4 Kena fumblɔ mblɛ pra chaa Israel leele pre nu kre niŋge naa wa sro nyjɛ praa taa Egypt tra nu yire na, a kra tia Israel leele pre titi naa taanri na yuu mbo, “Kaara niŋge ki o yii ma. 5 Ŋga o naa wa Egypt tra nu, mbro ŋmba o chaa oo ka finfin. Afoo sɛnyi, na jeendee nyini nyini na bɔ o na wa. 6 Fuŋgaami ŋga le, o manna ka chiin a o nyu kan. Sro ka n wa na, na manna nyjɛ bɔkɔ.”

7 Pan manna yire na nyi na bentɔ yi, mna pe na yi fniŋge a ŋgonyina chaa yi nu. 8 Kena praa manna yire kolii, mbe yi su, ndee mbe yi tre dnɛ na, kena pe yi sɔɔ na chɔ ni, ndee mbe yi kla na koose yi. A yi tnamu na pe to, na olive simi ni pe yi pe. 9 Manna yire na sugbeŋge yiraa chaa na woni blee.

10 Moses na loo na Israel leele pree wa mu yire yire pe jlonwee nyu na, na nyɛni kro poŋgo. Kra tia o Tafun Nyiɛkpɔɔ krɔ na kun kpɔɔ na pe ni, a kra tia Moses nsra chin ŋga we pe. 11 A wra yo o Tafun Nyiɛkpɔɔ pan mbo, “Mni a mu tia mu sumifun, a ndaa yire kaalɛɛ nyjɛ nyaa ma ŋga hin? Ŋgi ni taa mu na, a mu tia leele mblɛ kro keshian kro pan mu tuu mi nunu gbun na ŋga hin? 12 Mi ndaa pe kro siire ta, mu pe se ra? Mni a mu yo na ni pe fo gbun na, na ndro ŋmba u chlɔ yiri mbe u se, mbe u pɔ wre wru mbe fo gbun na wi, hali mbe sɛ le na pe ni tra ŋga mna yo na mu pe tolɛɛlɛ ŋga kre nu? 13 Sena mbe yiri na kaara ni mbe leŋunɔ mblɛ ŋga hin? Pe kro nyɛni na woni ni na na yuu mbo, ‘O ŋga kaara mbe o ka.’ 14 Mi chiin wa jaa pe kanyana tio, pe keshian wɛ ni na. 15 Na pan mu ni pe imi, kena ni fooro le mu ni gbo fuŋgaami, mbe cheu wa kɔɔ wɔ ni na.”

16 A o Tafun Nyiɛkpɔɔ na yo Moses pan mbo, “Israel leele pre yɛkulo, na pe loplombo fuloe taarɛ na kɛ wɔ, mu pan na pe ni, mbe pe yire mu jaara Fninyuŋgo kre yɛsimi wa. 17 Bawa mbe pan mbe mi na ŋu paara. Mbe ti mu Ŋumu wre ka le pe nu. Na ki pan ma, pie leele pre keshian yire yɛ yii mu pan, mbe yia kro ŋu chiin lagboo. 18 Yo pe pan mbe pe peyɛ pe cheche, ŋgi na hin? Baŋga pie kaara taa ka. Ŋgi na hin? O Tafun Nyiɛkpɔɔ loo na e nyɛni na yuu na kaara niŋge e yii. A na e naa wa Egypt tra nu kaa ki prɔ. O Tafun Nyiɛkpɔɔ paan mbe e ŋga kaara mbe e ka. 19 A ki n pe ble nunu, ndee blee shiin, ndee kunɔ, ndee kɛ, ndee fulo ee yi taa ka. 20 Ee yi ka mbra shie nyiɛpɔ, mbe sɛ su na yie na yilii e maalɛɛ, mbe yi kee e bin. Ŋgi na hin? E e Tafun Nyiɛkpɔɔ ŋmba wi e nu wre je, mu na taanri u na na yuu na, yira ŋgi ki tia o na yili Egypt tra nu wo?” 21 A Moses na kna mbo, “Leele mblɛ mi na pre shie ŋga we pe leele kagbenyi lafɛɛ kɔɔnanu, a mna yuu na mu pe ŋga kaara mbe pe ka nyiɛpɔ poŋgo. 22 Nui, na mbaala mni oo ta mbe gbo mbe pe pe da hin? Na o epo mbroe wɔ kro kuraa, pia pe da.” 23 A o Tafun Nyiɛkpɔɔ na yo Moses pan mbo, “Sena ni jaŋga wa jaa da hin? Fuŋga mu chin na ŋga ni yuu kre we jaa pe ndee, kia jaa pe.”

24 A Moses na yiri wa mna sɛ kee nyjɛ o Tafun Nyiɛkpɔɔ na yo u pan yire kro yo leele pre pan. A wra leele fuloe taarɛ na kɛ pre wɔ, a pra pan mu fni Fninyuŋgo kre yɛsimi. 25 A o Tafun Nyiɛkpɔɔ na tii, a tlo, na wree na u tɔ poŋgo, a wra Moses ŋumu ŋmba u nu wre ka wɔ mu le loplombo fuloe taarɛ na kɛ pre nu. Ŋga ŋumu wre na le pe nu kre, a praa kee nyaa na yuu, la, ŋga pra kɔ wa kre, pe nsra kee nya mu yo na.

26 Bilɛ fuloetaarɛ na kɛ mblɛ pra wɔ pre shiin plɛ, Eldad, na Medad, pre nsra sɛ Fninyuŋgo kre yɛsimi wa ka, pra kro pe tni haa wa. A Ŋumu wre na sɛ le pe nu wa, a praa kee nyaa na yuu na. 27 Bawa yirifuŋu wa na fɛ mna pan mu yo Moses pan mbo, “Le, Eldad na Medad wa pe tni haa wa na kee nyaa na yuu.” 28 A Nun biblɔ Joshua ŋmba wraa yaa Moses na, mu yire u yirifum nyjila kre na kna mu yo Moses pan mbo, “Ni tafun, paara pe pan mbe pe nyu tɔ wa.” 29 A Moses na kna mu yo u pan mbo, “Kena mi ŋmbee mu wii ŋgaa? Na kra da mi na, mbe o Tafun Nyiɛkpɔɔ na u Ŋumu le u leele pre kro nu, mbe praa u kee nyaa mbra yuu.” 30 A Moses na loplombo pre na ndru mna sɛ pe tnihaa wa.

31 O Tafun Nyiɛkpɔɔ na tia fuflɛ ka na gbun mu tro epo yiɛ na, mna pan na hanyiɛlɛ bɛɛlɛ bɛɛlɛ plɛ ni, a praa yiri na tro tra yiɛ na mbe pe fiiti taarɛ. Pra wo leele pre tni haa wa poŋgo, hali mu sɛ kie pe kɔnsni tataara mu fɛ mu ku. 32 Ki ble kre, pra pe koli chiin hali ble na wɔ na pee wa na kolii, a nyiŋge na pan mu se na pee wa na pe kolii. Na wa yo u n koli kuraa kre, kre ma zaabɔtɔe kɛmbɔkunɔ, a pra pe chali chia kre letee na kro mu tro. 33 Nyjila ŋga nu praa kaa poŋgo kre, pe n na ta mu yi jɔli kuraa kple, a o Tafun wre krɔ na yiri, a wra tia yira na le pe nu poŋgo. 34 Ki tia pra kre lawee kre mɛɛ tɛɛ Kibroth-Hattaavah,^a ŋgi na hin? Bawa pra mblɛ pra kaara yire ka jajaara ni pre le. 35 Ŋga pra yiri Kibroth-Hattaavah na kre a pra sɛ Hazeroth na mna tni wa na.