Mbra Kɛ Yire
20
Nyiɛkpɔɔ na paara, a u kee nyjɛ wra yo yire kro na yi kre mbo,2 “Mi wi e Tafun Nyiɛkpɔɔ ŋmba wra e wɔ mna yili Egypt tra nu kre. Tinlɛ na lɛ yire, a ndaa e wɔ mna yili wa.
3 Kena yaa shia sɛɛn ka sumi, na mi Nyiɛkpɔɔ chiin bɔkɔ.
4 Yaa shia sɛɛnlɛ gbeele mbe yi yirɛ nyjɛ yii wa nyjeeri, ndee mbe yirɛ nyjɛ yii wa tra yiɛ na, ndee mbe nyjɛ yii wa lɔɔ tapan yire wru. 5 Yaa shia suulo sɛɛn ka na ka yiɛ, ndee mbe ki sumi. Ŋgi na hin? Mi wi e Tafun Nyiɛkpɔɔ, a nii yenyjam ni. Leele mblɛ pe ni pra kre ni pe ndie tinii, mbe sɛ su pe biile, na pe nanae, hali mbe su pe nana jelijae, na pre kro biile na. 6 La, mblɛ pe ni kori, na lii ni mbra na kre, ni pe nɔɔ leele kagbenyi kagbenyi nyina ni koroo kre.
7 Yaa shia ni mɛɛ yeeri kewaa ka na. Ŋgi na hin? Mi wi e Tafun Nyiɛkpɔɔ, kena ŋmba we ni mɛɛ yeeri finfin kre, mbe u ndie tini.
8 E li Wuuble kre na, e ki pe cheche. 9 Ni e ŋga ble kɔɔnanu, mbe e tɛɛ mbe tnumu tun, 10 la, ble kɔɔnashin ble kre pe Wuuble mu ni ŋga. Kre ble kre, ndro n fna mbe tnumu tun. E biile, ndee e tinlɛ, ndee e yurɛ, ndee fumblɔ mblɛ yire na pree wa mu tni kro, wa n fna mbe tnumu tun. 11 Ble kɔɔnanu ni mi e Tafun Nyiɛkpɔɔ na tɛɛ mu tra, na nyjeeri, na epo, na yirɛ nyjɛ yii wa yi nu kro gbeele, la, ble kɔɔnashin wo kre na ndaa wuu. Kre ki tia mi e Tafun Nyiɛkpɔɔ Wuuble kre dwan mu ki pe cheche.
12 Mu lɛ na mu lo ŋga buuro, kre kie ti mbe mu ŋmaa tnu tra ŋga ni e kaan kre na.
13 Yaa shia linku kee ka pe,
14 yaa shia leŋgeere kla.
15 Yaa shia ju.
16 Yaa shia kala baa e ŋmbrɔ na.
17 Yaa shia ti e yiɛ nyina e ŋmbilɛ kalonyi na.
Yaa shia ti e yiɛ nyina e ŋmbilɛ chiɛlɛ na, ndee pe tinlɛ na, ndee pe nui na, ndee pe bubunlɔ, ndee pe yirɛ na.”
Fiɛrɛ Na Leele Pre Yii
18 Ŋga leele pre kro na nyiɛtwanraa kre, na bnɔ kre tiŋge loo, mna nya na nyiɛ nyini, a wree na nyua kre tɔ ma kre, fiɛrɛ na pe yii, a pra yire lee na seeri. 19 A pra kna mna yo Moses pan mbo, “Ŋu mu paara o pan mbe o loo. Maa ti mbe Nyiɛkpɔɔ paara na o ni mbe o ku.”
20 A Moses na kna mna yo leele pre pan mbo, “Yaa fiɛ, paan Nyiɛkpɔɔ pan mbe e pe mbe le, mbe ki ti u fiɛrɛ kro e nu mbe yaa sisaa pe.” 21 Nde leele pre na kro mu yire haalee wa, a Moses chiin na flo mu da tlo wɔɔ ŋga nu Nyiɛkpɔɔ na nyi kre na.
Sragbunu Kre Mbra
22 O Tafun Nyiɛkpɔɔ na yo Moses pan mbo, “Yo Israel leele pre pan na, Yire titi nya kolo ŋga na mi e Tafun Nyiɛkpɔɔ wre yire nyjeeri mu paara na e ni. 23 Yaa shia sɛɛn pe na swafiŋge, ndee swanyiɛ ni mbra ki sumi mbe ya mi na. 24 E pooro tɛɛ e sragbunu sin e ni ŋga, e na e mbaala, na e nui sroi e na wejinyiŋge sra woni e na ni kaan. E na sra kre woni lawee ŋga nu mbe e nyina na e na ni sumi kre nu, na ki pe ma, mbe pan mbe e dwan. 25 Na ki pan na ee dnɛ tɛɛ mbe sragbunu sin mbe ni ŋga kre, yaa shia dnɛ nyjɛ pe tɛ tɛɛ mbe ki sin, na e waa ki sin na dnɛ nyjɛ pe tɔɔnrɔ tɛɛ mu tɛ ni, kena e ki tɔ nɛɛrɛ ni, a mba da ki na. 26 Yaa shia sragbunu sin ni pan mbe taan nduuhaa pe ki na mbe ki sɛ nyjeeri, na e ki pe ma, na ndro nduu mbe sɛ ki na, kie u fɛɛrɛ wɔ fimi na.