛ sragbunu ŋga na praa tuwe ndiom tɛɛn sroi kre yire Cheche Ndoo wa, jlonwee lam wo ŋga nyu na pra yoŋgo wa kre yɛsimi imi na o Tafun Nyiɛkpɔɔ na yo Moses pan kre, 27 mna tuwe ndiom tɛɛn sro imi na o Tafun Nyiɛkpɔɔ na yo kre.
28 A wra yoŋgo wa Cheche Ndoo Titi kre nyu na, 29 mna yurɛ sro sragbunu kre kan lawee vala wo kre jlonwee kre mbɛɛ na fimi na. Mna yurɛ sroo, na sro sra wɔ, imi na o Tafun Nyiɛkpɔɔ na yo Moses pan kre.
30 Wra yaawa kre tɛɛ yurɛ sroo sragbunu kre, na Yoŋgo Nyuŋgo kre lalaa, mna nyumu le ki nu. 31 Kre nu Moses, na Aaron na u bibilɛ pre naa pe kɛnyi na pe jeelee jee, 32 na ki pan na pie le Yoŋgo Nyuŋgo wa, ndee mbe da sragbunu kre na, imi na o Tafun Nyiɛkpɔɔ na yo Moses pan kre. 33 Moses na lawee vala wo kre yire mna Yoŋgo Nyuŋgo kre, na sragbunu kre fɛ mu kun, mna yoŋgo wa ki nyu na. Ŋga wra kre pe mu kɔ kre, tnumu kre nyu na to.
Tlo Na Pan Mu Yoŋgo Nyuŋgo Kre Tɔ
34 Bawa tlo ka na pan mna Yoŋgo Nyuŋgo ŋga nu o Tafun Nyiɛkpɔɔ na u leele pre we na fni kre tɔ, a u yɛnyiŋge na pan mna ki nyi. 35 Ŋga kra pan ma kre ndra na, Moses nsra ja mbe le Yoŋgo Nyuŋgo kre nu.
36 Kena na ki pan na tlo kre laa Yoŋgo Nyuŋgo kre na, kena Israel leele pre kɔ pe tni haa mbe taa ki kro, 37 a na tlo kre waa kro titɛɛ wa naa, pia kɔ pe titɛɛ. 38 Pe kolo kun nyjila kre kro nu, Israel leele pre naa tlo kre nyaa Yoŋgo Nyuŋgo kre na lafo na, na ble wɔ mbe pe ki nya na ki nyini kanhun.