5 Na ki pan na wa u yurɛ wa a pe sɛ kahaa, maa sɛ le wa see, ndee u kagbla mu u yirɛ nyjɛ u luu ka, kena ki fna mbe u yirɛ yire fɔlɔ tɔ na wre titi see, ndee u kagbla yirɛ chichiele nyjɛ we ta ni.

6 Na ndro u see sro, a ki waa pan na kanhun kre sɛ le wa see mu wre shɔlɔ nyjɛ u luu, ndee nyjɛ u kun mu tɛɛ nu mu yi sro kre, kena ŋmba u kanhun kre le wre fna mbe yirɛ nyjɛ yi kla yire fɔlɔ tɔ.

7 Na wa u ŋmbrɔ ŋga swa, ndee yira chiriri ka a u tɛɛ, a pe ki ju u pan u katoo, na ki pan na pe juo wre yii, kena ki fna u yira ŋga u ju kre fɔlɔ tɔ ma gbee shiin. 8 La, na pe n juo wre yii, kena ndro ŋmba u yirɛ yire tɛɛ a yi fun wre, pe sɛ na u ni Sumindoo wa, mbe u sɛ yire wa mbe da na wre ma u u ŋmbrɔ wre yirɛ yire wru.

9 Yira ŋga kie fun lewo pan kpan, na nuu wi o, na bubnɔ wi o, na mbɔɔ wi o, na yoŋgo yi o, lewo yira ŋga kie fun u pan a u sɛ ki nya u ŋmbrɔ pan, a wra kakra lii kpan, pe sɛ na leele shiin pre ni Sumindoo. Pe kro shiin, ŋmba Nyiɛkpɔɔ waa wɔ na wre u pimi li wre fna mbe yira kre fɔlɔ tɔ ma gbee shiin mbe u ŋmbrɔ wre ŋga.

10 Na lewo na u ŋmbrɔ paara mu fni, a u u bubnɔ, ndee nuu, ndee mbɔɔ, ndee mu u yurɔ wa nyini shɔ na le, a ki pan na yurɔ wre ku, ndee yira ka nyini yurɔ wre ta sisaa, ndee u u wa a fun, a dansiɛfun wa n wa kee ŋga ki pe kre na, 11 kena ŋmba u yurɔ wre le wre fna mbe sɛ Sumindoo wa, mbe sɛ yire wa mbe da na u n chin yurɔ wre fɔɔn nu. Na ki pan ma, kena yurɔ wre tafun wre fna mbe kee kre u ŋmbrɔ wre yuu kre shɔ mbe li, mbe kee kre ti mbe ki kɔ. Waa shia yurɔ wre fɔlɔ shɔ u pan. 12 La, na ki pan na juu pe yurɔ wre ju, kena ki fna mbe ŋmba u yurɔ wre le wre u fɔlɔ tɔ mbe yurɔfun wre ŋga. 13 A na ki pan na yurɔ sisaa u u yii naa, kena u pan na u kaara kre kɔɔn ni dansiɛrɛ na. Na ki pan ma, ki n fna u yurɔ ŋmba yurɔ sisaa gbo wre fɔlɔ tɔ.

14 Na ndro sɛ u ŋmbrɔ yurɔ jin, a yaka sɛ yurɔ wre ta, ndee na kuu u ku, a yurɔ wre tafun n wa wa mu u nya, kena ki fna u yurɔ wre fɔlɔ tɔ mbe u ŋga. 15 La, na ki pan ma, a yurɔ wre tafun wa wa mu u nya kre, waa shia u fɔlɔ tɔ. A na shɔɔ u u shɔ mbe sɛ tnumu tun mbe swa tɔ mbe yurɔ wre fun ŋga naa, kena mu chin na swa ŋga we tɔ kre we pe yurɔ wre fɔlɔ.

16 Na ki pan na blɔ chlɔ ŋmba pe n wru mu blɔ ŋga kla kre, kena blɔ wre u sɛ chlɔ wre leele nya, mbe yira ŋga ki fna u wɔ mbe pe ŋga wɔ, mbe chlɔ wre wru mbe leŋge. 17 La, na ki pan na pɔ chlɔ wre lɛ je na wa ti u u pɔ wre leŋge kre, kena blɔ wre u pɔ chlɔ wre lɛ ŋga swa ŋga kie na da mbra chlɔ ŋmba u n kla leŋge.

18 Na chlɔ waa na dobodobo woni, ki fna mbe pe u gbo. 19 Lewo blɔ ŋmba we yurɔ cha kpan e u gbo. 20 Lewo ŋmba we sra wɔ mbe yira ka sembremu ŋga, a mi e Tafun Nyiɛkpɔɔ ma kre, e ufun wre gbo.

21 Yaa shia fuŋu pe ndra shelee kee, ndee mbe u fiŋge. E sɔɔnri na fumblɔ na lɛ yire Egypt tra nu. 22 Yaa shia lekuchɔ, ndee bijro pe ndra shelee kee ka. 23 Na e waa pe wa pe kee ka, mi e Tafun Nyiɛkpɔɔ wre we pe nyɛnɛɛ loo, mbe shɔ pe pan, 24 a ni krɔ we kun na e ni, a mbe e gbo ŋunɔ. A e chiɛlɛ we kaari lekuchiɛlɛ, mbe e biile lɛɛlɛ la.

25 Na e wa leele mblɛ pe shia pre wa jin swa kre, yaa shia pe na leele mblɛ pe swa jini pre lɛ, mbe nyumu le ki nu.

26 Na wa yila u fɔlɔ ŋga wa li na mu u yoŋgo shɔ kre, ufun wre ŋga ki yi mbe yila chin mbe to. 27 Ŋgi na hin? Aada na weere kuu, kre chiin yi u tɔ yira, kena yira ŋgi mu chaa u tɔ mbe sni hin? Na maa tia u nyɛni mu ni yeeri mbe shɔ u pan. Ŋgi na hin? Fooro chinfun wi mi.

28 Wa waashia jiɛnlɛ kee ka yo mi e Nyiɛkpɔɔ wre na, a wa waashia ŋunu sun. 29 E na e shɔlɔ, na e simi gbɔ wee, na e simi fa wee teeri e na sra woni e na ni kaan nyjila ŋga ki fna nu. A bibilɛ jle wolo mblɛ ee se pre, e pe wru e ni ŋga. 30 Na wa nuu, ndee mbɔɔ u sijle se blɔ kpan, ni wo wi. Na ki pan ma, u ti u lo jaara ble kɔɔnashin. Ble kɔɔnatarɛ ble kre na, mbe mu u wru mu pan mbe ni ŋga.

31 Ni leele lɛ yire, kena ni yuu e pan na yaa shia yurɔ ŋmba yurɔ sisaa wa gbo mu wa kaara ka. Na e wa ta ma, e u wa nyikaanla pan.