Tra Kre Sam
34
A o Tafun Nyiɛkpɔɔ na yo Moses pan mbo, 2 “Yo Israel leele pre pan na, ‘Na e waa le Canaan tra ŋga ni e ŋga krɔyira kre nu kre, ki sam mbe e nyina kre. 3 Tra kre tapan haa sam kre we yire Zin tablɔ tra kre na, mbra shie yilafin haa. Sam kre we tro Edom tra sam nyu na, mbe yire wa mbe sɛ to Epo weŋge wo kre tapan haa, 4 mbe yire wa mbe tro Akrabbim tapan haa kolo kre na mbe sɛ to Zin na, mbe sɛ yili Kadesh Barnea tapan haa. Bawa kie yire mbe sɛ Hazar Addar na mbe sɛ su Azmon na. 5 Mbe yire wa mbe kna mbe sɛ to Egypt tra sam na, mbe ki nyu sɛ kɔ Mediterranean Epo kre nyu na.6 E sam ŋga kii wa na shie yila tohaa kre nyu we to Mediterranean Epo kre na.
7 A e nyjeeri haa sam kre, ee ki kaanri mbe yire Mediterranean Epo kre na mbe sɛ su nyua Hor kre na. 8 Mbe yire nyua Hor na mbe sɛ su Lebo Hamath na, mbe yire wa mbe sɛ to Zedad na. 9 Mbe yire wa mbe sɛ tro Ziphron yila finhaa, mbe sɛ su Hazar-Enan na, bawa e nyjeeri haa sam kre we tro.
10 E yila finhaa sam kre we tro Hazar-Enan na mbe sɛ tro Shepham na, 11 mbe yire wa mbe sɛ to Riblah na, mbra shie Ain yila finhaa wa. Mbe tro nyambie yire na mbe sɛ yili Galilee tapla ŋga kii wa na shie yilafin haa kre na. 12 Kena ki yire wa mbe tro Jordan lɔɔ kre mbɛɛ na mbe sɛ su Epo weŋge wo kre na. Kena e tra kre nyu ni e nyina mu fɛ mu kun kre.’”
13 A Moses na yo Israel leele pre pan mbo, “E kɛɛn tɛɛ e tra kre yɔɔlɛ e eyɛ ŋga mbe e ki ta krɔyira, o Tafun Nyiɛkpɔɔ wre yo na e ki yɔɔlɛ mbe jlom kɔɔnanyjirɛ na yɔɔ yire ŋga, 14 Ŋgi na hin? Reuben jlom kre, na Gad jlom kre, na Manasseh jlom yɔɔ kre, pre trɛ ta. 15 Yire jlom shiin na yɔɔ yire pra tra ta Jordan lɔɔ kre mbɛɛ na mu na shie ki yila fin haa Jericho mbɛɛ na wa.”
16 A o Tafun Nyiɛkpɔɔ na yo Moses pan mbo, 17 “Srawɔfun Eleazar, na Nun biblɔ Joshua pre pie tra kre yɔɔlɛ mbe Israel leele pre ŋga. 18 Mbe mu leele nununu wɔ jlom yire kro nu mbe pe ya pe na mbe pe tra kre yɔɔlɛ. 19 Pre leele pre lɛ Jephunneh biblɔ Caleb, ŋmba u yiri Judah jlom na wre, 20 na Ammihud biblɔ Shemuel ŋmba u yiri Simeon jlom na wre, 21 na Kislon biblɔ Elidad ŋmba u yiri Benjamin jlom na wre, 22 na Jogli biblɔ Bukki ŋmba u yiri Dan jlom na wre, 23 na Ephod biblɔ Hanniel ŋmba u yiri Joseph biblɔ Manasseh wre jlom na kre, 24 Shiphtan biblɔ Kemuel ŋmba u yiri Joseph biblɔ Ephraim wre jlom na kre, 25 na Parnach biblɔ Elizaphan ŋmba u yiri Zebulun jlom na kre, 26 na Azzan biblɔ Paltiel ŋmba u yiri Issachar jlom na kre, 27 na Shelomi biblɔ Ahihud ŋmba u yiri Asher jlom na wre, 28 na Ammihud biblɔ Pedahel ŋmba u yiri Naphtali jlom na kre.” 29 Kena pre bilɛ mblɛ o Tafun Nyiɛkpɔɔ wre na yo na pe ya Eleazar, na Joshua na mbe pe Canaan tra kre yɔɔlɛ mbe Israel leele pre ŋga.