Nyiɛkpɔɔ Na Moses Yeeri Nyua Na
24
O Tafun Nyiɛkpɔɔ na Moses yeeri mna yo u pan mbo, “Nduu mu pan ni pan nyua kre na, ŋu na Aaron, na u bibilɛ shiin, Nadab, na Abihu, na Israel leele pre loplombo fuloe taarɛ na kɛ ni. Na e waa na paan, mbe e yire haalee, mbe kosie kan mbe ni sumi. 2 Mbe ŋu nunu flo mbe pan yiɛ chiɛri, maa shia ti mbe ndro ya mu na. Leele hamblɛ pre kuraa n fna mbe da nyua kre na.”3 Moses na sɛ kee nyjɛ o Tafun Nyiɛkpɔɔ na yo u pan yire, na mbra nyjɛ wra le u pan yire kro yo leele pre pan, a pe kro na kna mbo, “Kee nyjɛ o Tafun Nyiɛkpɔɔ yo o pan kro, oo li yi na.” 4 A Moses na kee nyjɛ o Tafun Nyiɛkpɔɔ na yo yire kro nyunɔ. Ŋga nyiŋge na se bnimi kre, a wra sragbunu sin nyua kre jaara, mna dnɛ kɛmbɔshiin yire mna yire sholo, dnɛ yire na yire mu Israel leele pre sele kɛmbɔshiin yire ŋga. 5 A wra Israel leele pre yirifumblɔ plɛ wɔ a pra sɛ nui gbo, mna pe sro mu tɛɛ mu wejinyiŋge sra wɔ mu o Tafun Nyiɛkpɔɔ ŋga. 6 A Moses na nui pre nyimi yire yɔɔ kna mna le yaawa nu, mna yi hɛnyi yire nyaara sragbunu kre na. 7 A wra Nyu nunu hlɛ ŋga nu wra Nyiɛkpɔɔ mbra yire nyunɔ kre wru mna yi tɔɔnri kpɔɔ, a leele pre na loo. A pra kna mbo, “Oo li o Tafun Nyiɛkpɔɔ wre kee nyjɛ u yo o pan yire kro na.”
8 A Moses na nyimi nyjɛ wra le yaawa nu yire wru mna yi nyaara leele pre na. Mna kna mu yo leele pre pan mbo, “Nyimi nyjɛ, yire ni o Tafun Nyiɛkpɔɔ mbra nyjɛ ni u nyu nunu pe na e ni yire nyu yii.”
9 Moses, na Aaron, na Nadab, na Abihu, na Israel loplombo fuloe taarɛ na kɛ pre na nduu mna sɛ nyua kre na, 10 mna sɛ Israel Nyiɛkpɔɔ wre nya. Pra yira ka nya u jeelee jaara, a kra pe na dnɛ ŋga ki chiɛnri, a praa ki yeeri sapphire kre ni pe ki faanri, a kraa nyaa chasi na nyiɛ yiɛ yi. 11 Nyiɛkpɔɔ nsra tia yaka na Israel loplombo pre ta, pra Nyiɛkpɔɔ nya, a pra chaa mu ka mu gbɔ.
Moses Naa Wa Nyua Kre Na
12 A o Tafun Nyiɛkpɔɔ na yo Moses pan mbo, “Nduu mu pan nyua kre na, mu pan mu tni ni pan mna. Mbe mu ŋga dnɛ kpaflɛ shiin nyjɛ na ni Mbra nyjɛ na ni chaa mbe Israel leele pre taa yire nyunɔ kre.” 13 A Moses na u yafun Joshua, na peyɛ kna mbe nduu nyua cheche kre na. 14 A wra kna mu yo loplombo pre pan mbo, “E tni mna e o shie mbe sɛ su na oo ndru mbe pan. Aaron na Hur we tni, kena na kala kaa wa wa na u ŋmbrɔ lalaa, mbe e sɛ na ki ni pe pan.”
15 A Moses na nduu nyua kre na, na tlo kre ki tɔ poŋgo. 16-17 Nyiɛkpɔɔ yɛnyiŋge ŋga kraa chiɛnri kre na nyua kre juule kro. Israel leele pre na yo na pan kraa pini na kanhun ki nyini vlivli nyua kre na. A tlo kre na nyua kre tɔ ma ble kɔɔnanu. Ki ble kɔɔnashin ble na kre, o Tafun Nyiɛkpɔɔ na yire tlo kre nu mna Moses yeeri. 18 A Moses na nduu mu sɛ nyua kre ndra na, mna sɛ le tlo kre nu, mna tni wa ble fuloe shiin, lafo na blee.