Mbra Kɛ Yire
5
Moses na Israel leele pre kro yeeri mu ble titɛɛ mna yo pe pan mbo, Israel leele, e mbra nyjɛ ni e nyina aŋga nyjɛ kro loo. E yi tuan, e le na ee li yi na. 2 Sinai nyua kre na o Tafun Nyiɛkpɔɔ wre na nyu nunu pe na o ni, 3 O tolɛɛlɛ pre chiin ni ma wra nyu nunu kre pe, la, wre mblɛ oo wa na le aŋga ŋga kro ni wra ki pe. 4 E yiɛ na o Tafun Nyiɛkpɔɔ wre titi na paara na e ni kanhun kre nu nyua kre na. 5 Kre nyjila kre nu ndaa yire yire na o Tafun Nyiɛkpɔɔ lalaa, mnaa u kee yire shio na yuu e pan, ŋgi na hin? E naa kanhun kre fiɛ, a e nsra sro mbe nduu nyua kre na. Bawa o Tafun Nyiɛkpɔɔ na yo mbo,6 “Mi wi e Tafun Nyiɛkpɔɔ ŋmba ndaa e wɔ mu yili Egypt tra ŋga nu e na pe tinlɛ kre nu.
7 Yaa shia sɛɛn ka sumi mbe ya mi Nyiɛkpɔɔ na.
8 Yaa shia sɛɛn ka gbeele eyɛ pan mbe ki sembremu yaka wru nyiɛ yiɛ na, ndee tra yiɛ na, ndee lɔɔ tapan. 9 Yaa shia suulo sɛɛn ka yiɛ mbe ki sumi. Ŋgi na hin? Mi wi e Tafun, na e Nyiɛkpɔɔ, yenyjamfun wi mi. A ni biile ndie tinii pe lɛɛlɛ mblɛ pe ni je pre sisam na, hali mbe sɛ su pe nanae, na pe nana jelijae kro na. 10 La, leele mblɛ pe ni kori, mu na lii ni mbra na pre, ni pre na pe nɔɔ leele mblɛ pie kɔɔ yiri mbe li ni kee na pre kro kori.
11 Yaa shia ni mɛɛ yeeri kewaa ka na. Ŋgi na hin? Mi e Tafun Nyiɛkpɔɔ wre, mbe ŋmba u ni mɛɛ yeeri kewaa na wre ndie tini.
12 E na Wuuble kre lii, e ki pe cheche, imi na mi e Tafun Nyiɛkpɔɔ yo e pan kre. 13 E ble kɔɔnanu tɛɛ, e na e tnumu kro tuni, 14 la, ble kɔɔnashin ble kre rɛ, Wuuble yi mu mi e Tafun Nyiɛkpɔɔ wre ŋga. Kre ble kre, ndro wa waa shia tnumu ka tun. Yire na e biile, na e letaala, na e yurɛ kro, na fumblɔ mblɛ pe yiri waŋgra ka nu mu pan mu tni e tra nu kro, wa waa shia tnumu ka tun, mbe ki ti e letaala pre wuu, imi na e wuui kre. 15 E sɔɔnri na tinlɛ na lɛ yire Egypt tra nu, a mi e Tafun Nyiɛkpɔɔ wre, na ni faŋga, na ni jaŋga kpɔɔ kre tɛɛ, mna e wɔ wa. Kre ki tia mi e Tafun Nyiɛkpɔɔ wre, na yuu e pan na, e na Wuuble kre lii kre.
16 E na e loolo, na e lɛɛlɛ kaan buuro, imi na mi e Tafun Nyiɛkpɔɔ wre yo e pan kre, mbe ki ti e ŋmaa tnu, mbe kee ŋga e pini kro, nyu mbe e ŋga, tra ŋga ni e kaan kre nu.
17 Yaa shia linkuuro kee pe.
18 Yaa shia leŋgeere kla.
19 Yaa shia ju.
20 Wa waa shia kafinɛ dansiɛrɛ li, mbe u tnifun taan.
21 Wa waa shia ti mbe u ŋmbrɔ chɔ kee pe niŋge ni u pan, a wa waa shia ti mbe u yiɛ nyina u ŋmbrɔ katoo, ndee u tra, ndee u tnu, ndee u nuu, ndee u bubnɔ, ndee yira ŋga ki pe u wo kro na.”
22 Yire mbra nyjɛ o Tafun Nyiɛkpɔɔ wre na mana kpɔɔ tɛɛ mna yi kpali a e kro na loo, nyjila ŋga ni wraa paara kanhun kre nu nyua kre na, a tlo wɔmu kprikpri na u tɔ kre, yire mbra nyjɛ wra e ŋga, u nsra yaka yo mu yi na. A wra yi nyunɔ dnɛ kpaflɛ shiin yɛ na mna ni ŋga.
Fiɛrɛ Na Leele Pre Yii
23 Ŋga kanhun na nyua kre yii poŋgo, a e na mana kre loo mu yili wɔmu kprikpri kre nu kre, e yɛkulo mblɛ praa wa e jlom yire na pre kro, na e loplombo pre na pan, 24 mna yo ni pan mbo, “O Tafun Nyiɛkpɔɔ wre o nyina u kpɔɔmu, na u yɛnyiŋge, a o u mana loo kanhun kre nu. Aŋga o chin na, jaa na Nyiɛkpɔɔ paara ndro ni we ŋmaa ta.
25 Yira ŋgi kie ti mbe o pna na kumu ni na hin? Kre kanhun kpɔɔ ŋga nyini wra ja mbra o kla, o chin na, na o o Tafun Nyiɛkpɔɔ wre mana loo na oo ku peii. 26 Lewo na nyjuro ŋmbi u da mu Nyiɛkpɔɔ ŋmba uu wa nyjila kro nu wre mana loo kanhun nu, na wre lɛ, mu ŋmaa ta tun hin? 27 Kena Moses, ndru mu sɛ kee nyjɛ o Tafun Nyiɛkpɔɔ wre yuu yire kro loo mu pan mu yi yo o pan, oo ndie tɛɛ kee yire na, mbe li yi na.”
28 Ŋga e naa kee yire yuu ni pan kre, o Tafun Nyiɛkpɔɔ na yi loo, a wra yo ni pan mbo, “Ni kee nyjɛ leele mblɛ yo mu pan yire loo, kee nyjɛ pe yo yire kro nyu. 29 Na ki pe na pan pie na kee ŋga pe yo ŋga jawa mbra ni fiɛ, mbra li ni mbra nyjɛ na kro nyjila kro nu, kee kro wra nyu mbra pre na pe biile kro ŋga nyjila kro nu.
30 Sɛ yo pe pan na pe ndru mbe sɛ pe yonyi nyinyi yire nu. 31 La, ŋu Moses we ndru mbe pan ni jaara mna, mbe ni mu ŋga ni mbra yire kro, mbe mu sɛ pe nyina yi yi, mbe pe li yi na, tra ŋga ni pe kaan mbe pe sɛ tni kre nu.”