2 Moses, na Bezalel, na Oholiab, na pe tɛtɛmblɛ mblɛ o Tafun Nyiɛkpɔɔ ŋga jawala, a praa chaa mbe ya pe na pre yeeri, mna yo pe pan na pe nɔɔhle mbe Yoŋgo Nyuŋgo kre pe. 3 Moses na yirɛ nyjɛ ni Israel leele pre na pan yire shɔ mna tnumu tunfɛɛnlɛ pre ŋga mbe pe yi tɛɛ mbe Yoŋgo Nyuŋgo kre sin. La, bnimi kpan, Israel leele pre naa paan na pe sra yirɛ ni na Moses kaan.

4 Bawa nyuŋgo kre pefɛɛnlɛ pre na sɛ yo Moses pan mbo, 5 “Yirɛ nyjɛ ni leele pre pan yire nɛɛ mu wɛ nyjɛ o shian mbe tɛɛ mbe o Tafun Nyiɛkpɔɔ tnumu kre tun kre na.”

6 A Moses na tia pra sɛ mandiɛ bɔ leele pre pan na, wa waa shia yaka wɔ mbe pan mbe pe tɛɛ mbe Yoŋgo Nyuŋgo kre pe na. Kra tia leele pre na ti ma. 7 Na nyjɛ ni pe pan yire we da mbe tnumu kre kro tun, mbe yɛ kro.

8 Pe mblɛ pra kɛ nyu tnumu chin titi pre pra Jese fiŋge, na jese mbruku wo, na jese nyiɛ duu, na nyiɛ piipii tɛɛ mu Yoŋgo Nyuŋgo kre pe, mna Cherubim tin na kɛ ni mu le yi nu. 9 Yonyi nyjɛ pra tin yire valam na yila. Nunu titnɔmu naa yaadi kɛmbɔjijirɛ, a ki valam naa yaadi shiin. 10 Pra yonyi yire kunɔ fra mu mbra, a yire na pe nunu, pan chɔɔ pra kunɔ hɛnyi yire pe na. 11 A pra yoŋgo mbruku wo tɛɛ mu fuuloe pe, mna le yonyi nyjɛ pe fra mu mbra yire jenu nunu na, mna shiin wo kre pe ma na. 12 Pra fuuloe yire fuloe shiin na kɛ pe mu le yonyi jle wee nyjɛ pra fra mu mbra a yira pe nunu kre jenu shiin wo kre na, mna ndru mu shiin wo kre pe ma na, a fuuloe yire na yiɛ kan yi yɛ na. 13 A pra swanyiɛ gɔliyirɛ fuloe shiin na kɛ pe, mu yi tɛɛ mna yonyi shiin yire yii mu mbra yi yɛ na, a yira pe yoŋgo nunu.

14 A pra sugbɔ yooro tɛɛ mna yonyi kɛmbɔnunu pe, mna yi tɛɛ mu Yoŋgo Nyuŋgo kre ndra tɔ. 15 Pra yonyi yire kro pe a yi valam a yi titnɔmu na yila. Yi titnɔmu naa yaadi kɛmbɔkunɔ kunɔ, a yi valam na yaadi shiin shiin. 16 Pra yonyi yire kunɔ fra mu mbra a yira pe nunu, mna kɔɔnanu hɛnyi yire fra mu mbra a yire na pe nunu na. 17 Pra fuuloe fuloe shiin na kɛ pe mu le yoŋgo kre nunu jenu nunu na, mna yɛ pe ma na mu le haŋa kre jenu na na. 18 Pra swafre gɔliyirɛ fuloe shiin na kɛ pe, mna yi tɛɛ mu yonyi shiin yire yii mu mbra, a yira pe yoŋgo nunu mna ki tɛɛ mu Yoŋgo Nyuŋgo kre ndra tɔ na. 19 Pra mbaplɔ hlɛ ŋga pe gbo nyiɛ piipii tɛɛ mna yoŋgo pe mna ki ndra kre tɔ na, mna yurɔ hlɛ chichie pe mna kre tɛɛ mu ki ndra kre tɔ haŋa.

20 A pra akasia kɛɛn tɛ a yira fraka, mna yi tɛɛ mu Yoŋgo Nyuŋgo kre krɔɛ jeelee pe. 21 Kaan kre nunu titnɔmu naa fiiti kɛmbɔkunɔ, a ki valam naa inchi fulo na kɔɔnashin. 22 A pra kɛɛn yire tapan haa tɛ a yira yili chom chom, a pra yi tɛɛ mu kɛɛn yire yii mu mbra. 23 Krɔɛ jeelee yire fulo naa wa na shie ki tapan haa, 24 mna swafiŋge tɛɛ mna yi taayirɛ fuloe shiin pe. Yi shiin naa wa krɔ jele kre nunu tapan, mna yi yirɛ chom chom nyjɛ yira yili yire yii. 25 Pra krɔɛ jeelee yire fulo kan kan na yoŋgo nyuŋgo kre tapan, 26 mna swafiŋge taayirɛ fuloe shiin pe, a yi shiin na le krɔ jele nunu tapan. 27 La, nyuŋgo kre kro na shie yila to haa kre, pra krɔɛ jeelee kɔɔnanu kan bawa, 28 mna yi shiin kan yi jeŋgle shiin yire na. 29 Krɔɛ jeelee yire pra kan yi jeŋgle shiin yire na kre, pra yira tɛɛ mu yi yii tapan mna sɛ su yi nyjeeri. 30 Kena krɔɛ jeelee nyjɛ yiraa wa na shie ki yila tohaa yire naa kɔɔnatarɛ, a swafiŋge taayirɛ yire naa kɛmbɔkɔɔnanu. Yi shiin naa wa krɔ jele nunu tapan.

31 Pra akasia tiŋge tɛɛ mu kɛɛn paari wee kɛmbɔkunɔ pe, yi kunɔ naa wa Yoŋgo Nyuŋgo kre krɔɛ jeelee yire mbɛɛ nunu na, 32 a yi kunɔ naa wa krɔɛ jeelee yire mbɛɛ nunu kre na, a yi kunɔ hɛnyi yire naa wa ki kro, na shie yila tohaa. 33 Pra paari kɛɛn yire le krɔɛ jeelee yire babaari haa, a yira Yoŋgo Nyuŋgo kre yii mna yire ki kokoo nunu na, mu sɛ su kokoo nunu na. 34 Pra swanyiɛ nya mu wo krɔɛ jeelee yire na, mna swanyiɛ feelee badɛnyi kan kan yi na mna yi tɛɛ mu paari kɛɛn yire yii. Paari kɛɛn yire chɔɔ, pra swanyiɛ nya mu wo yi na na.

35 Yotumblɔ na jese fiŋge, na mbruku wo, na nyiɛ duu, na nyiɛ piipii tɛɛ mna yoŋgo tin, mna Cherubim tin kɛ ni mu le ki nu. 36 Pra akasia tiŋge tɛɛ mna kɛɛn jijirɛ tɛ mna yi tɛɛ mu yoŋgo kre yii, mna swanyiɛ nya mu wo yi na, mna swanyiɛ gɔli yirɛ kan kan yi na. A pra swafiŋge tɛɛ mu kɛɛn jijirɛ yire taa yirɛ jijirɛ pe mu yi yii. 37 Pra Yoŋgo Nyuŋgo kre jlonwee nyu yoŋgo kre tin na jese fiŋge, na mbruku wo, na nyiɛ duu, na nyiɛ piipii ni, mna kɛ tɛɛ mu yirɛ tin tin mu le ki nu. 38 Pra kɛɛn kunɔ tɛ, mna gɔliyirɛ kan kan yi na, mna swanyiɛ nya mu wo kɛɛn nyjɛ pe kan yire ndra na, mna swanyiɛ kre ka nya mu wo yirɛ nyjɛ pe pe mu gɔliyirɛ yire yii yire na, mna swafre tɛɛ mu kɛɛn kan wee yire taayirɛ pe.