Deuteronomy Hlɛ
Moses Paaraa Haŋa
1
Kee nyjɛ Moses na yo Israel leele pre pan Jordan lɔɔ kre landɛɛ nu na shie yila finhaa wa, tablɔ tra ŋga kraa wa lɔɔ kre landɛɛ nu mna yiɛ tɛɛ chia ŋga praa yeeri Suph, a kra yiɛ kan chiɛ nyjɛ praa yeeri Paran, na Tophel, na Laban, na Hazeroth, na Dizahab yire na yire na yi kre. 2 Na mu tro kolo ŋga ki tro nyua Seir jaara kre na kre, ble kɛmbɔnunu ni mu nyaari mbe yire nyua Sinai na, mbe sɛ Kadesh Barnea na. 3 Ŋga Israel leele pre na yili Egypt tra nu ki yɛlɛ fuloe shiin wo kre, nyiɛpɔ kɛmbɔnunu wo kre ble ŋga ki yiɛklu, kre Moses na kee nyjɛ o Tafun Nyiɛkpɔɔ na yo u yo Israel leele pre pan yire yo. 4 Ŋga O Tafun Nyiɛkpɔɔ wre na wi na Amora ŋunu Sihon, ŋmba wra ŋunumu li Heshbon na kre ni mna u ja, mna ndru mu wi na Bashan ŋunu Og ni Edrei na mna u ja, wre na ŋunumu li Ashtaroth ni mu kɔ kre, kre wra yire kee nyjɛ yo. 5 Jordan lɔɔ kre yila finhaa wa Moab tra nu wa kre, bawa Moses na nɔɔhle mna Nyiɛkpɔɔ mbra yire lam nyaala mna leele pre nyina mbo, 6 “Nyjila ŋga nu o naa wa nyua Sinai kre jaara kre, o Tafun Nyiɛkpɔɔ wre na yo o pan mbo, ‘E tni nyua ŋga jaara mu mu titi. 7 E e yirɛ koli mna e sɛ yiɛ, e sɛ tni Amora chiɛ nyjɛ yii wa nyuɛ lawee yire nu. E sɛ leele mblɛ pee wa mu tni Jordan landɛɛ kre nu kre trɛ yire, na mblɛ pee wa yila tohaa nyambie yire nu kre, na tablɔ tra ŋga kii wa na shie tapan haa kre nu, na mblɛ pee wa mu tni epo kpɔɔ kre nyu na, na Canaan leele, na Lebanon leele pre pee wa mu tni mu sɛ yili lɔɔ kpɔɔ Euphrates lawee kre trɛ nu trɛ yire wru e tni. 8 E le, ni e ŋga kre tra ŋga. E sɛ kre tra kre wru e tni imi na o Tafun Nyiɛkpɔɔ wre na da na we e tolɛɛlɛ Abraham, na Isaac, na Jacob na pe nanae ŋga ki yi kre.’Moses Na Kalalifɛɛnlɛ Wɔ
9 Kre nyjila kre nu, ndaa yo e pan na, ‘E pe tuuro kpɔɔ mu ni ŋga na mi nunu we yiɛklu na e ni. 10 E Tafun Nyiɛkpɔɔ wre tia e nɛɛ mu ya, a ki tia e nɛɛ mu pe na wɔɛlɛɛ nyjɛ yii wa nyiɛ yiɛ na yi. 11 O Tafun Nyiɛkpɔɔ, e tolɛɛlɛ Nyiɛkpɔɔ wre, u ti mbe e nɛɛ mbe ya ma gbee tataara, mbe u e dwan, imi na wra u nyu yo kre. 12 A mni mi nunu chom we pe mbe jaa e keshiɛn tataara nyjɛ, na e lalɛɛ kakrɔɛ nyjɛ kee lii mi nunu hin? 13 Kena e kachimblɛ mblɛ pe kala nɔɔ ndru, a leele na pe kaan buuro wɔ e jlom yire na kro, mbe ni ti pe tni e nyu na.’ 14 A e na kna mu yo ni pan na, ‘Kre kee ŋga mu yo o pan kre nyu.’
15 Ki tia ndaa kachimblɛ, na mblɛ e kaan buuro, a e na pe wɔ e yɛkulo pre wru a pra tni e nyu na, a pe plɛ naa wa leele kagbenyi kagbenyi nyu na, a plɛ naa wa lafɛɛ lafɛɛ nyu na, a plɛ naa wa fuloe shiin shiin na kɛ kɛ nyu na, a plɛ naa wa leele kɛ kɛ nyu na. A ndaa loplombo plɛ wɔ mu tɛɛ sele yire lefɛɛnlɛ.
16 Kre nyjila kre nu ndaa yo e kpra kunfɛɛnlɛ pre pan na pe dɔɔta na pie na yire na e ŋmbilɛ lalaa kee lii chichie. Na kala ki pan Israel ndro na u ŋmbrɔ lalaa, na Israel ndro na fuŋu ŋmba u yiri waŋgra ka nu mu pan mu tni e nu wi o. 17 Yaashia ndro yiɛ le mbe chiin kpra kun, imi na ndro wre nyi kpan, e u kala li imi na ki fna. Yaa shia ndro yiɛ fiɛ, la, e jawa e chin na Nyiɛkpɔɔ wi kpra kro kunfun. A kee ŋga yoo kie sheli e na kre, mbe e pan na ki ni ni yiɛ mbe ni ki yo.” 18 A kre nyjila kre nu ndaa kee nyjɛ ee na pini kro yo e pan.
Lawee Lefɛɛnlɛ Pre
19 Kena imi na o Tafun Nyiɛkpɔɔ na yo o pan kre, o na yili nyua Sinai kre lawee mbe sɛ Amora leele chiɛ nyjɛ yiraa wa nyambie lawee yire nu yire na, o na tro tablɔ tra vankam ŋga kraa fiɛrɛ ni kre nu mna sɛ le Kadesh Barnea na. 20 Bawa ndaa yo e pan na, “Fuŋga e da Amora nyambie lawee nyjɛ o Tafun Nyiɛkpɔɔ wre we o ŋga kre nu. 21 E le, e Tafun Nyiɛkpɔɔ wre e ŋga tra kre. E sɛ ki wru e tni imi na o Tafun Nyiɛkpɔɔ, e tolɛɛlɛ Nyiɛkpɔɔ wre na ki yo e pan kre. ‘Yaa shia fiɛ, a yaashia ti mbe e sɔɔnrɔ ku.’
22 La, e kro na pan mu yo ni pan na, ‘Ti mbe o klu mbe leele tun mbe pe sɛ tra kre ju mbe le, mbe paan o nyina kolo ŋga na oo tro mbe sɛ, na chiɛ nyjɛ sembremu na oo tro.’
23 Kre kee ŋga jawala e na ta kre na nyu ni pan, a ndaa bilɛ nununu wɔ jlom kɛmbɔshiin yire kro nu. 24 Leele pre na sɛ nyambie yire na, hali mna kila mu sɛ su Eshcol lafolo kre landɛɛ kro mna bawa yire lele mu tro. 25 Pra pan bawa tinyi sɛnyi yɛ ni mna pan mu o nyina, mna yo mbo, ‘Tra ŋga o Tafun Nyiɛkpɔɔ yo na we o ŋga kre pe tra chichie yi.’
26 Ande e na je mna yiri mu o Tafun Nyiɛkpɔɔ wre kee ŋga wra yo kre taan, a e nsraa chaa mbe sɛ tra kre nu. 27 A e naa taanri e yonyi nyinyi nu na yuu mbo, ‘O Tafun Nyiɛkpɔɔ wre, pra u o pra. Kre ki tia u o wɔ mu yili Egypt tra nu, mbe paan o le Amora leele kɛɛ mbe pe o kla.’ 28 Ŋgi kie ti mbe o sɛ wa hin? O wolo mblɛ mu tun kre pan mu fiɛrɛ le o nu na yuu mbo, ‘Tra kre leelee faŋga ni, mu gede gede mu wɛ o na. A chiɛ nyjɛ na pe nyi yire kpɔɔ kpɔɔ, a mboe nyjɛ pe sin mu yi fɛ mu kun yire gede gede mu sɛ su nyjeeri. Hali o na legbakrɛ nya wa!’”
29 La, ndaa yo e pan na, “Yaa ti mbe tutom wo e na, a yaa shia pre leele pre fiɛ. 30 E Tafun Nyiɛkpɔɔ wre we yiɛklu e pan, mbe wi mbe e ŋga imi na e na nya a wra pe mu e ŋga Egypt tra nu, 31 na tablɔ tra kre nu wa kre. Bawa e na imi na o Tafun Nyiɛkpɔɔ, ŋmba wi e Nyiɛkpɔɔ nya imi na wra e wɔ soo, imi na lɛ u pɔ tru patia na mbe yaka wa u ta kre, pan wra e wɔ mu pan mu le na e ni mna.” 32 A nde yire kee nyjɛ ndaa yo e pan nyjɛ krɛrɛ kɔkro ni, e nsra kaan o Tafun Nyiɛkpɔɔ wre na, 33 wre ŋmba wra yiɛklu e pan, na ble wɔ mbe u ti kanhun yiɛklu e pan, na ndram saan mbe u ti tlo yiɛklu e pan mbe tni haa cha mbe ŋga, mbe e nyina kolo ŋga na ee tro.
O Tafun Nyiɛkpɔɔ Wre//Israel Leele Ndie Tini
34 Ŋga o Tafun Nyiɛkpɔɔ wre na e taanraa kre loo kre, u krɔ na kun, a wra da mna yo mbo, 35 “Yire nyjila ŋga sisam pefɛɛnlɛ mblɛ wa wa le kre tra taan ŋga ndaa nyu yo na mbe pe tolɛɛlɛ ŋga kre nu.
36 Fɔna Caleb, Jephunneh biblɔ wre bɔkɔ, we tra kre nya, a mbe wre na u nanae ŋga tra ŋga na wra sɛ nyaari kre. Ŋgi na hin? Wra lɛɛ wɔ mna taa mi e Tafun Nyiɛkpɔɔ wre kro.” 37 Yire ndra na, o Tafun Nyiɛkpɔɔ wre krɔ na kun na ni ni, a wra yo ni pan mbo, “Hali ŋu Moses titi, ma le tra kre nu. 38 La, mu yafun Joshua, Nun biblɔ wre we le tra kre nu. Kena u le gbeŋmbaa. Ŋgi na hin? Wre we yiɛklu Israel leele pre ni mbe pe sɛ tni tra kre nu.
39 A e bibɛɛlɛ mblɛ pe n chichie, ndee sisam kee ka chin tun, a e naa yuu na e loŋgoolo we pe yii jaŋga na kre, pre pie le tra kre nu, a mbe pe ŋga ki yi mbe pe ki ta mbe tni. 40 La yire rɛ, e ndru e yie le tablɔ tra kre nu, e kolo ŋga ki sɛ epo nyiɛ kre nu kre yii.”
41 Bawa e na kna mu yo ni pan mbo, “Moses, o sisaa pe o Tafun Nyiɛkpɔɔ wre na. Fuŋga rɛ, oo sɛ wi imi na o Tafun Nyiɛkpɔɔ wre yo o pan kre.” A e kro na chin mna e ŋunɔ wiyirɛ wru mbe sɛ wi, e naa jawa na kie pe foofoo mbe e ŋga, mbe e ja mbe wi mbe nyuɛ lawee chiɛ yire shɔ.
42 La, o Tafun Nyiɛkpɔɔ wre na yo ni pan mbo, “Pe jaari na piashia sɛ wi. Ŋgi na hin? Mba yire pe kro, a pe loŋgoolo pre we pe ja.” 43 A ndaa kee ŋga o Tafun Nyiɛkpɔɔ yo ni pan kre yo e pan, a e nsra li ki na. E na yiri mna u nyu kee kre taan, mna e yɛkpɔɔmu kre tɛɛ mna yiri mu sɛ nyambie yire na. 44 Bawa Amora leele mblɛ praa wa yire nyambie yire lawee nu pre na yiri, mna e ni na srɛ wi, mna e gbo mna sɛ yili na e ni Hormah ŋga kraa wa Edom tra nu kre na. 45 A e na pan mna nyɛni mu o Tafun Nyiɛkpɔɔ wre yeeri, la, u nsra ndie tɛɛ e pan, ndee mna kna mu e le kple. 46 A kra tia e na tni Kadesh na mna mu.