Pra Sra Wɔ
25
O Tafun Nyiɛkpɔɔ na yo Moses pan mbo, 2 “Yo Israel leele pre pan na pe sra wɔ mbe ni ŋga. Yira ŋga wa ta mbe pan mbe sra wɔ mbe ni ŋga kpan, ki shɔ. 3 Pe sra yirɛ yire fna mbe pe swanyiɛ, ndee swafiŋge, ndee swafre, 4 ndee jese ŋga ki pe na mbruku yi, na jese ŋga ki nyina mu pe duu, na jese nyiɛ piipii, na jese fiŋge, na yoŋgo ŋga pe pe na sugbɔ yooro ni, 5 na mbaplɔ hlɛ ŋga pe gbo nyiɛ, na yurɔ hlɛ chichie, na akasia kaan, 6 na olive simi ŋga pe leni kania nu, na tuwe ndiom tɛɛn nyjɛ ni pe simi fa wo pini, na yi nyjɛ pe sroi yire ni, 7 na dnɛ chiɛnri wee nyjɛ pie le srawɔɔ dodoŋgi kpro kre, na u gbun wo kre nyu na yire. 8 Ti mbe leele pre Yoŋgo Nyuŋgo ŋga ki pe cheche pe ni pan, mbe ni paan tni pe nu. 9 E ki pe na ki lam yirɛ ni imi na mbe e nyina kre.Nyu Nunu Daka Kre
10 E daka pe na akasia tiŋge ni, e ti mbe ki titnɔmu pe inchi fuloe shiin na kunɔ, mbe ki valam pe inchi fulo na kɔɔnashin, mbe ki gedem pe inchi fulo na kɔɔnashin. 11 E swanyiɛ nya e wo ki lam, na ki fimi kro na, mbe e swa nyiɛ kre ka gbun mbe ki nyu yii mbe fɛɛ kun. 12 Mbe e swanyiɛ kre ka gbun, mbe yi pe na feelee yi mbe yi mbra mbra ki jeelee jijirɛ yire na. 13 Mbe e akasia tiŋge tɛɛ mbe kɛɛn shiin tɛ, mbe swanyiɛ nya mbe wo yi na, 14 mbe e yi le feelee yire nu mbra ki tru. 15 Kɛɛn yire fna mbe kro feelee yire nu nyjila kro nu, yi n fna mbe wɔ. 16 Mbe e dnɛ shiin kpɛfrɛɛ nyjɛ na ni mbra yire nyunɔ yire le Danka kre nu.
17 E swanyiɛ tɛɛ e Daka kre nyutɔŋgɔ ŋga pe yeeri fooro chin jɔɔn kre pe, mbe ki titnɔmu, na ki valam da na Daka kre ni. 18 E swanyiɛ gbun e tɛɛ e nyjeeri bitumblɔ mblɛ pe yeeri Cherubim pre pe, 19 mbe nunu yire nyutɔŋgɔ kre jenu nunu na, mbe wa yire jenu haŋa kre na, pe fna mbe e pe pe mbe mbra nyutɔŋgɔ kre na. 20 Mbe pe yiɛ kan peyɛ na, mbe ndra soo mbra Daka kre nyutɔŋgɔ kre le, mbe pe kuɛn nyaa mbe ki ndra kre tɔ. 21 E dnɛ kpɛfrɛɛ shiin nyjɛ na mbra yire nyji yire le Daka kre lam, e ki nyutɔŋgɔ kre tɛɛ e ki tɔ. 22 Cherubim pre lalaa, Daka kre ndra na wa, bawa mi na yire we na fni mbra paara, mbe ni yire wa mbe Israel leele pre ŋga ni mbra kro.
Paanu Taa Tebru Kre
23 E akasia tiŋge tɛɛ e tebru pe, e ti mbe ki titnɔmu pe inchi fulo na kɛmbɔkɔɔnanu, mbe ki valam pe inchi kɛmbɔkɔɔnatarɛ, mbe ki gedem pe inchi fulo na kɔɔnashin. 24 E swanyiɛ nya e wo ki na, e swanyiɛ kre ka taa ki jenu kre na e ki fɛ e kun. 25 E ki nyu yii yira pe mbe ki valam da inchi taarɛ, mbe e swanyiɛ nya mbe wo ki na mbe tro. 26 E swanyiɛ tɛɛ e feelee jijirɛ nyjɛ ni pie na ki tru pe, mbe yi mbra ki jeŋgle jijirɛ yire na, mna ki jeelee yire nyi kre. 27 Feelee nyjɛ nu pie na kɛɛn yire leni mbra tebru kre tru kre fna mbe pe yi le tebru kre nyu na, ki jeŋgle jijirɛ yire na. 28 E akasia tiŋge tɛɛ e kɛɛn yire tɛ, e swanyiɛ nya e wo yi na. 29 E kotie, na yɛlɛe, na gbɔ yirɛ, na lagbuju nyjɛ ni pie na simi gbɔwo knai mbra sra woni yire krɛrɛ pe swanyiɛ ni. 30 E tebru kre yire Nyu Nunu Daka kre yiɛ, a nyjila kro nu, ki fna mbe e sra wɔ paanu cheche kre ka taa ki na.
Kania Kaan Kre
31 E swanyiɛ titi tɛɛ e kania kaan, na yira ŋga na kie kan kre pe. Mbe e yirɛ pe na toto yi, yi nyu na, mbe tɛɛ mbe ki san. Yirɛ yire, na kɛɛn nyjɛ na yie kan yire fna mbe pe swanyiɛ ŋga pe gbun poŋgo. 32 Ki fna mbe klɛ kɔɔnanu kan kan ki na, mbe yi taarɛ pe kokoo nunu na, mbe taarɛ pe kokoo nunu ŋga na. 33 Yi klɛ kɔɔnanu yire kro fna mbe yirɛ nyjɛ ni pe yi san, a yi pe na almond tiŋge kpolo, mu nyu yɔɔlɛ mbe toto jiri kre, mbe e yi pe yi na. 34 A kania kaan kre fna mbe e ki san yirɛ nyjɛ yi pe na almond tiŋge ki kpolo mu nyu yɔ mbe toto jiri yire jijirɛ pe ki na. 35 Ki san yirɛ yire nunu fna mbe pe lawee ŋga nu yi klɛ taarɛ yire kan kan kania kaan kre na kre tapan chiɛri. 36 Ki san yirɛ yire, na ki klɛ yire, na kania kaan kre fna mbe pe swanyiɛ gbun poŋgo mbe tɛɛ mbe yi pe. 37 E kania kɔɔnashin pe e yi taa taa kania kaan kre, na yi klɛ yire nyjeeri. E kania yire pe, na pe yi mu mbe yiraa nyaa yi yɛsimi. 38 E swanyiɛ tɛɛ e ki yirɛ, na ki taahɛɛ nyjɛ ni pie na kania mɛnyi yire woni mbra yi gbeele yire pe. 39 Swanyiɛ ŋga ni kania kaan kre, na ki yirɛ yire kro we pe kre snamu fna mbe da kra dnɛ fuloe taarɛ na kɛmbɔkunɔ. 40 E dɔɔta na ee ki pe imi na ndaa Moses nyina ki yi nyua kre na kre.