4 Moses na yo Israel leele pre pan, mbo, “Kee ŋga o Tafun Nyiɛkpɔɔ yo e pan mbe e pe yi kre mbo, 5 ‘E pan e sra wɔ e mi e Tafun Nyiɛkpɔɔ wre ŋga. Ŋmba pan ki tna kpan, u pan mbe ni ŋga swanyiɛ, na swafre, na swafiŋge, 6 na yoŋgo fiŋge, na yoŋgo mbruku wo, na ŋga ki nyina mu pe duu, na yoŋgo nyiɛ piipii, na yoŋgo ŋga pe sugbɔ yooro tɛɛ mu pe, 7 na mbaplɔ hlɛ ŋga pe gbo nyiɛ, na yurɔ hlɛ chichie, na akasia kaan, 8 na simi ŋga pe leni kania nu, na tuwe ndiom tɛɛn nyjɛ ni pe simi fawo pini, na tuwe ndiom tɛɛn nyjɛ pe sroi, 9 na dnɛ nyjɛ pe yeeri onyx, na dnɛ chichiele nyjɛ pe leni srawɔfun lopom dodoŋgi gbun wo, na dodoŋgi kpro kre na.

10 Leele mblɛ pe kɛ nyu tnumu chin e nu kro pre fna mbe paan yirɛ nyjɛ o Tafun Nyiɛkpɔɔ yo pe pe yire kro pe. 11 Yoŋgo Nyuŋgo kre, na yirɛ nyjɛ ni pie ki tɔ, na yi gɔli yirɛ, na yi krɔɛ jeelee, na yi kɛɛn prɔrɔprɔrɔ, na yi kɛɛn kan wee, na yi taa yirɛ, 12 na Nyu Nunu Daka kre, na ki kɛɛn, na ki nyutɔŋgɔ, na yoŋgo ŋga ni pie Yoŋgo Nyuŋgo kre yɔ mbe Nyu Nunu Daka kre wa na nyaa, 13 na tebru, na ki kɛɛn, na ki yirɛ bɛɛlɛ, na paanu ŋga pe teeri Nyiɛkpɔɔ yiɛ, 14 na kania kaan kre, na ki yirɛ bɛɛlɛ, na kania kre simi, 15 na sragbunu ŋga na pie na tuwe ndiom tɛɛn sroi, na ki kɛɛn prɔrɔprɔrɔ, na simi fa wo, na tuwe ndiom tɛɛn sro wee, na yoŋgo ŋga ni pie na Yoŋgo Nyuŋgo kre jlonwee nyu toni, 16 na sragbunu ŋga na pie na yirɛ sroi, na ki swafre yira ŋga ki pe na kaara kla yira yi, na ki kɛɛn prɔrɔprɔrɔ, na ki yirɛ bɛɛlɛ ni kro, na yaawa, na ki taa yira, 17 na yonyi nyjɛ ni pie ki lawee vankam kre mbɛɛlɛ tɔ, na ki kɛɛn, na yi taa yirɛ, na yoŋgo ŋga ni pie lawee vankam kre jlonwee nyu tɔ, 18 na kɛɛn bɛɛlɛ, na mɛnyi nyjɛ ni pie tɛɛ mbe Yoŋgo Nyuŋgo kre, na lawee vankam kre yii, 19 na srawɔfɛɛnlɛ pre dodonyi tin wee nyjɛ yi pe cheche, mbe Aaron na u bibilɛ na leni mbra tnumu tuni Yoŋgo Nyuŋgo wa.’”

20 Israel leele pre kro na yili Moses yiɛ mna sɛ, 21 a mblɛ pan kra tna pre na pan na pe sra yirɛ ni mna o Tafun Nyiɛkpɔɔ ŋga, mbe pe tɛɛ mbe u Yoŋgo Nyuŋgo kre pe. Yirɛ nyjɛ yira shian mbe pe ta mbe tɛɛ mbra sumi, na nyjɛ pie tɛɛ mbe srawɔfɛɛnlɛ pre dodonyi pe yire kro, pra pan na yi ni. 22 Chiɛlɛ na bilɛ mblɛ pan kra tna kro na pan ŋmɛɛ bɛɛlɛ nyjɛ ni pe yirɛ yiri ni mbe pe tɛɛ mbe Yoŋgo Nyuŋgo kre san, yire na ndiile yirɛ, na feelee, na lagboo jlɔnyi, na swanyiɛ yirɛ nyini nyini tataara ni, mna o Tafun Nyiɛkpɔɔ ŋga. 23 Pe mblɛ praa wa na yonyi finyi, na mbruku yonyi, na yonyi nyiɛ duu, na nyiɛ piipii, na sugbɔ yooro yoŋgo, na mbaplɔ hlɛ ŋga pe gbo nyiɛ, na yurɔ hlɛ chichie ni na pan na yi ni. 24 A mblɛ pra ja na pan na swafiŋge, na swafre ni mna sra wɔ mna o Tafun Nyiɛkpɔɔ ŋga, a mblɛ praa wa na akasia kɛɛn ni mbe pe ja mbe yi tɛɛ mbe yaka pe kro na pan na yi ni. 25 Chiɛlɛ mblɛ pra kɛ nyu tnumu chin pre na pan na jese finyi, na jese mbruku wee, na jese nyiɛ duu, na nyiɛ piipii nyjɛ pe suuru ni. 26 A plɛ na sugbɔ yooro tɛɛ mna jese pe. 27 A pe loplombo pre na pan na dnɛ nyjɛ pe yeeri onyx, na dnɛ yɛ nyini ni na, mbe pe yi le srawɔɔ dodoŋgi kpro kre, na gbun dodoŋgi kre na, 28 na tuwe ndiom tɛɛn nyjɛ ni pe simi fa wo pini, na simi ŋga pie na leni kania nu, na simi fa wo, na tuwe ndiom tɛɛn sro wee ni. 29 Israel leele pre chiɛlɛ na bilɛ mblɛ pan kra tna pre kro, na pan na yirɛ nyjɛ ni o Tafun Nyiɛkpɔɔ na yo na Moses u tɛɛ mbe tnumu tun yire ni. Ŋmba wraa chaa wra pan na yɛ ni.

30 A Moses na yo Israel leele pre pan mbo, “O Tafun Nyiɛkpɔɔ wre Uri biblɔ Bezalel, Hur nana ŋmba u yiri Judah jlom na wre wɔ. 31 Nyiɛkpɔɔ tia u ŋumu u nyi, mu u ŋga kɛ nyu tnumu penchiɛn jawala, na nɔɔloo, mbe u jaa u kɛ tɛɛ mbe tnumu nyini nyini tun, 32 mbe jaa swanyiɛ, na swafiŋge, na swafre tɛɛ mbe yirɛ chichiele nyini nyini pe, 33 mbe jaa tinyi yirɛ, na dnɛ chichiele, na yirɛ nyini nyini tɛ. 34 O Tafun Nyiɛkpɔɔ wre Bezalel, na Oholiab, Ahisamach biblɔ ŋmba u yiri Dan jlom na wre ŋga jawala, mbe pe pe ŋmbilɛ pre nyina. 35 U tia pe ja na pe kɛnyi teeri mbe yirɛ nyini nyini pe. Yirɛ nyjɛ pe tɛ, na nyjɛ pe tin jese fiŋge, na mbruku wo, na nyiɛduu ni, na nyiɛ piipii ni, mbe jaa yonyi nyini nyini, na yirɛ nyini tataara tɛ.