Imi Na Praa Tinlɛ Pini
21
O Tafun Nyiɛkpɔɔ na Moses ŋga yire mbra nyjɛ mbe u Israel leele pre ŋga. 2 Na wa Hebrew ndro lɔ tnu, ki fna u u sumi yɛlɛ kɔɔnanu. Yɛlɛ kɔɔnashin wo kre na, ki fna u u wa kolo mbe u sɛ u lawee finfin, mbe wa yaka tɔ. 3 Na nyjila ŋga ni wra u lɔ kre, na chlɔ n wa u pan, na waa ndru na shie, ki n fna u sɛ na chlɔ ni. La, na wra pan na chlɔ ni, kena na waa ndru na shie ki fna u sɛ na u chɔ wre ni. 4 Na ki pan na u tafun wre chlɔ yii mu u ŋga a u leŋge, mbe biile se mbe u tafun wre ŋga kre, na tnu wre waa na shie, u chɔ wre, na u biile pre we kro mbe pe u tafun wre wolo, mbe u blɔ wre chiin ti mbe u sɛ. 5 La, na ki pan na tnu wre nyu nyaa mu yo na u u tafun wre kori, a u u chɔ wre kori, na u biile mblɛ wre titi se pre ni, ki tia u n na chaa mbe sɛ kre, 6 kena u tafun wre u sɛ na u ni Nyiɛkpɔɔ sumi ndoo wa, mbe tnu wre sɛ yire mbe mbra krɔ bie, ndee krɔ jele kre na, mbe pe u ndie vru, mbe ki ti u pe u tafun wre tnu nyjila ŋga ni uu ŋmaa ni kro nu.7 Na ndro wa waa u pɔ chlɔ prɛ tnu, wre rɛ, pia shia wre wa imi na pe tinlɛ bilɛ pre waa kre. 8 Na pe chlɔ prɛ blɔ pan a u u wru mu leŋge, a u n kɔ na u chaa na kre, kena ki fna mbe u ndru mbe sɛ tnichlɔ wre prɛ mbe u lɛ ŋga, u tafun wre n kolo ni na we u prɛ mbe lefuŋu ŋga. Ŋgi na hin? U chlɔ wre fana. 9 Na ki pan na blɔ chlɔ lɔ mu u pɔ blɔ ŋga a u leŋge, kena wra chlɔ wre le na wre titi pɔ chlɔ wi. 10 Na ki pan na blɔ wa chlɔ shiinwo wru mu leŋge, kena u chɔ jlo wre fna mbe wraa u le imi na wraa u le jle kre, sro na yonyi, na yirɛ nyjɛ wraa u kaan jle yire fna mbe wraa u kaan yi yi ma. 11 Na blɔ wre n shiaa na u chɔ jlo wre pini yire kee yire, kena blɔ wre u u wa kolo mbe u sɛ mbe wa yaka tɔ mbe blɔ wre ŋga.
Linkuuro Mbra
12 Lewo ŋmba we u ŋmbrɔ gbun mbe gbo kpan, ufun fna mbe pe u gbo ka na. 13 La, na ki pan na tuwi ma ufun wre tuwi mu u gbo, ufun wre we jaa fɛɛ sɛ tni lawee ŋga mbe e nyina nu. Na u sɛ wa mu kɔ, ki n fna pe u pe yaka. 14 La, na ndro krɔkun na u ŋmbrɔ ni, a u tuwi mu u gbun mu gbo kre, kena ki fna pe u gbo ka na, hali na u fɛ mu sɛ kaari ni sragbunu kre lawee.
15 Na ndro u lɛ, ndee u lo gbun yira ni kpan, ki fna pe u gbo. 16 Na ndro waa ndro yii jaŋga na mu sɛ u prɛ, ndee mu sɛ u pe tnu kre, ki fna pe u gbo. 17 Ndro ŋmba we u lɛ, ndee u lo sun kpan fna mbe pe u gbo. 18-19 Na ndro na u ŋmbrɔ tuni, a ki pan na wa u ŋmbrɔ fɔɔri dnɛ ni, ndee mu u gbun kaŋgro ni, a u n ku, ufun wre n fna pe u ndie tini. Na ndro ŋmba pe gbun wre n ja mu yiri dɛŋglɛ na, la, mbakɔ na u ja mu kaan yii mu nyaari, kena ndro ŋmba u u gbun a wra yaa wre fna mbe u le mbe sɛ su na we saanla, mbe fɔlɔ ŋga u gbun kro tɔ mbe u ŋga.
20 Na ndro u tnu gbun na kaan ni mu gbo titɛɛ kre nu, na chlɔ wi tnu wre o! Na blɔ wi o. U tafun wre fna pe u ndie tini. 21 La, na ki pan na tnu wre n ku, a u waa nyiŋge se, ndee maa ble shiin li, kena u tafun wre n fna pe u pe yaka, ŋga u wo wi tnu wre kre ndra na.
22 Na bilɛ shiin wii mu sɛ siirefun wa gbun, a ki tia u lɛɛ kre kla, a yaka nsra siirefun wre ta, kena ŋmba u u gbun wre fna mbe pe u gbun fɔlɔ ni, swa ŋga chlɔ wre plɔ we yo na u tɔ kpan, na kala lifɛɛnlɛ pre waa ki nɔɔ loo wala, ki fna u ki tɔ. 23 La, na ki pan na yaka chlɔ wre ta, a u ku, kena ki fna mbe pe ŋmba u u gbun wre, gbo ka na. 24 A na yaka ki chlɔ wre nyibie ta naa, kena ki fna pe ŋmba u u pe ma wre nyibie pe ma na. A na u ŋgaala u gbun mu kɔ naa, ki fna pe ufun ŋgaala gbun mbe kɔ ka na. Na u kɛ na yi, mbe pe u kɛ pe ma na, a na u jele na yi, mbe pe u jele pe ma na. 25 Na sro u u sro naa, mbe pe u sro ka na, a na laala u laala naa, ki fna pe u laala ka na, a na gbuun u u gbun a bawa ja lam naa, ki fna pe u gbun mbe u ja lam na. 26 A na ndro u tnichlɔ ndee u tnu blɔ fɔɔri yira ni nyibie na a ki ja kre, kena u u wa mbe u sɛ u lawee, u nyini ŋga ki ja kre ndra na. 27 A na u ŋgaala u gbun mu kɔ naa, u u wa mbe u sɛ u lawee, u ŋgaala ŋga ki kɔ kre ndra na.
Yurɛ Tafɛɛnlɛ Tnumu
28 Na nablɛm ndro sin mu gbo, ki fna pe u waari dnɛ ni mbe gbo, a ndro waa shia u kaara ka, la, ki n fna pe u tafun wre ndie tini. 29 La, na ki pan na pan nablɛm wre leele sini nyjila kro nu, a pe u tafun wre jaari mu pra, a u n u yii mu le nagbɛɛ, a ki pan na u ndro sin mu gbo kre, ki fna pe nablɛm wre waari dnɛ ni mbe gbo, a u tafun wre fna pe u gbo ka na. 30 La, na ki pan na ndro wre fun we swa tɔ mbe uyɛ ndra lɔ kre, ki fna fɔlɔ ŋga ni pie u gbun kro, mbe u ki tɔ. 31 Na nablɛm wre pɔ blɔ, ndee pɔ chlɔ sin mu gbo chɔɔ, kre kolo kre nunu na ki fna e wru. 32 A na ki pan na nuu tnu blɔ, ndee tnichlɔ sin mu gbo kre, nuu wre tafun fna mbe swa finyi fulo na kɛ tɔ mbe tnu wre tafun ŋga, mbe pe nablɛm wre waari dnɛ ni mbe gbo.
33 Na ndro sɛ kɔlɔ nyu nyaa, ndee na u wee tuu, a u n ki tɔ, a wa nuu, ndee u bubnɔ sɛ to ki nu mu ku, kɔlɔ kre ndee wee kre tuufun wre fna mbe yurɔ wre fɔlɔ tɔ. 34 Ki fna mbe u yurɔ wre fɔlɔ tɔ mbe u tafun wre ŋga, na u chaa, mbe u yurɔ wre bali. 35 Na ndro nablɛm sɛ u ŋmbrɔ nuu sin mu gbo, yurɛ pre tafɛɛnlɛ pre kro shiin fna mbe fni mbe nuu ŋmba u n ku wre prɛ, mbe swa kre yɔɔlɛ, a nuu ŋmba u ku wre chɔɔ, mbe pe u kaara kre yɔ mbe peyɛ ŋga. 36 La, na ki pan na pan nablɛm wre leele yurɛ sini nyjila kro nu, a u tafun wre pieri mu u ti, a u n u le nagbɛɛ naa, kena ŋmba nablɛm u wa wo sin mu gbo wre fna mbe u u fɔlɔ tɔ na nuu le wo ni, kena u ŋmba u ku wre wru.