2 Srawɔɔ dodoŋgi kpro kre, jese fiŋge, na mbruku wo, na nyiɛ duu, na nyiɛ piipii, na jese ŋga pra pe swanyiɛ ni pra ki tin. 3 Pra swanyiɛ gbun a yira pe pɛprɛɛ, mna yi knumu bɛɛlɛ bɛɛlɛ mna yi tin mu le jese mbruku wo, na nyiɛ duu, na nyiɛ piipii, na fiŋge yire nu, mna yi tɛɛ mna dodoŋgi kre tin. 4 Pra mɛnyi shiin fra mna mbra dodoŋgi kpro kre patiɛ na, nyjɛ ni kie na yiri mbra poo. 5 A pra greree chichie tin na yire jese yire nyini ni na chɔɔ, mna ki fra mu mbra dodoŋgi kpro kre na, a kra pe yira nunu, imi na o Tafun Nyiɛkpɔɔ na yo Moses pan kre. 6 Pra dnɛ nyjɛ pe yeeri onyx yire shiin tɛ, mna yi le swanyiɛ yirɛ nu, mna Jacob bibilɛ kɛmbɔshiin pre mɛɛ kaanri yi na. 7 Pra yi pɔ mu hlu dodoŋgi kpro kre patiɛ mɛnyi yire na. Yire ni praa Israel sele kɛmbɔshiin yire sɔɔnri, imi na o Tafun Nyiɛkpɔɔ na yo Moses pan kre.

8 Yirɛ nyjɛ ni pra dodoŋgi kpro kre pe yire chɔɔ ni pra tɛɛ mu gbun dodoŋgi kre pe, mna yirɛ tin kɛ ni mna le yi nu ma na chɔɔ. 9 Dodoŋgi gbun wo kre, pra ki ka shiin a ki jenu shiin yire kro na yila. Ki titnɔmu kre na pe inchi kɔɔnanyjirɛ, a pan ki valam na nyi na. 10 Pra dnɛ chiɛnri wee yɛ tɛni yiyɛ na tataarɛ ma gbee jijirɛ. Sɔŋgɔ jle wo kre wee mɛɛ na yi, ruby, na topaz, na garnet, 11 A sɔŋgɔ shiin wo kre wee mɛɛ na yi, emerald, na sapphire, na diamond, 12 Sɔŋgɔ taarɛ wo kre wee mɛɛ na yi turquoise, na agate, na amethyst, 13 a sɔŋgɔ jijirɛ wo kre wee mɛɛ na yi beryl, na onyx, na jasper. 14 Yire dnɛ kɛmbɔshiin yire kro, pra Jacob bibilɛ pre mɛɛ nyunɔ yi na nununu, a yira yire mna Israel sele kɛmbɔshiin yire ŋga. 15 Kre dodoŋgi gbun wo kre, pra swanyiɛ tɛɛ mna jlɔnyi shiin pe, mna yi ŋmaa a yira pe na maŋa yi mna yi mbra ki na. 16 Pra swanyiɛ tɛɛ mna yirɛ leyirɛ shiin pe, mna ka tɛɛ mna feelee shiin gbun, mna feelee yire yii mu mbra dodoŋgi gbun wo kre jeŋgle na nyjeeri haa. 17 A pra swanyiɛ mɛnyi yire le feelee shiin yire na, 18 mna swanyiɛ mɛnyi shiin yire nyu shiin yire yii mu pɔ swanyiɛ yirɛ nyjɛ u patiɛ na yire na, mna chin mu yi le dodoŋgi kpro kre mɛnyi yire na. 19 Pra swanyiɛ feelee shiin pe, mna yi fra mu mbra dodoŋgi gbun wo kre jenu na tapan haa, a yiraa wa lam mna mbra dodoŋgi kpro kre na. 20 Pra swanyiɛ feelee shiin pe na, mna yi le dodoŋgi kpro kre tapan haa, a yira le patiɛ mɛnyi shiin yire na yiɛ haa, a yira kan greree ŋga pra tin kre nyjeeri haa chiɛri. 21 Imi na o Tafun Nyiɛkpɔɔ na yo Moses pan kre, pra dodoŋgi kpro kre, na dodoŋgi gbun wo kre feelee yire pɔ na maŋa mbruku wo ni, a kra tia dodoŋgi kpro kre na pan mu su greree kre nyjeeri, mbe ki ti mbe kia jaa saan.

22 Dodoŋgi titnɔŋɔ ŋga praa leni dodoŋgi kpro kre tapan kre, jese mbruku wo ni pra ki tin kro. 23 Dodoŋgi kre ndra le haa kre, pra yira fra mna mbra ki na mbe kia jaa wali nyaanyaa. 24-26 Pra jese mbruku wo, na nyiɛ duu, na nyiɛ piipii tɛɛ mna yirɛ yɛ tin a yira pe na pomegranate sɛŋgɛ yi, dodoŋgi titnɔŋɔ kre nyu na tapan haa. Mna swanyiɛ gegenyi bɛɛlɛ pe mna yi to mu hlu dodoŋgi kre nyu na, mna yi le le yirɛ nyjɛ yi pe na pomegranate sɛnyi yire lalɛɛ mna fɛ mu ki kun, imi na o Tafun Nyiɛkpɔɔ na ki yo Moses pan kre.

27 Pra yire dodonyi nyjɛ pe mna Aaron na u bibilɛ pre ŋga, 28 yire na namu, na juulee, na kplɛ tapan wee finyi prupru, 29 na greree ŋga pe jese fiŋge, na mbruku wo, na nyiɛ duu, na nyiɛ piipii tɛɛ mu tin, mna kɛ tɛɛ mu yirɛ tin mna le ki nu, imi na o Tafun Nyiɛkpɔɔ na yo Moses pan kre. 30 Pra swanyiɛ gbun pɛprɛɛ, mna nyunɔ ki na, “Pe cheche mu o Tafun Nyiɛkpɔɔ ŋga.” 31 A pra ki pɔ mu mbra namu kre yiɛ, na maŋa mbruku wo ni, imi na o Tafun Nyiɛkpɔɔ na ki yo Moses pan kre.

32 Pra o Tafun Nyiɛkpɔɔ yoŋgo Nyuŋgo ŋga nu pre na Nyiɛkpɔɔ naa fni kre tnumu tun mu kɔ. Israel leele pre na yira kro pe imi na o Tafun Nyiɛkpɔɔ na ki yo Moses pan kre.

33 A pra Yoŋgo Nyuŋgo, ŋga nu pre na Nyiɛkpɔɔ naa fni kre, na ki yirɛ bɛɛlɛ yire kro koli mna pan mu Moses ŋga. Pra pan na yirɛ gɔli yirɛ, na krɔɛ jeelee, na yi kɛɛn paari wee, na kɛɛn kan wee, na yi taa yirɛ, 34 na mbaplɔ hlɛ ŋga pe gbo nyiɛ mbe tɛɛ mbe ki ndra tɔ, na yurɔ hlɛ chichie ŋga ni ki ndra we tɔ haŋa, na ki yonyi, 35 na Nyu Nunu Daka ŋga nu dnɛ kpɛfrɛɛ shiin yire we le kre, na ki kɛɛn prɔrɔprɔrɔ, na ki fooro chin jɔɔn ŋga yi ki nyutɔŋgɔ kre, 36 na tebru kre, na ki yirɛ bɛɛlɛ, na paanu ŋga pie na teeri Nyiɛkpɔɔ pan kre, 37 na swanyiɛ titi kania kaan kre, na ki yirɛ bɛɛlɛ, na simi ŋga pie na leni kania kre nu, 38 na swanyiɛ sragbunu kre, na simi fa wo, na tuwe ndiom tɛɛn sro wee yire, na yoŋgo ŋga pie na waa yoŋgo nyuŋgo kre jlonwee nyu na, 39 na swafre sragbunu kre, na ki yira ŋga kra pe na kaara kla yira yi kre, na ki kɛɛn, na ki yirɛ bɛɛlɛ, na yaawa kre, na ki taa yira, 40 na lawee vala wo kre yonyi, na ki kɛɛn kan wee, na kɛɛn yire taa yirɛ, na yoŋgo ŋga pie wa lawee vala wo kre nyu na, na ki mɛnyi, na Yoŋgo Nyuŋgo kre kɛɛn bɛɛlɛ nyjɛ pie kan tra, na yirɛ bɛɛlɛ nyjɛ ni yoŋgo nyuŋgo kre we pe kro ni, 41 na dodonyi chichiele nyjɛ srawɔfɛɛnlɛ pre we na leni mbra lee Cheche Ndoo wa, yire na dodonyi cheche nyjɛ Aaron na u bibilɛ pre we na leni. 42 Israel leele pre na yirɛ yire kro pe imi na o Tafun Nyiɛkpɔɔ na yi yo Moses pan kre. 43 Moses na yirɛ yire nya, mna nya na yɛŋgɛ na, pra yi pe imi o Tafun Nyiɛkpɔɔ na yo kre, a wra pe dwan.