Wra Nyu Nunu Daka Kre Pe
37
Bezalel na akasia tiŋge tɛɛ mna Nyu Nunu Daka kre pe. Ki titnɔmu naa wa inchi fuloe shiin na kunɔ, a ki valam naa inchi fulo na kɔɔnashin, a ki gedem naa inchi fulo na kɔɔnashin. 2 A wra swanyiɛ nya mu tɛɛ mu ki lam, na ki fimi tɔ kro, mna swanyiɛ kre ka tɛɛ mu ki yii mu fɛ mu kun. 3 Wra swanyiɛ kre ka nya mna feelee pe, mna yi mbra ki jeelee yire jeŋgle jijirɛ yire na, yi shiin naa wa kokoo nunu na, a shiin na wa kokoo nunu na. 4 A wra akasia kaan tɛɛ mu kɛɛ shiin tɛ, mna swanyiɛ nya mu wo yi na, 5 mna yi le feelee yire nu, Daka kre jeŋgle yire na mbra ki tru. 6 A wra swanyiɛ titi tɛɛ mu ki nyutɔŋgɔ pe, ki titnɔmu naa inchi fuloe shiin na kunɔ, a ki valam naa inchi fulo na kɔɔnashin. 7 Wra swanyiɛ gbun mna yi tɛɛ mu nyjeeri bitumblɔ mblɛ pe yeeri Cherubim shiin pre pe mu yire fooro chin jɔɔn kre jenu shiin na, 8 a nunu naa wa mu yire nyutɔŋgɔ kre jenu nunu na, a nunu naa wa mu yire kokoo nunu na. Wra pe pe mu mbra nyutɔŋgɔ kre na. 9 Cherubim pre na yire mu yiɛ kan peyɛ na, mu ndra soo nyutɔŋgɔ kre na, mna kuɛn nyaa mu ki tɔ.Wra paanu Tebru Kre Pe
10 Wra akasia kɛɛn tɛɛ mu tebru pe. Ki titnɔmu naa inchi fulo na kɛmbɔkɔɔnanu, a ki valam naa inchi kɛmbɔkɔɔnatarɛ, a ki gedem na pe inchi fulo na kɔɔnashin. 11 A wra swanyiɛ nya mu wo ki na, mna ka tɛɛ mu ki nyu yii mu fɛ mu kun. 12 Wra Tebru kre nyu yii yira pe a ki valam na pe inchi taarɛ, mna swanyiɛ nya mu wo ki na mu tro. 13 Wra swanyiɛ tɛɛ mna feelee jijirɛ nyjɛ ni pie na ki tru pe mna yi mbra ki jeŋgle jijirɛ yire na, mna ki jeelee yire nyi kre. 14 Feelee nyjɛ nu praa kɛɛn yire leni na tebru kre tru yire naa wa tebru kre nyu na, ki jeŋgle jijirɛ yire na. 15 Kɛɛn yire, akasia tiŋge ni wra yi tɛ, mna swanyiɛ nya mu wo yi na. 16 Swanyiɛ titi ni wra kotie, na yɛlɛe, na gbɔ yirɛ, na lagbuju nyjɛ ni pie na simi gbɔwo kna mbra sra woni yire krɛrɛ pe.
Kania Kaan Kre
17 Swanyiɛ titi ni wra tɛɛ mu kania kaan kre, na ki nɔɔ ŋga na kie yire kre pe, mna yirɛ pe na toto yi, yi nyu na, mna tɛɛ mu ki san. Yirɛ yire, na kɛɛn nyjɛ na kie kan yire kro, swanyiɛ wra gbun poŋgo mna tɛɛ mu yi pe. 18 Kania kaan kre, klɛ kɔɔnanu naa wa mu kan kan ki na, yi taarɛ naa wa kokoo nunu na, a yi taarɛ naa wa kokoo nunu ŋga na. 19 Yi klɛ kɔɔnanu yire, pra yirɛ tɛɛ mna yi san, a yira pe na almond tiŋge kpolo, mbe toto jiri. 20 Wra kania kaan kre san na yirɛ yɛ ni a yira pe na almond tiŋge kpolo mbe toto jiri yire jijirɛ pe ki na. 21 Mna yi klɛ yire na kan kan kre, wra yi san yirɛ yire nununu kan kan yi tapan chiɛri.
22 Ki san yirɛ yire, na ki klɛ yire, na kania kaan kre, swanyiɛ wra gbun mna tɛɛ mu yi pe poŋgo. 23 Wra kaniɛ kɔɔnashin pe mna yi taa taa kania kaan kre, na yi klɛ yire na, mna swanyiɛ titi tɛɛ mna ki taahɛɛ, na nyjɛ ni pie na kania mɛnyi yire gbeele yire pe. 24 Swanyiɛ ŋga ni wra kania kre, na ki yirɛ kro pe kre snamu na da, kra dnɛ fuloe taarɛ na kɛmbɔkunɔ.
Sragbunu Ŋga Na Praa Tuwe Sroi
25 Wra sra gbunu pe, ŋga na pie na tuwe ndiom tɛɛn sroi. Akasia tiŋge ni wra ki pe, a ki titnɔmu, na ki valam na yila. Ki titnɔmu na ki valam naa inchi kɛmbɔkɔɔnatarɛ. A ki gedem naa inchi fulo na kɛmbɔkɔɔnanu. Wra ki pe a ki jeŋgle jijirɛ yire na yili chom chom na nyamblɛ yi nyjeeri. 26 Wra swanyiɛ titi nya mu wo ki ndra, na ki lawee nyjɛ yira yili chom chom yire kro na, mna swanyiɛ kre ka tɛɛ mna ki nyu yii mu fɛ mu kun. 27 Wra swanyiɛ tɛɛ mna feelee badɛnyi pe, mna shiin le kokoo nunu na, mna shiin le kokoo nunu na, a yira mbra ki jeŋgle yire na, mna ki jeelee yire nyi kre. Mna yi tɛɛ na kɛɛn nyjɛ ni kie na tru yire yiri. 28 Kɛɛn nyjɛ ni pie na ki tru kre, akasia tiŋge ni wra yi pe, mna swanyiɛ nya mu wo yi na.
Tuwe Ndiom Taan Fa Wo Kre
29 A wra tuwe ndiom taan fa wo cheche, na tuwe ndiom tɛɛn sro wee nyjɛ tlade pefun pini yire yɛ pe.