Israel Leele Pre Taanri Moses Na
14
Ki ble kre, nyɛnɛɛ kpɔɔ na yi chia kre na mu pan mu nyiŋge se. 2 Israel lee pre kro naa taanri Moses, na Aaron na. Mna kna mna yo pe pan mbo, “Na e na o ti Egypt tra nu, ndee tablɔ tra kre nu kuraa, kaa ki prɔ 3 Mni a o Tafun Nyiɛkpɔɔ pan na o ni tra ŋga nu, mbe o paan ku ŋunɔ finfin ŋga hin? Mbe pe o chiɛlɛ na o biile foolo. A kena na o ndru mu sɛ Egypt tra nu kuraa kre n prɔ?”4 A pra nyu le mbo, “Oo yɛklo wɔ, mbe u ndru mbe sɛ na o ni Egypt tra nu.” 5 A Moses, na Aaron na to mu pe yiɛ juule tra Israel leele pre kro yiɛ na. 6 A Nun biblɔ Joshua wre, na Jephunneh biblɔ Caleb mblɛ pra ya mna sɛ tra kre le pre na pe yonyi laa peyɛ na mna yi sro. 7 Mna kna mu yo Israel leele pre kro pan mbo, “Kre tra ŋga o na sɛ kila mu le ŋga, ki nyu mu tro. 8 Na ki tna o Tafun wre pan, we sɛ le na o ni kre tra ŋga nu. Tra kre pe taan titi, a we ki le o kɛɛ. 9 La, e le na yaa yiri mbe o Tafun Nyiɛkpɔɔ wre taan, a yaa tra kre leele pre fiɛ, oo pe ja. Nyiɛkpɔɔ wa o kro, a we kɛ laa pe na, kena yaa pe fiɛ.”
10 Leele pre kro na nyu ta nunu mbe pe waari dnɛ ni mbe gbo. Titɛɛ kre nu to, a o Tafun Nyiɛkpɔɔ yiɛnyiŋge ŋga ki chiɛnri kre na tii mu pan Fninyuŋgo kre nu. 11 A o Tafun Nyiɛkpɔɔ na paara Moses ni mbo, “Kena kawako kee tataara nyjɛ ni pe pe yiɛ na ŋga, pee wa mu ni je, a pe ni shɔnli tɛɛ? 12 Mbe ti mbe yira le pe nu mbe pe kla, la, ŋu rɛ, mbe mu pe waŋgra kpɔɔ ŋga nu faŋga nyi.”
13 A Moses na kna mna yo o Tafun Nyiɛkpɔɔ pan pan mbo, “Mu jaŋga ni mna mu leele mblɛ wɔ mu yili Egypt tra nu. Kena na mu kre kee ŋga pe, a Egypt leele pre ki loo, 14 pie ki kpali tra ŋga leele kro pan. A mu chin na waŋgra ŋga leele kro ki loo na ŋu o Tafun Nyiɛkpɔɔ titi wa o nu. A mu tlo o juule, na ble wɔ mbe ki kaari kania pilaasi mbe yiɛklu o pan, na nyiŋge se mbe ki kaari pilaasi mbe yiɛklu o pan. 15 Na ki pan na mu pe kro gbo ma ŋga, waŋgrɛ nyjɛ yi mu kee nyjɛ loo kre we kna mbe yo na, 16 Pe Tafun Nyiɛkpɔɔ wre nsra ja mu sɛ na pe ni tra ŋga nyu wra yo, mna da mu pe ŋga kre na. A ki tia u pe gbo tablɔ tra kre nu. 17 Kena fuŋgaami ŋga, o Tafun Nyiɛkpɔɔ, mu jaŋga nyina imi na mna ki yo na, 18 mi e Tafun Nyiɛkpɔɔ wre, ni krɔ na kun nyaanyaa, a ni koroo kpɔɔ, a ni sisam tii na kee, na mblɛ pe yiri na ni taanla pre hakɛ tii na kee. La, mblɛ pimi lii pre, ni pe ndie tinii. Na biile ndie tinii pe lɛɛlɛ sisam tlo, hali mbe sɛ su pe nanae, na pe nana jelijae kro na. 19 Nyiɛkpɔɔ, le mu koroo kpɔɔ kre na, mu leele mblɛ sisam ti mu pe kɛ, imi mu tii na pe kee mu yire nyjila ŋga pra yili Egypt tra nu kre.”
20 A o Tafun Nyiɛkpɔɔ na kna mbo, “Ni pe sisam kro ti mu pe kɛ, imi na mu yo kre. 21 Ni nyu yuu na, ŋga nii wa, a ni yɛnyiŋge tra ŋga nyi ŋga, 22 pre leele mblɛ pra ni yɛnyiŋge kre nya, mna kawako kee nyjɛ ndaa pe Egypt tra nu, na tablɔ tra nu yire nya, mna je mu ndikana pe ni na, mu ni pe mu le gbee nununu kɛ kre, 23 pe nunu chom wa tra ŋga nyu ndaa yo, mna da mna pe tolɛɛlɛ ŋga kre nya. 24 La, ni sumifun Caleb rɛ, u kepele yili kiyɛ, a u kee kpra ni, kena mbe ti u le tra ŋga wra sɛ le kre nu, mbe u nanae ki ta mbe tni. 25 Fuŋgaami ŋga, Amalek leele, na Canaan leele wa yire landɛɛ nyjɛ nu. Ki tia e ndru e kro baŋga, e kolo ŋga ki sɛ tablɔ tra kre nu, mu yiɛ tɛɛ epo nyiɛ kre haa kre yii.”
26 A o Tafun Nyiɛkpɔɔ na yo Moses, na Aaron pan mbo, 27 “Ŋgi nyjila kre sisam pefɛɛnlɛ mblɛ taanraa ŋga nyu we to wo? Ni kee nyjɛ na pre Israel leele mblɛ taanri yire kro loo. 28 Kena yo pe pan, ŋga nii wa ŋga, kee nyjɛ ni loo na e yuu kre, yire mbe pe mbe e ŋga. Mi e Tafun ni ki yo. 29 Ee ku tablɔ tra kre nu, mbe e gboolo bɔ lawee kro nu. E mblɛ pra li yɛlɛ fulo na shie, a pra e tɔɔnri kre, a e chaa mblɛ pe taanri ni na pre nu kro. 30 E wa n wa mbe le tra ŋga na ndaa da mu e ŋga kre nu, fɔna Jephunneh biblɔ Caleb wre, na Nun biblɔ Joshua pre bɔkɔ. 31 La, e biile mblɛ ni e kawa na pie pe foolo kre, pre pie sɛ tra ŋga e je kre ta mbe tni. 32 La yire rɛ, ee ku tablɔ tra kre nu. 33 E biile we kila mbe tro tablɔ tra ŋga nu yɛlɛ fuloe shiin. Ŋga e ayɛte ni na kre ndra na, ee kala nya mbe sɛ su na e haŋu we ku tablɔ tra ŋga nu. 34 Ble fulo nyjɛ ni pra sɛ Canaan tra kre le kre, yɛlɛ nunu we yire ble nunu titɛɛ mbe e kala nya yi nu. Kre ee chin imi na ki nyi, na mi Nyiɛkpɔɔ we yiri mbe e taan. 35 Mi e Tafun wre ni ki yo, a mbe ti yire kee nyjɛ pre sisam pefɛɛnlɛ mblɛ pe nyu nunu ta ni na kre nya. Pe taa haa yi tablɔ tra ŋga nu, mna pe kro we ku.”
36 A bilɛ mblɛ Moses na tun a pra sɛ tra kre le mna pan na mandiɛ fɔɔn kre ni, mna tia leele pre kro naa taanri u na kre, 37 pre leele pre, Nyiɛkpɔɔ na tia yira na pe gbun, a pra to mu ku u yiɛ. 38 Pe mblɛ pra sɛ tra kre le kre, Nun biblɔ Joshua, na Jephunneh biblɔ Caleb pre chiin pra ŋmaa li.
39 Ŋga Moses na mandiɛ nyjɛ krɛrɛ bɔ Israel leele pre pan mu kɔ kre, a pra nyɛni chichie. 40 A pra yiri nyisee nyu na mu yiɛ le na shie chiɛ nyjɛ yiraa wa nyambie gedenyi yire lawee. Kee ŋga praa yuu na shie yi mbo, “O sisaa pe, a nde oo sɛ lawee ŋga kee o Tafun Nyiɛkpɔɔ yo o pan kre nu.”
41 A Moses na pe wie mbo, “Mni a e o Tafun Nyiɛkpɔɔ wre nyu kee je hin? Nyjɛ e piin ŋga wa ya e na. 42 Yaa sɛ, na e sɛ ee sɛ to e loŋgoolo kɛɛ, ŋgi na hin? O Tafun Nyiɛkpɔɔ wre n wa e kro. 43 Na e sɛ ee sɛ fni na Amalek, na Canaan leele pre ni wa, a pie e ja, ŋgi na hin? E laa o Tafun Nyiɛkpɔɔ wre kro, a ki tia u laa e na.”