Pe Leele Kɛmbɔshiin Tun Canaan Na
13
A o Tafun wre na yo Moses pan mbo, 2 “Ti mbe bilɛ plɛ sɛ Canaan tra kre le imi na ki nyi. Kre tra kre ni yire Israel leele pre ŋga. Loplombo nununu wɔ mu yili jlom kɛmbɔshiin yire nu mbe pe sɛ.” 3 Imi na o Tafun Nyiɛkpɔɔ na yo kre, Moses na yire Paran tablɔ tra kre nu wa, mna jlom loplombo pre tun. 4 Pe mɛɛ yi kre,Reuben jlom na, Zaccur biblɔ Shammua pra wɔ.
5 Simeon jlom na, Hori biblɔ Shaphat pra wɔ.
6 A Judah jlom na, Jephunneh biblɔ Caleb pra wɔ.
7 A Issachar jlom nu, Joseph biblɔ Igal pra wɔ.
8 Ephraim jlom na, Nun biblɔ Hoshea pra wɔ.
9 Benjamin jlom na, Raphu biblɔ Palti pra wɔ.
10 Zebulun jlom na, Sodi biblɔ Gaddiel pra wɔ.
11 Manasseh jlom na, Susi biblɔ Gaddi pra wɔ.
12 Dan jlom na, Gemalli biblɔ Ammiel pra wɔ.
13 Asher jlom na, Michael biblɔ Sethur pra wɔ.
14 Naphtali jlom na, Vophsi biblɔ Nahbi pra wɔ.
15 Gad jlom na, Maki biblɔ Geuel pra wɔ.
16 Kena mɛɛ nyjɛ leele pra wɔ mna pe tun a pra sɛ tra kre le. Moses na Nun biblɔ Hoshea ŋga mɛɛ Joshua.
17 Ŋga Moses naa pe waa kolo mbe pe sɛ Canaan tra kre le kre, a wra yo pe pan mbo, “E tro Negev tablɔ tra kre nu, e sɛ tro nyambie chiɛ yire na. 18 E sɛ le imi na tra kre nyi, e leele mblɛ pee wa ki na le, faŋgaa wa pe nu, ndee na faŋga n wa pe nu, na pee fiɛn, ndee na pe nɛɛ? 19 E pe tra kre le, na ki nyu, ndee ki n nyu? Na pe chiɛ yire pe bunyi sin mu yi fɛ mu kun, ndee pe n bunyi sin mu yi fɛ mu kun. 20 E tra kre le, mni ki nyi hin? Kie tna ndee, tra pɛɛn yi hin? Tinyii wa ki nu ree, tinyi n wa ki nu. E gbeŋmba e tra kre tinyi sɛnyi yɛ knumu e pan.” Na kre nyjila kre tre sɛnyi nyinai jle.
21 Pra sɛ tra kre le mu yire Zin tablɔ tra kre nu, mu sɛ su Rehob na mu na shie Lebo Hamath haa wa. 22 Pra sɛ tro Negev tablɔ tra kre nu, mna sɛ yili Hebron na. Kre lawee kre nu blɔ ŋmba praa yeeri Anak wre nanae mblɛ pe yeeri Ahiman, na Sheshai, na Talmai leele pre na nyi mu tni. Pra Hebron chia kre kun, ki yɛlɛ kɔɔnashin kɔkro, a pra chin mu Zoan chia kre kun Egypt tra nu. 23 Ŋga pra pan mu da Eshcol landɛɛ kre nu kre,a a pra tre klɛ na ki sɛnyi chusii yɛ kun, mna kaan le ki nu, a leele shiin na ki tio. A pra pomegranate, na fig sɛnyi yɛ knumu mu ya. 24 Praa kre lawee kre yeeri Eshcol landɛɛ, ŋgi na hin? Ŋga Israel leele pre na tre sɛnyi kun wa chusii kre ndra na.
25 Ble fuloe shiin ni pra tɛɛ mna tra kre kila mu tro, mna ndru mu pan.
26 Pra pan mu Moses, na Aaron, na Israel leele pre kro fni Kadesh ŋga kii wa Paran tablɔ tra kre nu kre na, mna pe bɔ mandiɛ kro, mna pe nyina tre tinyi sɛnyi yire. 27 Mandiɛ ŋga pra bɔ Moses pan na yi kre mbo, “O na sɛ tra ŋga na mna o tun kre na, tra kre tna, mu nyu titi. Ki sɛnyi yɛ kuraa yi kre. 28 La, leele mblɛ pee wa ki na kre, faŋgafɛɛnlɛ biribiri lɛ, a pe chiɛ yire kpɔɔ kpɔɔ a pe mboe sin mu yi fɛ mu kun. Hali o na Anak nanae legbakrɛ pre plɛ nya wa. 29 Amalek leele pee wa Negev tablɔ tra kre nu, a Hittite, na Jebusite, na Amora leele pree wa nyambie yire na, a Canaan leele pree wa epo, na Jordan lɔɔ yire mbɛɛ na.”
30 Bawa Caleb ma pe nyu kun mna yo mbo, “E ti mbe o sɛ tra kre shɔ mbe tni, oo pe ja.” 31 La, leele mblɛ pra ya u na mu sɛ kre na kna mbo, “Waa jaa wi na pe ni, pe faŋga wɛ o na.” 32 A pra tra kre mandiɛ sisaa kpali Israel leele pre nu mbo, “Tra kre n tna, a ki leele na sro ta mu li, leele pre gede gede mu kpɔɔkpɔɔ. 33 O na Anak nanae legbakrɛ pre plɛ nya wa. Na o pe le, mu kna mu oyɛ le, pan o pe to na kpaae lɛ.”