5 E le, ni e nyina mbra yire kro, imi na ni Tafun, ni Nyiɛkpɔɔ wre yo ni pan kre, mbe e li yi na tra ŋga na e shie mbe sɛ tni kre nu. 6 E li yi na kpra ni. Ŋgi na hin? Yire yie ti mbe waŋgrɛ yire leele pre chin na ee kachindɛ, na nɔɔloo ni. Na pe yire mbra nyjɛ kee loo mbe praa yuu na, ‘Sena kre waŋgra ŋga nyini leele yiri na kachindɛ, na nɔɔloo ni ma ŋga hin?’”

7 A yire titi kuraa we na yuu na, kre waŋgra n wa, a imi nyini pe jaŋga da kpan, a pee wa na sɛɛn ka ni, a ki mbra pe na mu da imi na o Tafun Nyiɛkpɔɔ wre mbra o na ŋga. A na o u yeeri kpan u ndru o pan. 8 A waŋgra ŋgi kii wa haka, imi na pe jaŋga da kpan, a pee wa na mbra nyjɛ yi fraka ni mu wɛ nyjɛ ni e kaan aŋga nyjɛ na hin? 9 E dɔɔta. E eyɛ le chichie, mbe yaa shia kee nyjɛ e nya nyiɛlɛ ni ŋga fɛɛ, ndee mbe yi waa yili e jawala nu nyjila ŋga ni ee wa ŋmaa ni ŋga. E e biile, na e nanae nyina yire mbra nyjɛ, hali mbe sɛ su pe kro wolo na. 10 E ŋga ble e na yire o Tafun Nyiɛkpɔɔ wre yiɛ, nyua Sinai na kre sɔɔnri, bawa wra yo ni pan mbo, “Ti mbe leele pre pan mbe ble ni yiɛ mbe ni paara pe pan mbe pe loo, mbe ki ti pe tuan mbe ja li ni mbra yire na nyjila ŋga ni pee wa mu tni tra kre nu ŋga, mbe pe pe biile nyina yi yi.”

11 Ŋga kre pan ma kre, e na flo mu da nyua kre jaara, a kraa nyini kanhun na shie nyjeeri, a ki wree na pe na tloe yi mu wɔ. 12 A o Tafun Nyiɛkpɔɔ wre na paara na e ni kanhun kre nu. E naa kee nyjɛ u yuu yire ndru, la, e nsra u kumu nya, u mana chiin e naa ndru. 13 A wra u nyu nunu ŋga wra pe na e ni kre kee yo e pan, mna e nyina u mbra kɛ nyjɛ wra nyunɔ dnɛ kpaflɛ shiin na, mbe e taa yi na kre. 14 A kre nyjila kre o Tafun Nyiɛkpɔɔ wre na yo ni pan na ni e nyina u mbra yire, na u kee nyjɛ na ee taa, na e Jordan lɔɔ kre kun mbe sɛ tra kre wru mbe tni tni kre.

15 Ŋga o Tafun Nyiɛkpɔɔ naa paara na e ni Sinai nyua kre na kanhun nu kre, e n na u kumu nya. Kena e eyɛ le chichie, 16 mbe yaashia punu mbe sɛɛn ka na ki nyini pe mbe ki sembremu pe na lewo blɔ, ndee chlɔ wi, 17 ndee mbe ki pe na puɛ yurɔ wi, ndee mbe pe na hanyini wi, 18 ndee mbe ki pe na yurɔ ŋmba u fulo gbun na wi, ndee na mbro wi. 19 A na e waa yiɛ wa mu le nyjeeri, maa yila, ndee nyiɛpɔ, na wɔɛlɛɛ nyjɛ yii wa nyiɛ yiɛ na nya kre, yaa shia ti mbe yi e jawala tini mbe e sɛ kosie kan mbe yi sumi. Yire yirɛ yire o Tafun Nyiɛkpɔɔ wre u yi wa, a waŋgrɛ yire leele na yi sumi tra ŋga nu. 20 La, yire rɛ, o Tafun Nyiɛkpɔɔ wra e wɔ mu yili wejiwrɛ kpɔɔ nu Egypt tra nu, na e pan mbe pe u leele imi na e nyi ŋga.

21 A yire ndra na, o Tafun Nyiɛkpɔɔ wre krɔ na kun na ni ni, a wra da na wa ti mbe ni Jordan lɔɔ kre kun mbe le tra taan ŋga u e kaan na krɔ yira yi kre nu. 22 Ki tia mbe ku Jordan lɔɔ kre kokoo ŋga na mna, mbe lɔɔ kre ku, la, yire paan mbe ki kun mbe sɛ tra taan kre wru mbe tni. 23 E dɔɔ ta mbe yaa shia nyu nunu ŋga e Tafun Nyiɛkpɔɔ wre na pe na e ni kre fɛɛ. Yaashia sɛɛn ka gbeele mbe ki kumu yirɛ nyjɛ yi pe e Tafun Nyiɛkpɔɔ wre pan afuŋgo yirɛ yire ka wru. 24 Ŋgi na hin? E Tafun Nyiɛkpɔɔ wre, kanhun ŋga ki yirɛ shio wi, a Nyiɛkpɔɔ yenyjamfun wi.

25 Na e waa tni tra kre nu mu mu, maa biile, na nanae ta, a e waa punu maa sɛ sɛɛnlɛ yɛ nyini pe, maa na sisam kee pini o Tafun Nyiɛkpɔɔ wre yiɛ na, maa tia krɔ waa u kun na e ni, kena yire e ki cha. 26 Na ki waa pan ma, ni yuu e pan aŋga na nyjeeri na tra we dansiɛrɛ li mbe e taan, a kia mu mbe e ku mbe fun tra ŋga e Jordan lɔɔ kre kuun mbe sɛ wru mbe tni kre nu. Na ki waa pan ma, yaa tni tra kre nu mbe mu, Nyiɛkpɔɔ we e kla. 27 A o Tafun Nyiɛkpɔɔ wre we e gbun mbe nyina waŋgrɛ yire nu, a waŋgrɛ nyjɛ nu Nyiɛkpɔɔ we e ni mbe sɛ kre, e chiɛri plɛ ee kro mbe tni mbe chaa pe nu. 28 Bawa ee na sɛɛnlɛ nyjɛ lewo pe kɛ ni yire sumi, tinyi na dnɛ ni pe yi pe, yira nya, a yira loo, yira sro li, a yira yaka ndiom loo. 29 La, na e waa yire wa maa e Tafun Nyiɛkpɔɔ wre haa cha na e loloŋgo kro ni, maa tia e nyiɛ u haa cha kre, ee u nya. 30 Na yire kanyana kee nyjɛ kro waa e da, a e waa yire kee nyjɛ krɛrɛ nya, kre kɔkro ee chiin kna mbe taa e Tafun Nyiɛkpɔɔ wre na, mbe ndie tɛɛ u pan. 31 Ŋga o Tafun Nyiɛkpɔɔ wre pe fooro chinfun kre na, wa e wa, ndee mbe e kla, ndee mbe u nyu nunu ŋga wra daŋga tɛɛ mna pe na e tolɛɛlɛ ni kre fɛɛ.

32 E fafa ble nyjɛ yi tro yire kee wie, nyjila ŋga ni pe nsra ta mu e se kre na ni nyi, mu yire ble ŋga na Nyiɛkpɔɔ na lewo faanri mu wa tra ŋga na kre, e wie tra ŋga kro nu e tro. Kekpɔɔ ka da mu pe na ŋga yi tun ra? Ndee ndro da mu kee nyjɛ ka loo na ndie ni tun ra? 33 A leele plɛ da mu Nyiɛkpɔɔ mana loo kanhun nu, mu ŋmaa ta, imi na e u mana loo mu ŋmaa ta ŋgaa? 34 Kena sɛɛn ka da mu sɛ sele nunu ka wɔ waŋgra ka nu mu pe pe ki leele, mu penlee, na kawako kee pe, mu ŋunɔ wi, mu ki jaŋga nyina, mu kekpɔɛ nyjɛ yii fiɛrɛ ni pe, a yi da na kee nyjɛ o Tafun Nyiɛkpɔɔ na pe mu e ŋga Egypt tra nu, a e na yi nya kre nii?

35 O Tafun Nyiɛkpɔɔ wre na yire kee nyjɛ krɛrɛ pe, a e na yi nya, imi kie pe mbe e chin na o Tafun Nyiɛkpɔɔ wre nunu chom wi Nyiɛkpɔɔ, a wa n wa u kro na. 36 Wra tia e na u mana loo mu yiri nyjeeri, a wra yire ki na mu e fraka. Wra tia e na u jaŋga kanhun kre nya tra ŋga na, a e na u paaraa loo kanhun kre nu. 37 Ŋga wra e tolɛɛlɛ pre kori kre ndra na, a yire lɛ pe nanae, a wre yire u jaŋga kpɔɔ kre na mna e wɔ mu yili Egypt tra nu, 38 mna waŋgrɛ nyjɛ yiraa jaŋga, na faŋga ni mu wɛ e na yire ni e yiɛ, mna pan na e ni pe tra nu, mbe pan mbe e ŋga ki yi na krɔyira yi imi na ki nyi aŋga ŋga. 39 Yire titi, e jawa e chin na o Tafun Nyiɛkpɔɔ wre, nyjeeri na tra ŋga kro Nyiɛkpɔɔ wi, a wa n wa u kro na. 40 Kena e li u mbra, na u nyu kee nyjɛ ni e kaan aŋga ble ŋga nu ŋga na, mbe ki ti mbe kee kro nyu mbe yire na e biile mblɛ pie yiri e kro kre ŋga, mbe ki ti e ŋmaa tnu tra ŋga o Tafun Nyiɛkpɔɔ wre e kaan kre nu nyjila kro nu.

41 Moses na kakpɔɛ taarɛ yɛ wɔ Jordan Lɔɔ kre yilafin haa, 42 kena na ki pan na ndro punu mu o ŋmbrɔ gbo, a tuwi ma u tuwi, a loŋgooro kee ka ma kii wa pe lalaa kre, kena linkufun wre we jaa fɛ mbe sɛ tni yire kakpɔɛ yire ka na, mbe ŋmaa li. 43 Yire kakpɔɛ yire na yi, Bezer, kre naa wa tablɔ tra kre nyua ndra mbrɛrɛ ka nu, a kre na yi Reuben jlom wolo fɛnkaari haa. A Gad jlom kre fɛnkaari haa na yi Ramoth ŋga kraa wa Gilead tra nu kre. A Manasseh jlom wolo pre fɛnkaari haa na yi Golan ŋga kraa wa Bashan tra nu kre.

44 Moses na Israel leele pre nyina Nyiɛkpɔɔ mbra yire. 45 Ŋga pra yili Egypt tra nu kre, kre Moses na pe nyina mbra yire, na kee nyjɛ pe fna mbra pini, 46 kre nyjila kre, na pe da landɛɛ ka nu Beth Peor mbɛɛ na Jordan lɔɔ kre yila fin haa, Amora ŋunu Sihon ŋmba wraa ŋunumu lii Heshbon na wre tra nu na yi. A Moses na Israel leele pre na wi na u ni mna u ja, nyjila ŋga nu pra yili Egypt tra nu kre. 47 Pra wi mu u tra kre shɔ, kre na Bashan ŋunu Og tra ni kro, pre ŋulo shiin pre kro Amora ŋulo na lɛ, a praa wa Jordan lɔɔ kre yila finhaa wa. 48 Kre tra kre na yire chia ŋga praa yeeri Aroer, a kraa wa Arnon lɔɔ landɛɛ kre nyjeeri haa, mu sɛ su nyua Hermon kre nyjeeri haa. 49 Tra kre naa wa mu sni mu sɛ yili Jordan lɔɔ kre yila finhaa, mu yire wa mu su yili epo weŋge wo kre tapan haa, mu sɛ su nyua Pisgah kre jaara.