Yurɛ Sro Sragbunu Kre
38
Wra akasia tiŋge tɛɛ mna sragbunu ŋga na pie na yurɛ sro sra woni kre pe. Wra ki pe a ki kokoe jijirɛ yire kro na yila. Ki titnɔmu na ki valam na pe fiiti kɔɔnashin na yɔɔ, a ki gedem naa fiiti jijirɛ na yɔɔ. 2 Wra ki jeŋgle jijirɛ yire tɛ a yira yili chom chom na yurɔ nyamblɛ yi, a wra swafre nya mna wo ki na poŋgo. 3 Wra swafre tɛɛ mna yaawa nyjɛ ni pie na tɔɔnrɔ woni pe, mna ka tɛɛ mna sofi pe, na sra wɔ kotie, na damia, na paawa nyjɛ ni pie na kanhun woni yire kro pe. 4 Wra swafre tɛɛ mna yira pe na kaara kla yira yi, mna ki le sragbunu kre lalaa. 5 A wra swafre kre ka tɛɛ mna feelee kpɔɛ pe, mna le yi jeŋgle jijirɛ yire na, mbe yi pe yi yii yirɛ. 6 A wra akasia kɛɛn tɛɛ mna ki tio kɛɛn tɛ, mna swafre nya mu wo yi na, 7 mna yi le feelee nyjɛ yii wa sragbunu kre mbɛɛlɛ shiin na yire nu. Taaboo ni pra tɛɛ mna sragbunu kre pe a kra lam ta.Swafre Yira Ŋga Nu Praa Nyumu Leni
8 Wra swafre ŋga kra pe na dwanle yi shɔ chiɛlɛ mblɛ praa tnumu tuni Yoŋgo Nyuŋgo kre jlonwee nyu na pre pan, mna ki tɛɛ mu yaawa, na ki taa yira pe.
Yoŋgo Nyuŋgo Kre Ndoo//Vala Wo Kre
9 Wra yonyi finyi tɛɛ mna lawee pe a kra vala mna Yoŋgo Nyuŋgo kre fɛ mu kun, ki kokoo ŋga kraa wa na shie tapan haa kre, yonyi yire titnɔmu naa yaadi fuloe shiin na kɛ kɛ. 10 A wra kɛɛn pe swafre ni mna yonyi finyi yire yii, mna swafre tɛɛ mna yi taayirɛ fulo pe. Mna swafiŋge pe prɔrɔprɔrɔ na kɛɛn yi, mna ka tɛɛ mu gɔliyirɛ pe.
11 Lawee ŋga ki vala kre kokoo ŋga kii wa na shie nyjeeri haa kre, wra ki pe a kra da ma na. 12 A ki kokoo ŋga kraa wa na shie yila to haa kre, yonyi nyjɛ yiraa wa wa yire titnɔmu naa fiiti fuloetaarɛ na kɛmbɔkunɔ kunɔ, na yi kɛɛn yii wee kɛ, a wra kɛɛn yire taa yirɛ kɛ na. Mna swafiŋge tɛɛ mna gɔliyirɛ pe, mna yɛ pe prɔrɔprɔrɔ na kɛɛn yi. 13 A ki kokoo ŋga kraa wa na shie yila fin haa kre, bawa ki nyu na nyi, kre valam na da fiiti fuloetaarɛ na kɛmbɔkunɔ.
14-15 Wra swafre kɛɛn tataarɛ kan jlonwee kre kamɛŋɛ na kalie, mna yonyi nyjɛ yira da yaadi kɔɔnashinshin na yɔɔ yɔɔ hlu kɛɛn yire na, a kɛɛn yire na taayirɛ ta kro. 16 Yonyi finyi ni pra tɛɛ mna lawee vala wo kre fɛ mu kun. 17 Kɛɛn yire taayirɛ yire, swafre ni pra yi pe. Mna yi gɔli yirɛ yire, na yi kɛɛn prɔrɔprɔrɔ yire pe na swafiŋge ni, mna ka nya mna wo kɛɛn nyjɛ wra kan yire ndrɛ na. A kɛɛn nyjɛ wra kan mna lawee vala wo kre fɛ mu kun yire kro, swafiŋge wra pe na kɛɛn yi prɔrɔprɔrɔ mna yi yii. 18 Yoŋgo ŋga wra le jlonwee kre nyu na kre, jese fiŋge, na mbruku wo, na nyiɛduu, na nyiɛ piipii ni pra ki tin, mna kɛ tɛɛ mna yirɛ tin mu le ki nu. Ki titnɔmu na da yaadi kɛ, a ki gedem na pe yaadi shiin na yɔɔ. Pan kra da chɔɔ na lawee vala wo kre yonyi yire ni.
19 A wra swafre kɛɛn jijirɛ tɛɛ mu yi yii yii, mna yi kan kan swafre yirɛ jijirɛ na. Yi gɔliyirɛ yire, na nyjɛ wra nya mna wo yi ndrɛ na yire, na nyjɛ wra pe kɛɛn prɔrɔprɔrɔ yire kro, swafiŋge ni wra yi pe. 20 Yoŋgo Nyuŋgo kre yii kɛɛn bɛɛlɛ yire, na lawee vala wo kre wee yire kro, swafre ni wra yi pe.
Yirɛ Nyjɛ Pra Le//Yoŋgo Nyuŋgo Kre Nu Kre
21 Yirɛ nyjɛ yiraa wa Yoŋgo Nyuŋgo kre nu na yi kre. Bawa dnɛ kpaflɛ shiin nyjɛ na pra Mbra Kɛ yire nyunɔ yire na nyi. Moses wra tia Srawɔfun Aaron biblɔ Ithamar wre na Levi pre le, a pra yi nyunɔ mu tɛɛ.
22 Bezalel, Uri biblɔ wre, ŋmba na wi Hur nana, a wra yiri Judah jlom na wre na yirɛ kro pe imi na o Tafun Nyiɛkpɔɔ na yo Moses pan kre. 23 A ŋmba wra ya u na na wi, Oholiab, Ahisamach biblɔ ŋmba wra yiri Dan jlom na wre. Wre wra ja na swanyiɛ, na swafre, na swafiŋge teeri na yirɛ nyininyini pini, a wre na wi tɛtɛŋu, mna ja na jese fiŋge, na nyiɛduu, na nyiɛ piipii teeri na yonyi tini.
24 Swanyiɛ nyjɛ pra pe cheche, mbe pe yi tɛɛ mbe o Tafun Yoŋgo Nyuŋgo kre pe yire snamu naa kra dnɛ kagbenyi shiin na lafaa, na fuloe jijirɛ na kɛmbɔkunɔ, imi na praa swa kra Yoŋgo Nyuŋgo wa. 25 Swafiŋge ŋga pra shɔ leele mblɛ pra tɔɔnri pe tni haa wa pre pan kre snamu na da kra dnɛ kagbenyi kɔɔnashin, na lafɛɛ kunɔ na fuloe shiin na kɛ. Imi na praa yi kra Yoŋgo Nyuŋgo wa kre. 26 Swa ŋga pra shɔ leele tɔɔnrɔɔ kre nu kre, leele pre kro na tɔ mu yila, a pra yi kra imi na praa swa kra Yoŋgo Nyuŋgo wa kre. Bilɛ mblɛ pra li yɛlɛ fulo mu na shie pan pra yi shɔ, a bilɛ mblɛ pra tɔɔnri pre naa leele kagbenyi lafɛɛ kɔɔnanu na taarɛ, na lafɛɛ kunɔ na fuloe shiin na kɛ. 27 Swafiŋge ŋga pra ta naa kra dnɛ kagbenyi kɔɔnashin na lafɛɛ kunɔ, a yire ni pra tɛɛ mna Yoŋgo Nyuŋgo kre kɛɛn taa yirɛ pe, yi nunu snamu na da kra dnɛ fuloe taarɛ na kɛmbɔkunɔ. 28 Swafiŋge ŋga kra kro kre snamu na da kra dnɛ fuloe shiin na kɛ, a Bezalel na ki tɛɛ mna kɛɛn prɔrɔprɔrɔ, na gɔli yirɛ nyjɛ yira kɛɛn kan wee yire gɔli yirɛ pe, mna ka nya mna wo kɛɛn kan wee yire ndra na. 29 A swafre ŋga pra pe cheche mna o Tafun Nyiɛkpɔɔ ŋga kre snamu na da kra dnɛ kagbenyi kunɔ, na lafɛɛ taarɛ na kɛ. 30 Swafre kre ka ni wra tɛɛ mna Yoŋgo Nyuŋgo kre jlonwee nyu kɛɛn taa yirɛ pe, na swafre sragbunu kre, na ki yira ŋga kra pe na kaara kla yira yi kre, na sragbunu kre yirɛ bɛɛlɛ ni kro. 31 Ki ka ni chɔɔ wra tɛɛ mna lawee vala wo kre kɛɛn taa yirɛ yire pe, yire na jlonwee nyu kre kɛɛn taa yirɛ yiri ni, na kɛɛn bɛɛlɛ nyjɛ pra kan mna Yoŋgo Nyuŋgo kre, na lawee vala wo kre fɛ mu kun yire kro.