3 E swafre tɛɛ e yaawa nyjɛ ni ee na tɔɔnrɔ woni pe, mbe e ka tɛɛ mbe sofi pe, mbe sra wɔ kotie, na damia, na taa paawa nyjɛ ni ee na kanhun woni yire pe. 4 E swafre tɛɛ e yira pe na kaara kla yira yi, mbe e swafre kre ka tɛɛ mbe feelee kpɔɛ pe mbe le yi jeŋgle jijirɛ yire na, mbe yi pe yi yii yirɛ. 5 E ti mbe kaara kla yira kre pe sra gbunu kre lalaa. 6 E akasia kaan tɛɛ e ki tio kɛɛn tɛ, mbe e swafre nya mbe wo yi na, 7 mbe e yi le feelee nyjɛ yii wa sragbunu kre mbɛɛlɛ shiin yire na, mbe pe yi tɛɛ mbra ki tru. 8 E sragbunu kre pe mbe ki pe na daka ŋga nyu pe nyaa yi, imi ndaa mu nyina ki yi nyua kre na kre.

9 E Yonyi finyi tɛɛ e lawee pe mbe ki vala mbe Yoŋgo Nyuŋgo kre fɛ mbe kun. E ti mbe ki kokoo ŋga kie sɛ tapan haa kre titnɔmu pe fiiti lafaa na fuloe shiin na kɛ. 10 Mbe e kɛɛn nyjɛ pe pe swafre ni fulo tɛɛ mbe yonyi finyi yire yii, mbe yi nɔɔ kan swafre yirɛ fulo nu. Mbe swafiŋge tɛɛ mbe kɛɛn prɔrɔprɔrɔ pe, na yi gɔli yirɛ ni. 11 Lawee ŋga ki vala kre kokoo ŋga ki shie nyjeeri haa kre, e ki pe mbe ki da ma na. 12 Ki kokoo ŋga ki shie yila tohaa kre fna mbe ki yonyi yire titnɔmu pe fiiti fuloe taarɛ na kɛmbɔkunɔ, na yi kɛɛn yii wee kɛ, mbe e kɛɛn yire kan yirɛɛ kɛ na. 13 Ki kokoo ŋga ki shie yila finhaa, a bawa ki jlonwee nyu nyi kre, ki lawee vala wo kre fna mbe ki valam da fiiti fuloe taarɛ na kɛmbɔkunɔ. 14-15 E swafre kɛɛn tataarɛ kan kan Jlonwee kre kamɛŋɛ na kalie, mbe e yonyi nyjɛ yie da yaadi kɔɔnashin na yɔɔ hlu kɛɛn yire na, mbe kɛɛn yire taayirɛ ta kro. 16 Jlonwee titi kre rɛ, e jese fiŋge, na mbruku, na nyiɛduu, na nyiɛ piipii tɛɛ e yoŋgo tin na kɛ ni, mbe ki titnɔmu da yaadi kɛ, mbe e ki hlu kɛɛn yire jijirɛ na, mbe kɛɛn yire kan yirɛ jijirɛ na. 17 Kɛɛn nyjɛ ee kan mbe lawee vankam kre fɛ mbe kun kre, e yi yii na swafiŋge kɛɛn prɔrɔprɔrɔ ni, mbe e swafiŋge kre ka tɛɛ mbe gɔliyirɛ pe kɛɛn yire na, mbe tɛɛ mbe yonyi yire yii, mbe kɛɛn yire kan swafre yirɛ yire na. 18 Lawee vankam kre fna mbe ki titnɔmu pe yaadi fuloe shiin na kɛ. Mbe ki valam da yaadi fulo na kunɔ. Mbe ki gedem da yaadi shiin na yɔɔ. Ki yonyi nyjɛ ee wo mbe ki fɛ mbe kun kre fna mbe e yi tin na jese fiŋge ni, mbe yonyi yire yire swafre yirɛ na. 19 Yirɛ nyjɛ ni Yoŋgo Nyuŋgo kre we pe yire kro fna mbe pe swafre ni, ki yii kɛɛn, na yi yirɛ bɛɛlɛ ni kro, e yi pe swafre ni.

20 Yo Israel leele pre pan mbe pe pan na olive simi chichie ni mbe e na leni kania kre nu, mbe ki ti ki jaa na muni yilakɔŋgɔ nyjila kro nu. 21 Aaron na u bibilɛ pre pie na kania kre le, mbra ki muni mbe tɛɛ cheche ndoo kre nu, mbra ki le mbe kia fii. Kania kre fna mbra nyini ni yiɛ nyjila kro nu, mbe yire yilakɔŋgɔ mbe sɛ su bnimi nyu na. Kre kee ŋga fna mbe Israel leele pre, na pe nanae li ki na nyjila kro nu.”