Sragbunu Tuwe Ndiom Tɛɛn Sro Wo Kre
30
Nyiɛkpɔɔ na yo Moses pan mbo, “Akasia tiŋge tɛɛ mu sragbunu tɛ mbra tuwe ndiom tɛɛn sroi ki na. 2 Ki fna mbe ki kokoe yire kro yila, ki valam fna mbe pe inchi kɛmbɔkɔɔnatarɛ, mbe ki titnɔmu pe ma na. Mbe ki gedem pe inchi fulo na kɛmbɔkɔɔnanu. Mbe mu kre na ki yirɛ nyjɛ yie yili ki jeŋgle jijirɛ yire na chom chom na nyamblɛ yi yire pe kaan nunu ni. 3 Mbe mu swanyiɛ nya mbe wo ki ndra, na ki mbɛɛlɛ jijirɛ yire, na ki yirɛ nyjɛ yi yiri chom chom yire na kro, mbe swanyiɛ kre ka tɛɛ mbe ki nyu yii mbe fɛ mbe kun. 4 Swanyiɛ tɛɛ mu feelee badɛnyi jijirɛ pe mbe shiin le kokoo na, mbe shiin le kokoo nunu na, mbe yi mbra ki jeŋgle jijirɛ yire na, mna ki jeelee yire nyi kre, mbe yi tɛɛ mbe kɛɛn nyjɛ ni pie na ki tru yire yii. 5 Kɛɛn nyjɛ ni yie na tru kre, e yi pe na akasia tiŋge ni, mbe e swanyiɛ nya mbe wo yi na. 6 Kre sra gbunu ŋga, e ki tɛɛ yoŋgo ŋga ni pe tɛɛ mu nyuŋgo kre yɔ, a Nyu Nunu Daka kree wa ki kro kre yiɛ. Kre lawee kre nu mi na yire we na fni. 7 Kena na nyiŋge se bnimi a Aaron pan kania kre lehaa, ki fna u tuwe ndiom tɛɛn nyjɛ pe sroi yire sro ki na. 8 A pan chɔɔ, na u pan kania kre mu haa yilakɔŋgɔ, mbe u tuwe ndiom tɛɛn yire sro ki na. Yire tuwe ndiom tɛɛn sro sra ŋga fna mbe e na ki pini, mbe e biile, na e nanae, na e nana jelijae yiri mbra ki pini mbe yaka wa ki pee tɔ kolo. 9 Yaa shia tuwe ndiom tɛɛn nyjɛ yi n fna sro kre sragbunu ŋga na, ndee mbe yurɔ sro ki na, ndee mbe sro tɛɛ mbe sra wɔ ki na, a yaa shia simi gbɔwo tɛɛ mbe sra wɔ ki na. 10 Yɛlɛ nyini kpan, ki fna mbe Aaron nɛɛrɛ laa sragbunu kre na gbee nunu, mbe u yurɔ ŋmba ni pe teeri na sisam sra woni wre nyimi tɛɛ mbe sragbunu kre yirɛ chom chom yire mana. Pan ki fna e na ki pimi yɛlɛ nyini nyjila kro nu. Kre sragbunu kre fna mbe pe cheche mbe mi e Tafun Nyiɛkpɔɔ wre ŋga.”Yoŋgo Nyuŋgo Kre Tɔɔ
11 O Tafun Nyiɛkpɔɔ na yo Moses pan mbo, 12 “Na maa na Israel leele pre tɔɔnri, blɔ kro fna mbe u ndra swa tɔ mbe uyɛ ŋmaa lɔ, mbe mapini kee ka wa u da leele tɔɔnrɔɔ nyjila kre nu. 13 Lewo ŋmba pie tɔɔnri mbe chaa leele tɔɔnrɔɔ kre nu kpan fna mbe swafiŋge yɔɔ tɔ mbe ki da nyjɛ pe chinɛ Suminyuŋgo wa kre ni. 14 Blɔ ŋmba u da yɛlɛ fulo na shie kro, pie u tɔɔnri, a ki fna mbe u swa kre ka tɔ. 15 Swafun waa shia tɔ mbe wɛ, mbe tɛɛ mbe uyɛ ŋmaa lɔ, a shianfun waa shia tɔ fiɛn mbe tɛɛ mbe uyɛ ŋmaa lɔ. 16 Yire swɛ nyjɛ shɔ Israel leele pre pan mu tɛɛ mna Yoŋgo Nyuŋgo kre tnumu tuni nyjila kro nu. Kre tɔɔ ŋga pie na toni mbra pe ŋmaa loni, mbe ndaa pe sɔɔnri, mbra kɛ toni pe na.”
Nyumu Le Yira Yaawa Wo Kre
17 O Tafun Nyiɛkpɔɔ na yo Moses pan mbo, 18 “Swafre tɛɛ mu yaawa, na ki taa yira pe. Mu ki tɛɛ Yoŋgo Nyuŋgo kre, na sragbunu kre lalaa, mu nyumu le ki nu. 19 Mbe Aaron na u bibilɛ pre nyumu kre tɛɛ mbra kɛnyi, na jeelee jee. 20 Na pe yo pie le Yoŋgo Nyuŋgo wa, ndee mbe da sragbunu kre na mbe yirɛ sro kpan, ki fna mbe pe kɛnyi na jeelee je, na kre ma pie ku. 21 Kre mbra ŋga ni le mu tɛɛ pre na pe nanae pan, mbe pe li ki na nyjila kro nu, mbra pini ma, mbe pia ku.”
Simi Ŋga Ni Pe Srawɔfɛɛnlɛ Faa
22 O Tafun Nyiɛkpɔɔ wre na yo Moses pan mbo, 23 “Tuwe ndiom tɛɛn titi cha mu yi chaa mu simi fa wo ndiom taan pe. Kroboo cha mbe ki snamu da kra dnɛ kɛmbɔshiin, na yirɛ ndiom tɛɛn nyjɛ pe yeeri cinnamon yire yɛ, mbe yi snamu da kra dnɛ kɔɔnanu. Yire na yirɛ ndiom tɛɛn nyjɛ pe yeeri cane yire yɛ, mbe yi snamu pe kra dnɛ kɔɔnanu. 24 Mbe mu yirɛ nyjɛ pe yeeri cassia yire yɛ cha mbe yi snamu pe kra dnɛ kɛmbɔshiin. Mbe mu olive simi galɔm nunu chaa yi nu, 25 mbe tlade pefun yi tɛɛ mbe simi fa wo ndiom taan pe, mbe ki pe cheche. 26 Kre simi kre ni mu tɛɛ mbe Yoŋgo Nyuŋgo kre, na ni Nyu Nunu Daka kre fa. 27 Kre na tebru kre, na ki yirɛ hɛnyi ni kro, na kania kaan kre na ki yirɛ kro, na sragbunu ŋga na pe tuwe ndiom tɛɛn sroi kre, 28 na sragbunu ŋga na pe yurɛ sroi kre na ki yirɛ kro, kre na yaawa kre na ki taa yira. 29 Yire yirɛ nyjɛ kro fa na simi kre ni mbe yi pe cheche, kena yira ŋga kie gbun ki na kro we pe cheche. 30 Kena mbe mu Aaron na u bibilɛ pre fa na simi kre ka ni, mbe pe le srawɔfɛɛnlɛ mbe pe ni srawɔɔ tnumu tun. 31 Yo Israel leele pre pan na, kre simi cheche ŋga, kre ni ki fna mbe pre na pe nanae tɛɛ mbra ni tnumu tuni nyjila kro nu. 32 Ki n fna mbe e ki pe na simi fa wo yi, a yaa shia yirɛ nyjɛ ni pe yi pe yire tɛɛ mbe ki ka nyini pe. Ki pe cheche, kena ki fna mbe e ki pe cheche. 33 Lewo ŋmba we ki ka nyini pe, ndee mbe ki ka fa, a u fun n pe srawɔfun kre, mbe ufun wɔ mbe yili ni leele pre nu.”
Tuwe Ndiom Tɛɛn Sro Wee Yire
34 O Tafun Nyiɛkpɔɔ na yo Moses pan mbo, “Yirɛ ndiom tɛɛn nyjɛ mbe mu nyina ŋga nyini cha, mu ti mbe yi nɛɛmu yila, yire yi stacte, na onycha, na galbanum, na frankincense. 35 Mbe tlade pefun yi chaa mbe tuwe ndiom taan pe, imi na pe tlade pini kre. Mbe u weŋge chaa yi nu, kena yi pe cheche, mbe pe chasi. 36 Yi yɛ tre mbe yi pe na mimi yi, mbe mu sɛ na yi ni ni yiɛ Yoŋgo Nyuŋgo kre nu, mbe sɛ yi nyaara Nyu Nunu Daka kre yiɛ wa. Ki fna mu yi le na yi pe cheche titi mu ni ŋga. 37 Ŋu titi waa shia yire yirɛ yire tɛɛ mbe tuwe ndiom taan pe mu yɛ pan. Yi le na yi pe cheche mu ni ŋga. 38 Na ndro wa waa yirɛ yire yɛ tɛɛ mu tlade pe, a ki pe na ŋga ni e nyina ŋga nyini yi, mbe tɛɛ mbra faa kre, mbe ufun wɔ mbe yili ni leele nu.”