2 A o Tafun Nyiɛkpɔɔ na yo ni pan mbo, 3 “E vile mu kun kre nyua lawee ŋga nu mu mu titi, kena e yiri e yiɛ le nyjeeri haa.” 4 A wra ndru mu yo ni pan mbo, “Yo leele pre pan na e sele leele Esau nanae mblɛ pee wa mu tni nyua Edom kre lawee kre tra nu ee sɛ tro kre. Pie na e fiɛ, la, e pe dɔɔta. 5 Yaa shia pe cha kakrɔ mbe e wi. Ŋgi na hin? Mba e ŋga pe tra kre ka. Esau na u nanae ni ŋga nyua Edom lawee tra kre. 6 Sro ŋga ee li, na nyumu ŋga ee gbɔ pe tra kre nu kro fna mbe e ki fɔlɔ tɔ mbe pe ŋga.”

7 E sɔɔnri imi na e Tafun Nyiɛkpɔɔ wre e dwan e kɛ nyu tnumu kro nu. Wre u e le mu nyaari na e ni tablɔ tra vankam kre nu. Yɛlɛ fuloe shiin nyjɛ krɛrɛ nu, yire na wre wi, a u n tia yaka e shian.

8 A o na o sele wolo Esau nanae mblɛ praa wa Edom nyua kre lawee kre tro. Mna kolo ŋga ki tro Jordan landɛɛ kre nu mu sɛ Elath, na Ezion-Geber na kre wru mna tro tablɔ tra kre nu mu sɛ Moab tra nu kre yii. 9 A o Tafun Nyiɛkpɔɔ na yo ni pan mbo, “Yaa shia Moab leele mblɛ lɛ Lot nanae pre tɔɔra, ndee mbe pe cha kakrɔ mbe yire na pre wi. Ŋgi na hin? Mba e ŋga pe tra kre ka. Lot nanae pre ni ŋga Ar tra kre mbe ki pe pe wo.”

10 Emi leele legbakrɛ faŋgafɛɛnlɛ tataara mblɛ pra gede gede na Anakim leele lɛ pre praa wa mu tni wa fa. 11 Imi na Emim leele pre na pe na Anakim pre lɛ kre, ki tia praa pe yeeri Rephaim leele. La, Moab leele naa pe yeeri Emi leele. 12 Fa kre na Hori leele pee wa mu tni Edom tra kre nu, la, Esau nanae pre na pe ni wa, mna pe kla mna pe tra kre shɔ mu tni. Imi Israel leele na tra ŋga o Tafun Nyiɛkpɔɔ na pe ŋga kre leele pe mna ki shɔ mu tni kre.

13 A o Tafun Nyiɛkpɔɔ na yo mbo, “E yiri e Zered lɔɔ kre kun,” A o na yiri mna lɔɔ kre kun mu le Moab tra nu. 14 Ŋga o na yili Kadesh Barnea na kre, ki yɛlɛ fulo na kɛmbɔkɔɔnatarɛ wo na o na Zered lɔɔ kre kun. Kre nyjila kre, na yɛkɔɔnlɔ mblɛ praa wa o nu na wii kre krɛrɛ, na pe ku ku peii imi o Tafun Nyiɛkpɔɔ na u danyi da mna ki yo pe pan kre. 15 O Tafun Nyiɛkpɔɔ wre na yiri mu pe taan, mna sɛ su na wra pre leele pre kla peii mu yili o nu.

16 Ŋga pre wifɛɛnlɛ pre hamblɛ na ku mu kɔ kre, 17 A o Tafun Nyiɛkpɔɔ wre na yo ni pan mbo, 18 “Aŋga ee Ar kakpɔɔ kre tro, mbe sɛ Moab nyjeeri haa sam kre kun. 19 Na e waa da Ammon leele mblɛ lɛ Lot nanae pre na. Yaashia pe tɔɔra, ndee mbe pe cha kakrɔ mbe tun na pe ni. Ŋgi na hin? Mba e ŋga tra ŋga ni pe ŋga kre ka. Pre ni ŋga ki yi na pe wo yi.” 20 Kre tra kre chɔɔ Rephaim leele praa wa wa fa, la, Ammon leele pre na pe yeeri Zamzummim leele. 21 Pra nɛɛ mna sheli sheli mna gede gede na Anakim leele pre lɛ. La, o Tafun Nyiɛkpɔɔ wre na pe kla Ammon leele pre yiɛ, mna tia pra pe ni mna tra kre wru mu tni. 22 Pan O Tafun Nyiɛkpɔɔ wre na Hori leele mblɛ praa wa mu tni Edom tra nu pre kla Esau nanae pre yiɛ. Wra tia pra leele pre ni mna tra kre wru mu tni, hali mu pan mu su aŋga na. 23 Avvite leele pra wa mu tni Mediterranean epo kre nyu na fa, a Caphtor leele na sɛ pe kla, mna pe tra kre shɔ mu tni, hali mu yire wa mu sɛ su Gaza na.

24 Ŋga o na Moab tra kre nyu tro mu kɔ kre, a o Tafun Nyiɛkpɔɔ na yo o pan mbo, “Fuŋga rɛ, e yiri e Arnon lɔɔ kre kun. E le, ni Amora ŋunu Sihon ŋmba Heshbon na wre, na u waŋgra kre kro le e kɛɛ. E sɛ wi na u ni, e u tra kre bali e tni. 25 Mu yire aŋga na shie, mbe ti leele mblɛ pee wa waŋgrɛ nu tra ŋga yiɛ na kro na e fiɛ kpɔɔ. Pie e kee loo, mbe tutom wo pe na mbe praa seeri.”

26 Ŋga o na da Kedemoth tablɔ tra kre nu, a ndaa leele tun Heshbon ŋunu Sihon pan na kre wejinyiŋge kee ŋga ni na, 27 “Jande Ti mbe o tro mu tra ŋga nu. Kolo oo wru mbe fraka mbe sɛ, waa chiɛn mbe tro kamɛŋɛ ndee kalie. 28 Sro ŋga oo li, na nyumu ŋga oo gbɔ kro, yi prɛ o pan, oo yi fɔlɔ tɔ. Kee ŋga o chaa kro yi na, oo nyaari mbe tro mu tra kre nu. 29 Imi na Esau nanae mblɛ pee wa Edom tra nu, na Moab leele mblɛ pee wa Ar na kre o pe, mu sɛ su na o Jordan lɔɔ kre kun mbe sɛ tra ŋga o Tafun Nyiɛkpɔɔ we o ŋga kre nu kre, jande o pe ma.”

30 La, Heshbon ŋunu Sihon na je na wa ti mbe o tro. Ŋgi na hin? E Tafun Nyiɛkpɔɔ wre na tia u ndie na kan, a wra u loloŋgo sheli imi kie pe mbe u u le e kɛɛ, imi na u ki pe fuŋgaami ŋga.

31 A o Tafun Nyiɛkpɔɔ na yo ni pan mbo, “Le, ni ŋunu Sihon na u tra kre le e kɛɛ aŋga, e sɛ wi na u ni, e u tra kre shɔ e tni.” 32 Ŋga ŋunu Sihon na u ŋunɔ wifɛɛnlɛ kro na yili mbe paan wi na o ni chia ŋga praa yeeri Jahaz kre lawee kre, 33 O Tafun Nyiɛkpɔɔ wre na ŋunu Sihon, na u bibilɛ, na u leele kro le o kɛɛ, a o na pe gbo peii. 34 Kre nyjila kre nu o na wi mna u chiɛ yire kro kla. Bilɛ, na chiɛlɛ, na biile kro, o na pe gbo peii, o nsra wa ti. 35 O na pe katoo yurɛ, na yirɛ nyjɛ yiraa wa pe chiɛ yire na kro foolo mu bali. 36 O Tafun Nyiɛkpɔɔ wre na ya o na a o na chia ŋga kraa wa mu yire Aroer na, mu sɛ su Arnon lɔɔ kre landɛɛ nu kre, na chia ŋga kre wa landɛɛ kre tapan haa yire kro ja, hali mu sɛ su Gilead na, chiɛ yire ka nsraa wa mna o nyu kan, o Tafun Nyiɛkpɔɔ na pe kro le o kɛɛ. 37 La, o nsra sɛ Ammon leele tra, ndee Jabbok lɔɔ kre nyu na, ndee chiɛ nyjɛ yiraa wa nyambie na yire ka na, o Tafun Nyiɛkpɔɔ na u jaari na waa shia sɛ yi ka na.