Israel Leele Na Canaan Leele Ja
21
Canaan ŋulo pre wa na yiri Arad na, a wraa wa mu tni Negev tablɔ tra kre nu. Ŋga wra loo na Israel leele Atharim kolo kre yii na paan kre, wra sɛ wi na pe ni, mna pe plɛ yii. 2 Ŋga kra pan ma kre, Israel leele pre na da mu o Tafun Nyiɛkpɔɔ nyina mbo, “Na maa tia o wi mu leele mblɛ ja kre, oo pre na na pe chiɛ yire kro kro kla, waa yaka ti.” 3 O Tafun Nyiɛkpɔɔ na Israel leele pre talaa loo, mna Canaan leele pre le pe kɛɛ. A pra pe kla peii, na pe chiɛ yire ni kro, a ki tia pra lawee kre mɛɛ tɛɛ Hormah.4 Israel leele pre na yiri nyua Hor kre lawee mna epo nyiɛ kolo kre yii, mna Sɛ Edom tra kre fɛ mu kun. Ŋga praa shie kre, pe n na frɔ ta. 5 Pra paara mna Nyiɛkpɔɔ na Moses taan mbo, “Mni a e o wɔ mu yili Egypt tra nu, mbe o paan ku tablɔ tra ŋga nu finfin ŋga hin? Sro ma kii wa, a nyumu n wa mna, a o n ja na sro nyjɛ nyini lii kple.” 6 A Nyiɛkpɔɔ na tia wɔɔlɔ sisɛɛ na le pe nu, mna pe niɔ, a pe tataara na ku. 7 A leele pre na pan Moses pan mbo, “O sisaa pe na o paara mu ŋu na o Tafun Nyiɛkpɔɔ taan. O Tafun Nyiɛkpɔɔ wre tali mbe u wɔɔlɔ mblɛ wɔ mbe yili o nu.” A Moses na Nyiɛkpɔɔ tali mna pe ŋga. 8 A o Tafun Nyiɛkpɔɔ na yo Moses pan mbo, “Tɔɔnrɔ fre tɛɛ mu wɔɔ pe, mu u hlu kaan na nyjeeri, ŋmba wɔɔlɔ pre wa we nu, a ufun ja mu yiɛ yire mu swafre wɔɔ wre le kre, we ŋmaa ta.” 9 A Moses na swafre tɛɛ mna wɔɔ gbeele, mna u gɔli kaan na nyjeeri. Ndro ŋmba wɔɔlɔ pre wa na nu, a wra ja mna yiɛ yire mu swafre wɔɔ wre le kro, na ŋmaa ta.
10 Israel leele pre na yili Oboth na. 11 Ŋga pra yiri Oboth na kre, a pra sɛ tni Abarim kajaa kre lawee tablɔ tra ŋga kra yiɛ kan Moab na kre nu na shie ki yila finhaa. 12 Ŋga pra yiri wa kre, a pra sɛ tni Zered landɛɛ kre nu. 13 Ŋga pra yiri wa, a pra sɛ Arnon lɔɔ kre mbɛɛ na, kraa wa tablɔ tra ŋga kra sɛ to Amora leele tra nu kre. Arnon lɔɔ kre na yi Moab na Amora leele pre sam 14 Kre ki tia pe nyunɔ Nyiɛkpɔɔ Ŋunɔ Hlɛ kre nu kre mbo,
“Waheb ŋga kii wa Suphah tra,
na Arnon lɔɔ kre mbɛɛ na,
15 na landɛɛ ŋga ki sɛ to Ar na,
na shie Moab tra sam na,
mu sɛ yili chia ŋga pe yeeri Ar na,
mu na shie Moab tra sam na kre.”
16 Bawa pra yiri mna sɛ Bloe lawee kre nu, bawa o Tafun Nyiɛkpɔɔ na yo Moses pan mbo, “Leele pre fni titɛɛ, mbe ni pe ŋga nyumu mbe pe gbɔ.”
17 Ŋga pra nyumu ta mu gbɔ mu kɔ kre, a pra mɛɛ ŋga kɔ mbo,
“Kɔlɔe, e ti mbe nyumu yili e nu ɛ,
mbe o mɛɛ kɔ mbe e ŋga.
18 Yire kɔlɔe nyjɛ ŋunu biile,
na leele pre loplombo
na pe lebiile kayie,
na pe jakɛɛn tɛɛ mu tuulo kre.”
Pra yili tablɔ tra kre nu mna sɛ Mattanah na. 19 Ŋga pra yiri wa kre, a pra sɛ Nahaliel na, mna yiri wa mu sɛ Bamoth na, 20 mna yiri wa mu sɛ Moab nyua landɛɛ ŋga kraa wa mu sni nyua Pisgah jaara kre nu. Na mu nduu mu yire nyua kre ndra na, mbe mnaa tablɔ tra kre nyaa.
21 Bawa Israel leele pre na leele tun mbe pe sɛ yo Amora leele ŋunu Sihon pan mbo, 22 Jande ti mbe pe tro u tra nu. Waa le e seele, ndee mbe e tre sɛnyi knumu mbe li, ndee mbe e nyumu ko e kɔlɔe nu mbe gbɔ, kokpɔɔ kre oo yii, mbe sɛ sɛ su na oo yili tra kre nu.
23 Ŋunu Sihon na je na wa ti pe tro u tra nu, A wra u ŋunɔwifɛɛnlɛ wru a pra sɛ Israel leele pre fni Jahaz na, mna wi na pe ni tablɔ tra kre nu. 24 La, Israel leele pre na pe tataara gbo, mna tra kre shɔ mu yire Arnon lɔɔ kre tapanhaa mu sɛ su Jabbok lɔɔ kre na, mu sɛ su pre na Ammon leele pre sam na, ŋgi na hin? Na Ammon leele pre mboo sin mu tro pe sam kre na.
25 Israel leele pre na Amora leele kakpɔɛ yire shɔ mu ta. Yire na Heshbon na ki kabɛɛlɛ yire kro ni. 26 Pe kakpɔɛ yire ka na yi Heshbon, a bawa ŋunu Sihon na nyi mu tni. Wre ŋunu ŋmba wra da mu wi na Moab ŋunu wa ni, mna u tra kro shɔ u pan, mu sɛ su Arnon lɔɔ kre na.
27 Kre ki tia Amora leele pre na ki koni mbuura mbo,
“Ndru mu pan Heshbon na,
mbe pe ki gbeele mbe sin,
e ti Sihon kakpɔɔ kre pe na ki fa yi.
28 Kanhun na yire Heshbon na,
ŋunu Sihon wifɛɛnlɛ
na pe na kanhun yi,
mna Moab leele kakpɔɔ,
ŋga pe yeeri Ar kre sro putuu.
Mna shɔ mu sɛ le Arnon
nyabie nyjɛ yii wa nyjeeri haa yire nu.
29 Yire Moab leele e atɛ.
Yire sɛɛn Chemosh sumifɛɛnlɛ,
e wo kɔ.
E sɛɛn Chemosh kre,
ki kɛ laa ki leele na,
mu tia Amora ŋunu Sihon,
ki bichiɛlɛ yii mu sɛ.
30 La, o pan mu wi mu pe ja,
O Heshbon kla,
hali mu sɛ yili Dibon na.
O pe kla kro mu sɛ le Nophah na,
mu yire wa mu sɛ su Medeba na.”
31 Kra tia Israel leele pre na Amora leele tra kre ta mu tni. 32 Bawa Moses na leele wɔ a pra sɛ chia ŋga pe yeeri Jazer kre le, mbe chin kolo ŋga na pie tro mbe wi na pe ni. Israel leele pre na sɛ wi na pe ni, mna Jazer na ki mbɛɛlɛ chiɛ yire leele kro ni yi na. 33 Israel leele pre na kna mu yiɛ le Bashan na, a ŋunu Og na u leele na wi na pe ni Edrei na.
34 A o Tafun Nyiɛkpɔɔ na yo Moses pan mbo, “Yaashia u fiɛ, ŋgi na hin? Ni u le e kɛɛ, wre na u ŋunɔwifɛɛnlɛ, na u tra kre kro. E u pe imi e na Amora leele ŋunu Sihon ŋmba wraa wa Heshbon na wre pe kre.”
35 Bawa Israel leele pre na ŋunu wre gbo, wre na u biile, na u ŋunɔwifɛɛnlɛ pre ni kro, hali pe n na ndro nunu chom kuraa ti. A pra tra kre wru mu ta.