7 E sugbɔ yooro tɛɛ e yonyi kɛmbɔnunu tin, 8 e yi tin mbe yi kro yila, mbe nunu titnɔmu da yaadi kɛmbɔkunɔ, mbe ki valam da yaadi shiin, mbe e yi tɛɛ mbe yoŋgo nyuŋgo kre tɔ. 9 Mbe e yi kunɔ yire chaa mbe yi fra mbe mbra nunu. Kena e yi kɔɔnanu nyjɛ yi kro yire fra mbe mbra nunu, mbe e kɔɔnanu wo kre ka mbe mbra kiyɛ na, mbe ki le Yoŋgo Nyuŋgo kre yiɛ. 10 Mbe e fuuloe yire yɛ fra ma na fuloe shiin na kɛ mbe mbra yoŋgo kre nunu nyu na, mbe yɛ fra ma na mbe mbra haŋa kre na. 11 Mbe e swafre tɛɛ mbe yi gɔliyirɛ pe fuloe shiin na kɛ, mbe yonyi shiin yire gɔli yi fuuloe yire na mbe mbra, mbe yi pe na yoŋgo nunu yi. 12 E ti mbe yaadi kro yurɔ hlɛ yoŋgo kre nyjeeri mbe wo ki kro. 13 Mbe e yaadi yɔɔ wo ki kokoe shiin yire na mbe kra pɛli mbe ki tɔ.

14 E mbaplɔ hlɛ gbo mbe ki nyina, mbe e ki tɛɛ mbe ki ndra tɔ jle, mbe e yurɔ hlɛ chichie tɛɛ mbe ki tɔ shiinwo mbe ya.

15 E akasia tiŋge tɛ mbe yi pe krɔɛ jeelee. 16 Krɔɛ jeelee yire fna mbe yi gedem pe fiiti kɛmbɔkunɔ, mbe yi valam pe inchi fulo na kɔɔnashin, 17 mbe e kɛɛn shiin tɛ mbe le krɔɛ jeelee shiin yire tapan haa mbe yi yii mbe mbra, krɔɛ yire kro fna mbe yɛ ta. 18 E Yoŋgo Nyuŋgo kre krɔɛ jeelee yire pe imi na ni yo kre, e fulo pe mbe yi le ki kokoo ŋga ki shie tapan haa kre na. 19 E swafiŋge tɛɛ e yirɛ fuloe shiin pe mbe yi le krɔɛ jeelee fulo yire tapan. 20 E krɔɛ jeelee fulo pe, mbe yi le Yoŋgo Nyuŋgo kre kokoo ŋga kii wa na shie nyjeeri haa kre na. 21 E swafiŋge tɛɛ e yirɛ fuloe shiin pe, mbe e yi shiin le krɔɛ jeelee fulo yire kro tapan. 22 Yoŋgo Nyuŋgo kre krɔ ŋga ki shie yila tohaa kre, e krɔɛ jeelee yire kɔɔnanu pe e le wa. 23 E krɔɛ jeelee pe e le ki jeŋgle shiin yire na. 24 E krɔɛ jeelee shiin yire jeŋgle shiin yire yii na gɔliyirɛ ni, mbe yire yi nɔɔ na mbe sɛ su yi ndra na. 25 Kena krɔɛ jeelee yire kro we pe kɔɔnatarɛ, mbe swafiŋge yirɛ nyjɛ na yie yire yire pe kɛmbɔkɔɔnanu, kena swafiŋge yirɛ yire shiin we le krɔ jele nunu tapan.

26 E akasia tiŋge tɛɛ e kɛɛn prɔrɔprɔrɔ kɛmbɔkunɔ pe, mbe yi kunɔ le krɔɛ jeelee yire na Yoŋgo Nyuŋgo kre kokoo nunu na, 27 mbe yi kunɔ le ki mbɛɛ nunu na na, mbe yi kunɔ hɛnyi yire le krɔ ŋga ki shie yila tohaa kre na. 28 Kɛɛn prɔrɔprɔrɔ yire fna mbe e ka tɛɛ mbe krɔɛ jeelee yire yii lalaa mbe yire ki jenu na mbe sɛ su jenu na. 29 E swanyiɛ nya e wo krɔɛ jeelee yire, na kɛɛn prɔrɔprɔrɔ yire na, mbe e swanyiɛ feelee badɛnyi pe mbe yi tɛɛ mbe kɛɛn prɔrɔprɔrɔ yire yii mbe mbra krɔɛ jeelee yire na. 30 Yoŋgo nyuŋgo kre pe imi na ndaa mu nyina ki yi nyua kre na kre. 31 E jese fiŋge, na mbruku wo, na nyiɛ duu, na nyiɛ piipii tɛɛ e yoŋgo tin, kena e Cherubim tin kɛnyi ni mbe le yoŋgo kre nu. 32 Mbe e yirɛ gɔli wee yire tɛɛ mbe yoŋgo kre gɔli mbe mbra akasia kɛɛn jijirɛ nyjɛ na e swanyiɛ nya mu wo yire na, mbe kɛɛn jijirɛ yire kan swafiŋge yirɛ yire na. 33 E yoŋgo kre le yirɛ gɔli yirɛ nyjɛ yii wa Yoŋgo Nyuŋgo kre ndra na kre tapan. Kena e Nyu Nunu Daka ŋga nu dnɛ kpɛfrɛɛ shiin yire nyi kre tɛɛ yoŋgo kre kro. Yoŋgo kre kie Cheche Ndoo, na Cheche Ndoo Titi kre lalaa yɔ. 34 Mbe e nyutɔŋgɔ ŋga pe yeeri fooro chin jɔɔn kre tɛɛ mbe Nyu Nunu Daka kre tɔ. 35 Mbe e tebru kre tɛɛ Cheche ndoo kre lam, mbe mbra yoŋgo nyuŋgo kre kokoo ŋga ki shie nyjeeri haa kre na, kena e swanyiɛ kania kaan kre tɛɛ mbra shie ki tapan haa. 36 Yoŋgo Nyuŋgo kre jlonwee kre, e jese fiŋge, na mbruku wo, na nyiɛduu, na nyiɛ piipii tɛɛ e yoŋgo tin na kɛ ni, e ki nyu tɔ. 37 E akasia kaan tɛɛ e kɛɛn kunɔ tɛ, e swanyiɛ nya e wo yi na, mbe e swanyiɛ gɔliyirɛ le le yi na, mbe swafre tɛɛ mbe kɛɛn yire taayirɛ pe.