6 Ni Ahisamach biblɔ ŋmba pe yeeri Oholiab ŋmba u yiri Dan jlom na wre wɔ na, mbe u paan ya u na. A tɛtɛmblɛ mblɛ kɛ nyu tnumu ki nyu kre, ni pe ŋga jawala kpɔɔ, mbe ki ti pe jaa yira ŋga mbe yo pe pe kro pe. 7 Pre pie Yoŋgo Nyuŋgo ŋga nu ni yɛnyiŋge we tni, na Nyu Nunu Daka kre, na ki nyutɔŋgɔ, na yirɛ nyjɛ ni pie Yoŋgo Nyuŋgo kre san, 8 na tebru kre, na ki yirɛ bɛɛlɛ, na swanyiɛ kania kaan kre, na ki yirɛ bɛɛlɛ, na sragbunu ŋga na pie na tuwe ndiom tɛɛn sroi kre, 9 na sragbunu ŋga na pie na yurɛ sroi kre, na ki yirɛ bɛɛlɛ, na yaawa kre na ki taa yira, 10 na Aaron na u biile srawɔɔ dodonyi chichiele nyjɛ pie na leni mbra srawɔɔ tnumu tuni yire, 11 na simi ŋga ni pie na srawɔfɛɛnlɛ faa kre, na tuwe ndiom tɛɛn nyjɛ pie na sroi Cheche Ndoo wa kre, pre pie yire yirɛ nyjɛ kro pe, imi na ni pe nyina yi yi kre, pan ki fna pe yi pe.”

12 O Tafun Nyiɛkpɔɔ na yo Moses pan mbo, 13 “Yo Israel leele pre pan na, pe li Wuuble kre na, ni Wuuble yi. Kre yi sɛmbɛɛrɛ kee mi na yire lalaa mbe sɛ su nyjila kro nu, mbe ki nyina na, mi e Tafun Nyiɛkpɔɔ wre e wru mu pe ni leele. 14 Kena e li ble kre na, e ki pe wuuble. Ŋgi na hin? Ki pe cheche. Kena ŋmba u n li ki na, la, mu tnumu tun ki ble kre, wa chaa ni leele pre nu na, a ki fna pe u gbo. 15 Ble kɔɔnanu ni ki fna e tɛɛ mbe e tnumu tun, la, kɔɔnashin ble kre pe Wuuble mu ni ŋga. Kena ndro ŋmba we tnumu tun ki ble kre fna pe u gbo. 16 Israel leele pre fna mbe li kre ble ŋga na, mbe ki pe mi na yire nyu nunu kre sɛmbɛɛrɛ. 17 Kre ki pe sɛmbɛɛrɛ yira kpiki mi na Israel leele lalaa. Ŋgi na hin? Mi e Tafun Nyiɛkpɔɔ wre, ndaa ble kɔɔnanu tɛɛ mu nyjeeri na tra pe, a ble kɔɔnashin ble kre na, ni nsra tnumu tun. Ndaa wuu.”

18 Ŋga Nyiɛkpɔɔ na paara Moses ni Sinai nyua kre na mna kɔ kre, a wra u ŋga dnɛ kpɛfrɛɛ shiin nyjɛ na wre titi na mbra yire nyunɔ kambɛlɛ ni yire.