Israel Leele Na Wi Mu//Bashan Ŋunu Og Ja
3
Ŋga o na wi wa mu kɔ kre, a o na kna mna yiɛ le nyjeeri haa na shie Bashan na, a Bashan ŋunu Og na u leele kro na pan mu o fni mna wi na o ni chia ŋga praa yeeri Edrei kre lawee yire nu. 2 A o Tafun Nyiɛkpɔɔ wre na yo ni pan mbo, “Maa shia u fiɛ, ni wre na u leele, na u tra kre kro le e kɛɛ. Imi e na Sihon Amora ŋunu ŋmba wraa ŋunumu lii Heshbon na wre pe kre, e u pe ma na.”3 A o Tafun Nyiɛkpɔɔ wre na Bashan ŋunu Og, na u leele pre le o kɛɛ, a o na pe gbo peii, o nsra wa ti. 4 Kre nyjila kre nu o na wi mu pe chiɛ yire kro shɔ peii. Pe kakpɔɛ fuloe taarɛ nyjɛ yiraa wa Argob tra ŋga Bashan ŋunu Og naa le yire ka nsraa wa a o n na ki shɔ pe pan. 5 Yire kakpɔɛ nyjɛ kro, pra mboo gedenyi sin mu yi fɛ mu kun. A jlonwee nyu krɔɛ naa wa yi na, mna kɛɛn paari yi kro. A yi kabɛɛlɛ yire yɛ naa wa tataara mna a pe nsra mboe sin mu yire fɛ mu kun. 6 O na yire chiɛ yire kro kla, imi o na Heshbon ŋunu Sihon chiɛ yire pe kre, o na pe bilɛ, na chiɛlɛ, na biile mblɛ praa wa yi na kro kla kro. 7 La, pe katoo yurɛ, na yirɛ nyjɛ yiraa wa chiɛ yire na kro, o na yi foolo mu ta.
8 Kre nyjila kre, o na tra ŋga kii wa Jordan lɔɔ kre yila finhaa kre shɔ Amora ŋulo shiin pre pan, mu yire Arnon lɔɔ kre na, mu sɛ su Hermon nyua kre na na shie nyjeeri haa. 9 Kre nyua Hermon kre Sidon leele yeeri Sirion, a Amora leele naa ki yeeri nyua Senir. 10 O na kakpɔɛ nyjɛ yiraa wa nyua ndra lalaa tra mbrɛrɛ na yire kro shɔ, na Gilead, na Bashan tra yire kro, hali mna sɛ su Salecah, na Edrei na, yire chiɛ nyjɛ Bashan ŋunu Og chiɛ na yi.
11 Rephaim legbakrɛ pre haŋu na wi Bashan ŋunu Og. Tɔɔnrɔ ni pra u mpa pe, a ki titnɔmu naa fiiti kɛmbɔjijirɛ, a ki valam na pe fiiti kɔɔnanu. Hali kii wa Ammon kakpɔɔ Rabbah kre na mu pan mu su aŋga na.
Sele Nyjɛ Yira Tni Jordan Lɔɔ//Kre Yila Finhaa
12 Nyjila ŋga nu o na tra kre shɔ mu kɔ kre, ndaa Reuben na Gad jlom yire ŋga tra ŋga kraa wa na shie Aroer nyjeeri haa, mu mbra Arnon lɔɔ na kre, na Gilead tra kre yɔɔ, na ki seechiɛ yire kro ni. 13 A ndaa Manasseh sele yɔɔ kre ŋga Gilead tra yɔɔ haŋa kre, na Bashan tra ŋga ŋunu Og naa le kre kro. Kre Argob tra ŋga kraa wa Bashan na kre, leele mblɛ praa yeeri Rephaim pre tra na yi. 14 Blɔ ŋmba praa yeeri Jair, a wra yiri Manasseh jlom na wre wra Argob tra ŋga pe yeeri Bashan tra kre kro ta. Hali mu yire wa mna sɛ su Geshur leele, na Maacah leele samu na. Wra u mɛɛ taa chiɛ nyjɛ yire na kro, hali mu pan mu su aŋga na, pee wa na yi yeeri Havvoth-Jair.
15 A ndaa Gilead tra kre wru mu Makir ŋmba u yiri Manasseh jlom na wre ŋga. 16 Tra ŋga ndaa Reuben, na Gad jlom yire ŋga kre, na yire Gilead tra kre na mu sɛ su Amon lɔɔ kre nyu na, pe tapan haa sam na sɛ su lɔɔ kre lalaa, a pe nyjeeri haa sam naa wa mu sɛ su Jabbok lɔɔ kre na, a bawa na yi pre na Ammon leele sam. 17 A mu sɛ yila to haa, pe samu kre na su Jordan lɔɔ kre na, mu yire Galilee tapla nyjeeri haa, mu sɛ su weŋge epo kre na tapan haa, mu yire wa mu sɛ su nyua Pisgah jaara na shie yila fin haa.
18 Kre nyjila kre nu ndaa yo e pan na, “E Tafun Nyiɛkpɔɔ wre e ŋga kre tra ŋga mbe e ki wru mbe tni. La, e ti mbe ŋunɔwifɛɛnlɛ mblɛ pee wa e nu pre peyɛ kna, mbe Jordan lɔɔ kre kun mbe yiɛklu Israel jlom hɛnyi yire pan mbe wi mbe ya pe na mbe pe pe tra ta tun. 19 Ni chin na ee wa pɔɔri yurɛ ni tataara, la, e pre na e chiɛlɛ, na e biile ti chiɛ nyjɛ ni e ŋga yire na, 20 mbe sɛ su na o Tafun Nyiɛkpɔɔ wre we e wolo pre ŋga lawee, imi na u e pe ŋga, na pe waa tra ŋga we pe ŋga Jordan lɔɔ kre kro kre ta mu kɔ, mbe e ndru mbe pan e trɛ nyjɛ ni e ŋga yire na.”
21 Kre nyjila kre ndaa yo Joshua pan na, “Kee nyjɛ o Tafun Nyiɛkpɔɔ wre pe ŋunu Sihon, na ŋunu Og na yire, mna yi nya nyini ni. Pan chɔɔ e Tafun Nyiɛkpɔɔ wre we ŋulo mblɛ trɛ nu e shie ŋga pe na. 22 Yaa shia pe fiɛ, e Tafun Nyiɛkpɔɔ wre we wi mbe e ŋga.”
Moses Jele Nsra Taan Canaan Tra Na
23 Kre nyjila kre nu ndaa o Tafun Nyiɛkpɔɔ tali na, 24 “O Tafun Nyiɛkpɔɔ Jaŋgafun, mu nɔɔhle mu tia mu sumifun na mu kpɔɔmu, na mu jaŋga nya. Sɛɛn ŋgi kii wa nyjeeri, ndee tra ŋga na mbe jaa kekpɔɛ nyjɛ mu pe nyjɛ ka pe hin? 25 Jande, o Tafun Nyiɛkpɔɔ, ti mbe ni Jordan lɔɔ kre kun mbe sɛ tra taan kre nya, kre Lebanon nyuɛ chiɛ chichiele yire.”
26 La, e ndra na, o Tafun Nyiɛkpɔɔ krɔ na kun na ni ni, a u nsra ndie tɛɛ ni pan, a mna yo mbo, “Ki yila ma! Maa shia ti ni kre kee ŋga loo mu nyu na na! 27 Nduu mu sɛ nyua Pisgah ndra na mu sɛ yire wa mu mu yiɛ wa mu fɛ mu kun. Ŋga ma Jordan lɔɔ kre kun kre ndra na, tra kre le na nyini ni chichie. 28 La, Joshua wɔ mu leele pre nyina, mu u le gbeŋmbaa, na faŋga. Ŋgi na hin? Wre we yiɛklu na leele pre ni, mbe pe Jordan lɔɔ kre kun mbe sɛ tra ŋga mu nya kre wru mbe tni.”
29 Yire kee nyjɛ kɔkro o na mu Beth Peor landɛɛ kre nu.