4 Na ki pan na wa u loŋgo nuu, ndee bubnɔ nya wra shie fun haa kre, u u yii mbe pan mbe u ŋga. 5 Ndee na mu nya a u bubnɔ tuuro to mu u fɛɛri, ya u na mbe u u yire, maa shia u wa mbe tro.

6 Na shianfun pan e kala lihaa yaa shia u shian kre le mbe yo yaa u ŋga tamu. 7 Yaa shia ndie tɛɛ kabaara kee na, a yaa shia ndro ŋmba u n chin kee ka nu yii mbe gbo finfin. Ndro ŋmba we kre sisam kee kre ka pe kre, mbe u gbun na pimi ni. 8 Wa waashia dɔlɔɔ yira shɔ. Ŋgi na hin? Dɔlɔɔ yira tii mbe ndro wa kpra nya, mbe jaa ti mbe kprafun kee fɛɛlɛ.

9 Yaa shia fuŋu pe ndra shelee kee. Ŋgi na hin? E chin na fumblɔ na lɛ yire Egypt na. 10 E yɛlɛ kɔɔnanu tɛɛ e yirɛ luu e trɛ nu, e yi kun. 11 La, e yɛlɛ kɔɔnashin wo kre ti mbe tra kre wuu. Sro ŋga kie yili tra kre nu kpan yaashia yi kun. E ti mbe shianfɛɛnlɛ yi kun mbe sɛ li, mbe nyaalam yurɛ yi hɛnyi yire yaa mbe ka. Hali olive tinyi nyjɛ e luu, na yirɛ nyjɛ e luu kagbla kro e yi pe ma.

12 E ble kɔɔnanu tɛɛ e tnumu tun kranu nunu nu, la, yaa shia tnumu tun ble kɔɔnashin wo kre na, mbe ki ti mbe e tinlɛ, na fumblɔ mblɛ pe tnumu tuni e pan, na e yurɛ kro mbe pe wuu ki ble kre.

13 E ndie tɛɛ kee ŋga mi e Tafun Nyiɛkpɔɔ wre yuu e pan kro na. Yaa shia suulo sɛɛn ka na ki nyini yiɛ mbe yaka tali, yaa shia yi mɛɛ kuraa yeeri.

14 E na ble kpɔɛ nyini taarɛ lii yɛlɛ nunu na, e na ni kaan mɛɛ.

15 Abib nyiɛpɔ ŋga nu e na yili Egypt tra nu kre, na ki waa e da kolo, e ble kpɔɛ nyjɛ nu e nsraa yiisi paanu kaa yire li, imi na ndaa ki le mu e ŋga kre. Yire ble kɔɔnashin yire nu, wa waashia yiisi paanu le nyuu. A na e paan mbe ni sumi, yaa shia pan kɛ waara.

16 Na e paan mbe sro nyjɛ e luu kun jle, e yirɛ kun nyjila ble kpɔɛ li. A na e yi kun mu kɔ yɛlɛ kre nu, mu sɛ yi ble sro tɛɛ haa kre, mbe e asɛkɛ ble kpɔɛ yire li.

17 Yɛlɛ nyini, na e yire ble kpɔɛ taarɛ nyjɛ lii kre, yire bilɛ pre kro fna mbe pan mbe mi e Tafun Nyiɛkpɔɔ wre sumi.

18 Na ki pan na e paan mbe yurɔ gbo mbe sra wɔ mbe ni ŋga, yaashia paanu ŋga nu yiisi nyi ya yurɔ wre na. A yurɛ mblɛ ni ee sra wɔ mbe ni ŋga yire ble lie yire nu kre, pe nyina nyjɛ ee wɔ pe nu yire n fna mbe tni, mbe nyiŋge se yi na.

19 Yɛlɛ nyini ŋga, e pan na e see yirɛ jle wee ni e mi e Tafun Nyiɛkpɔɔ wre ŋga. A yaashia sugbɔ pɔ sɔɔ na u lo nyinimi nyumu ni.

20 E le, mbe ti mbe nyjeeri bituŋu yiɛklu e pan, mbe kɛ tɔ e na, mbe nyaari na e ni mbe sɛ lawee ŋga ni gbeele mu tɛɛ e pan kre nu. 21 E ndie tɛɛ u pan, e li u kee na. Yaa shia yiri mbe u taan kolo ka na. Ŋgi na hin? Mi ni u tun. Na e waa yiri mu u taan, wa ki ti mbe e kɛ. 22 La, na e waa ndie tɛɛ u pan, maa li mbra nyjɛ ni le yire na kro kre, mbe pe loŋgo mbe e loŋgoolo ŋga, a mblɛ pie yiri mbe e tɔ kolo kre, mbe pe tɔ kolo. 23 Ni nyjeeri bituŋu wre we yiɛklu na e ni mbe sɛ le Amora, na Hittite, na Perizzite, Canaan leele, na Hivite, na Jebusite tra nu, a mbe pe kla kro. 24 Yaa shia kosie kan pe sɛɛnlɛ yire ka yiɛ, ndee mbe ki sumi, a yaa shia pe sumiɛ kooloe yire ka wru. Na e waa da wa, e pe sɛɛnlɛ yire kro kla, e pe dnɛ nyjɛ na pe sra woni yire kro juari e wo. 25 Na e waa mi e Tafun Nyiɛkpɔɔ wre sumi, mbe e dwan mbe ti sro na nyumu bɔ e na, a yambla wa pe e nu. 26 Mba ti na chlɔ lɛɛ ta mbe ki kla, ndee mbe gbende pe e nu, a mbe ti e ŋmaa tnu.

27 Leele mblɛ pie na e nyu kaanri kre mbe ti mbe pe ni fiɛ. A leele mblɛ pie wi na e ni kpan mbe pe jawala wa mbe fun, a mbe ti e loŋgoolo kro fɛ e yiɛ.

28 Na e waa na lee tra kre nu, mbe ti mbe sinaala kpɔɛ sɛ Hivite leele, na Canaan leele, na Hittite leele pre ni tra kre nu. 29 Mba pe ni yɛlɛ nunu na, na ni pe ni ma to, leele wa nɛɛ tra kre nu, a kie ti mbe yurɛ mblɛ pe nyaai nɛɛ tra kre nu mbra e tɔɔra.

30 Ki tia chɛchiɛri mbe na pe nini, mbe sɛ su na ee tra kre wru mbe tni. 31 Mbe e tra sam gbun mbe yire epo nyiɛ kre na mbe sɛ su Philistine epo kre nyu na, mbe yire wa mbe tro fimi tra kre na mbe sɛ su lɔɔ Euphrates kre nyu na. Ee jaŋga ta leele mblɛ pee wa tra kre nu kro na, mbe jaa pe ni ki nu. 32 Yire na pre waa shia nyu nunu pe, ndee mbe pe nunu na pe sɛɛnlɛ yire ni. 33 Yaa shia ti pe tni mbe chaa e nu, na kre ma, pie ti mbe e sisaa pe mbe ni taan. A na e waa pe sɛɛnlɛ yire sumi kie pe pɛlɛ mbe e ŋga.”