Miriam Ndie Tinɛɛ Ta
12
Cush chlɔ ŋmba Moses na leŋge kre ndra na, Miriam na Aaron naa taanri Moses na na yuu mbo, 2 “Moses chiin pan o Tafun wre paara ree? Jaa u n na paara na o ni na.” Ŋga praa yuu ma kre o Tafun Nyiɛkpɔɔ na ki loo. 3 Moses na pe ndro ŋmba u nyjii kolo kro na, ndro nsra wa waŋgra nu mu nyjii na wre wi. 4 Titɛɛ kre nu to a o Tafun Nyiɛkpɔɔ na Moses, na Aaron, na Miriam yeeri mbo, “E kro taarɛ e yili fninyuŋgo kre nu e pan fimi na. A pre taarɛ pre na yili mu pan.” 5 A o Tafun Nyiɛkpɔɔ na pan mu yire tlo ŋga kra pe na pilaasi yi kre nu fninyuŋgo kre yɛsimi. Ŋga pre shiin pre na pan kre, 6 a wra yo pe pan mbo, “E kee ŋga mbe yo ŋga loo,Na Nyiɛkpɔɔ kee nyanyofun
waa wa e nu kre,
ni kee ni woni na u nyina,
na paara na u ni ŋunɛ nu.
7 La, pan ma ki nyi,
mi na ni sumifun Moses lalaa.
Mi ni u pe ni leele,
Israel wolo pre lefun.
8 Ki tia wre rɛ,
u we, ni we,
mbe mi na wre na paara chasi,
a ki n pe yomɛɛlɛ nu.
U ni nyaa imi na ni nyi.
Ŋgi ki tia,
wre ni sumifun ŋmba nyini,
e n na u fiɛ,
na taanri u na ŋga hin?”
9 Kra tia o Tafun Nyiɛkpɔɔ krɔ na kun kpɔɔ na pe ni, a wra sɛ mu pe ti. 10 Ŋga tlo kre na laa fninyuŋgo kre na kre, na Miriam wa mu yire wa, a yiranyiɛrɛ wo u na, a u fniŋge kro poŋgo na sugbeŋge yi. Ŋga Aaron na kna mu Miriam le kre, na u kaari kokuefun. 11 A wra kna mu yo Moses pan mbo, “Jande, ni tafun, maa o jijiere sisaa ŋga o pe ŋga le, mbe krɔ yii na o ni. 12 Maa ti mbe Miriam pe na bikpɔlɔɔ ŋmba pe se mu nya na u kokoo fɔɔn wi.”
13 A Moses na nyɛni mu o Tafun Nyiɛkpɔɔ yeeri mbo, “Jande Nyiɛkpɔɔ, ti mbe Miriam saanla.”
14 A o Tafun wre na yo Moses pan mbo, “Kena na u lɛ kuraa tɛɛnrɛ wo u yiɛ na, nyifɛɛrɛ wa na u gbo ble nununu kɔɔnashin ra? Mbe pe ti mbe u sɛ tni pe tnihaa wa kre mbookrɔ ble kɔɔnashin.” 15 Ki tia pra tia Miriam na kro mbookrɔ ble nununu kɔɔnashin. Israel lee pre n na ja mu kɔ pe titɛɛ, mna sɛ su na Miriam na ndru mu pan pe tni haa wa.
16 Kre kee ŋga kɔkro, leele pre na yili Hazeroth na, mna sɛ tni Paran tablɔ tra kre nu.