Levi Leele Pre Tra
35
Nyjila ŋga ni Israel leele pre naa wa Moab tra mbrɛrɛ kre nu mu mbra Jordan lɔɔ lawee ŋga nu Jericho na nyi lɔɔ kro kre, o Tafun Nyiɛkpɔɔ wre na yo Moses pan mbo, 2 “Yo Israel leele pre pan na pe trɛ yire pie ta kre, pe Levi leele pre ŋga chiɛ nyjɛ na pie tni, na tra ŋga na pe yurɛ we na kaa mbe fɛ mbe pe chiɛ yire kun. 3 Imi kie pe mbe pe chiɛ ta mbe tni, mbe lawee ta mna pe yurɛ we na kaa. 4 Yurɛ kahaa trɛ nyjɛ ee Levi leele pre ŋga yire fna mbe laa chia kre mboe yire na mbe sɛ kie pe yaadi lafɛɛ kunɔ mbe chia kre fɛ mbe kun. 5 Kena mu yire wa na shie kre, tra ŋga ee pe ŋga mbe pe yurɛ na kaa kre nyjeeri haa fna mbe ki kpɔɔrɔm da yaadi kagbeŋge, mbe ki yila finhaa pe ma na, mbe ki tapan haa pe ma na, mbe ki yila to haa kre pe ma na, mbe chia kre wa lalaa. 6-7 Kena chiɛ nyjɛ ee pe ŋga yire kro fna mbe pe fuloe shiin na kɔɔnatarɛ, mbe ya pe yurɛ kahɛɛ yire na, kena chiɛ yire kɔɔnanu pe fɛnkaari chiɛ. Imi kie pe na ndro wa punu mu linku kee pe kre, mbe u jaa fɛ mbe sɛ kaari wa. 8 Chiɛ nyjɛ ee Levi leele pre ŋga kre we yili chiɛ nyjɛ pre Israel jlom leele pre we ta yire nu. Jlom ŋga ki kpɔɔ kre fna mbe wɔ chiɛ nɛɛrɛ, mbe jlom ŋga kii fiɛn kre wɔ chiɛ fiɛn.”Fɛnkaari Chiɛ Yire
9 A o Tafun wre na yo Moses pan mbo, 10 “Yo Israel leele pre pan na, na pe waa Jordan lɔɔ kre kun mu le Canaan tra kre nu, 11 pe chiɛ yire yɛ wɔ mbe yi pe fɛnkaari chiɛ, imi kie pe na wa punu mu linku kee pe, mbe ufun jaa fɛ mbe sɛ kaari wa. 12 Yire chiɛ yire we pe fɛnkaari lawee, imi kie pe mbe ndro ŋmba pe gbo wre leele wa linkufun wre gbo mbe fɔlɔ tɔ, mbe pe chiin u kala li chiafɛɛnlɛ pre yiɛ na. 13 Kena yire chiɛ kɔɔnanu nyjɛ ee wɔ yire we pe e fɛnkaari lawee. 14 E taarɛ wɔ Jordan lɔɔ kre yila finhaa mna, mbe e taarɛ wɔ Canaan tra kre nu. 15 Yire chiɛ kɔɔnanu nyjɛ we pe fɛnkaari chiɛ mbe Israel leele, na fumblɔ mblɛ pe yiri waŋgra ka nu mu pan mu tni e nu kro ŋga, imi kie pe na wa punu mu ndro gbo kpan, mbe ufun jaa fɛ mbe sɛ kaari wa.
16 Na ki pan na wa tɔɔnrɔ tɛɛ mu wa fɔɔri mu gbo kre, ufun wre linkufun wi, ki fna mbe pe ufun gbo ka na. 17 Ndee na dnɛ kii wa ndro wa kɛɛ, a kie jaa ndro gbo, a waa ndro wa na ki ni mu gbo kre, ufun wre linkufun wi, kena linkufun wre fna mbe pe u gbo ka na. 18 Ndee na kaan kii wa ndro wa kɛɛ, a kie jaa ndro gbo, a waa ndro gbun na ki ni mu gbo kre, u fun wre linkufun wi, kena linkufun wre fna mbe pe u gbo ka na. 19 Na ŋmba pe gbo kre nyimi ndro waa fni na linkufun wre ni kre, we jaa u gbo mbe fɔlɔ tɔ. 20 Na ki pan na wa u ŋmbrɔ jawala fɔɔn le, mu tuwi mu u wa na yira ni mu gbo, 21 ndee na u krɔ tɛɛ mu u gbun na kɛ ni mu gbo, kena wrefun wre linkufun wi, a ki fna mbe pe linkufun wre gbo ka na. A na ki pan na ŋmba pe gbo wre nyimi ndro linkufun wre ta, we jaa u gbo mbe fɔlɔ tɔ.
22 La, na ki pan na prara ma ki tia, a ndro waa punu mu u ŋmbrɔ gbo, na siin u u sin mu chan tra, ndee mu u wa na yira na ni mu gbo, 23 ndee na yira ndro wa, a ki fo mu to ndro na mu u gbo, a u fun wre n pe mu loŋgo, 24 kena na yire kooloe nyjɛ ka na yi wala, kena chia loplombo pre fna mbe kala kre yo mbe ufun wre ŋga tam, mbe ŋmba u ku wre leele mblɛ pe chaa mbe fɔlɔ tɔ pre gbun pimi ni. 25 Na ki pan ma, kena loplombo pre fna mbe ŋmba u ndro gbo wre le mbe yaka wa u ta mblɛ pe u chaa mbe gbo mbe fɔlɔ tɔ pre kɛɛ, mbe ndru mbe sɛ na u ni fɛnkaari chia ŋga na wra klu mu fɛ mu sɛ kre na. A ki fna u tni wa mbe sɛ su na srawɔfun lopom titi ŋmba uu wa kre nyjila kre nu wre we ku tun. 26 La na ki pan na ŋmba u ndro gbo wre waa yili fɛnkaari chia ŋga na u fɛ mu sɛ kaari kre na, 27 a gboo wre nyimi ndro titi u nya kre, kii wa kolo ni mbe u jaa u gbo mna u u nya kre, a na ki pan ma u n pimi li. 28 Lewo ŋmba u ndro gbo wre, na waa fɛ mu sɛ fɛnkaari chiɛ yire ka na, ki fna u tni wa mbe sɛ su na srawɔfun lopom titi ŋmba uu wa kre nyjila kre we ku. Na srawɔfun lopom titi wre waa ku, kena kolo wa mbe u ndru mbe pan u chia.
29 Kena yire mbra nyjɛ, yii wa mu Israel leele pre na pe nanae kro ŋga mu sɛ su nyjila kro nu. 30 Ŋmba we ndro gbo kpan, ki fna pe linkufun wre gbo na, la, ki fna mbe pe dansiɛfɛɛnlɛ ta kee kre na tun. Linkufun n fna mbe pe u gbo, fɔna pe dansiɛfɛɛnlɛ ta mbe praa shie leele shiin tun. 31 Lewo ŋmba we ndro gbo a ki fna mbe pe u gbo ka kre, ndro waashia yaka tɛɛ mbe ufun wre ndra lɔ, kumu ni ufun wre fna. 32 A na ki pan na wa ndro gbo mu fɛ mu sɛ tni fɛnkaari chiɛ yire ka na, ndro waashia yaka tɛɛ mbe u ndra lɔ, mbe yo na u ndru mbe sɛ tni u chia, fɔna srawɔfun lopom titi ŋmba uu wa kre nyjila kre nu wre ku tun.
33 Yaashia tra ŋga nu e nyi mu tni kre tɔ na nɛɛrɛ ni. Ndro gboo ki tra kre toni nɛɛrɛ ni, a na ki pan ma yaka wa ja mbe nɛɛrɛ laa tra kre na, fɔna pe linkufun wre gbo na. 34 Yaashia tra ŋga nu mi Nyiɛkpɔɔ na yire nyi mu tni kre tɔ na nɛɛrɛ ni. Ŋgi na hin? Mi e Tafun Nyiɛkpɔɔ wre wa mu tni yire Israel leele nu.”