Leŋgefɛɛnlɛ Na Tra Mbra
36
Joseph biblɔ Manasseh wre nana na wi Makir, ki ble ka Makir biblɔ ŋmba praa yeeri Gilead wre jlom yire loplombo na sɛ yo Moses na Israel loplombo pre pan mbo, 2 “Ŋga o Tafun Nyiɛkpɔɔ wre na yo mu pan na mu kɛɛn tɛɛ mbe tra kre yɔɔlɛ mbe Israel leele pre ŋga mbe pe ta krɔyira kre, wra yo na e o sele ndro ŋmba pe yeeri Zelophehad wo ŋga we na ta kre wru mbe u bichiɛlɛ ŋga. 3 A na ki pan na pe bilɛ ta mu leŋge fuŋgaami Israel leele pre jlom yire yɛ nu, pie pe krɔyira ŋga pe ta kre wru mbe sɛ ya jlom nyjɛ nu pe sɛ leŋge yire pan. Kena na ki pan ma pie wre krɔyira ŋga o ta kre ka wru mbe sɛ plɛ jlom ŋga. 4 A na yɛliire yɛlɛ ŋga nu pe leele yirɛ ndroi na pe kaan kre waa da, chiɛlɛ pre we pe krɔyira ŋga pe ta kre wru mbe sɛ ya jlom nyjɛ nu pe sɛ leŋge yire pan. Na ki pan ma, pie ka laa o tolɛɛlɛ jlom tra ŋga o ta kre na.”5 Ŋga kra pan ma kre, a Moses na mbra le Israel leele pre pan mbo, “Kee ŋga Joseph nanae pre yuu kre pe kpra. 6 Kena kee ŋga o Tafun Nyiɛkpɔɔ wre yo ni yo Zelophehad bichiɛlɛ pre pan yi kre, pie jaa ndro ŋmba pe chaa kpan leŋge, la, ki fna mbe bilɛ mblɛ pie leŋge kre yili pe lɛ wre jlom na. 7 A Israel jlom yire ka krɔyira n fna mbe yili jlom ka na mbe sɛ jlom ka na. Tra ŋga jlom ka ta pe tolɛɛlɛ krɔyira kre fna mbe kro pe pan. 8 Israel lechlɔ ŋmba we tra ta krɔyira kpan, u fna mbe leŋge u lɛɛlɛ jlom leele nu, mbe ki ti mbe Israel leele pre na lɛɛlɛ krɔ lii. 9 Jlom ka krɔyira n fna mbe yili mbe sɛ jlom ka na, tra ŋga jlom ka ta krɔyira kpan, fna mbe kro jlom kre na.”
10 Ki tia Zelophehad bichiɛlɛ pre na li kee ŋga o Tafun Nyiɛkpɔɔ na yo Moses pan kre na. 11 A Zelophehad bichiɛlɛ pre, Mahlah, na Tirzah, na Hoglah, na Milcah, na Noah, pre kro na bilɛ leŋge pe lɛ wre jlom na. 12 Joseph biblɔ Manasseh wre nanae nu pra leŋge, a kra tia pe tra ŋga pra ta krɔyira kre na kro pe lɛ wre jlom kre na.
13 Kena yire mbra nyjɛ o Tafun Nyiɛkpɔɔ wre na Moses ŋga, na u Israel leele pre ŋga nyjila ŋga ni praa wa Moab tra mbrɛrɛ kre nu, mu mbra Jordan lɔɔ kre lawee ŋga nu Jericho na nyi lɔɔ kro kre.