Swafiŋge Bnɔɛ
10
A o Tafun Nyiɛkpɔɔ na yo Moses pan mbo, 2 “Swafiŋge gbun mu tɛɛ mu bnɔɛ shiin pe, na ki pan na ee eyɛ yeeri mbe fni, ndee mbe kɔ e titɛɛ kre, yire ni ee na leele pre yeeri. 3 Kena na e bnɔɛ shiin yire waa chaa mu tin kre, kena leele pre kro fna mbe paan e fni Fninyuŋgo kre jlonwee nyu na. 4 La, na pe waa ki nunu chom fɔ, kena jlom loplombo pre e yeeri mbe paan fni na e ni. 5 A na pe waa bnɔ nunu fɔ gbru, kena mblɛ pee wa mu tni na shie yila finhaa pre fna mbe yiri. 6 A na pe waa nunu fɔ gbru gbru shiin, mbe mblɛ pee wa tapan haa pre yiri mbe taa. Kena bnɔ tiŋge yire na ee yire mbe chiin na yiri. 7 La, na ee leele pre kro yeeri mbe paan fni kre, bnɔɛ yire tiŋge fna mbe tnu. 8 Aaron bibilɛ mblɛ lɛ srawɔfɛɛnlɛ pre pie na bnɔɛ yire foo. Yire mbra nyjɛ na ki fna e taa, hali mbe sɛ su nyjila kro nu. 9 Na e waa le waŋgra ŋga nu e shie kre nu, a ki pan na ŋunɔ kun yire na e loŋgoolo mblɛ pe e fiŋge pre lalaa, e bnɔɛ yire fɔ. Na ki pan ma, e Tafun Nyiɛkpɔɔ wre we e sɔɔnri, mbe e shɔ e loŋgoolo pre kɛɛ. 10 E na yi foo e yɛshɔɔrɔ ble, e ble kpɔɛ nyjɛ e lii yire, na nyiɛpɔ fɔŋgɔ ble nyjɛ e lii yire nu. A na e yurɛ sroo sra woni, ndee na wejinyiŋge sra woni kre, e na yi foo. Na ki pan ma mbe e sɔɔnri na. Mi wi. Mi wi e Tafun Nyiɛkpɔɔ wre.”Israel Leele Flo Sinai Nyua Kre Lawee
11 Yɛlɛ shiinwo kre, ki nyiɛpɔ shiinwo kre ble fulo na, kre tlo kre na kɔ mu laa Fninyuŋgo kre ndra na. 12 A Israel leele pre na kɔ Sinai tablɔ tra kre nu mna taa tlo kre na, a kra kila na pe ni chiin mna sɛ yire Paran tablɔ tra kre nu. 13 Kre na yi jle ŋga pra yire o Tafun Nyiɛkpɔɔ nyu kee ŋga wra yo Moses pan na, mna kɔ pe titɛɛ.
14 Judah kɛwolo pre pra yiɛklu, a pe fraŋgaa na yiɛklu pe pan. Pe lopom na wi Amminadab biblɔ Nahshon wre. 15 Zuar biblɔ Nethanel na wi Issachar kɛwolo lopom. 16 A Helon biblɔ Eliab na wi Zebulon kɛwolo pre lopom.
17 Pra fninyuŋgo kre klɔ, a Gershon, na Merari kɛwolo pre na ki tio mna taa.
18 A Reuben kɛ leele na taa, Shedeur biblɔ Elizur na wi pe lopom. 19 A Zurishaddai biblɔ Shelumiel na wi Simeon kɛwolo lopom. 20 A Deuel biblɔ Eliasaph na wi Gad kɛwolo lopom.
21 A Kohath kɛwolo pre na taa, mna Fninyuŋgo kre yirɛ cheche yire tio. Na pe shie, pre naa yo pie da mna pie tni kre, na pe Yoŋgo Nyuŋgo kre kan mu kɔ. 22 A Ammihud biblɔ Elishama na taa mu yiɛklu na Ephraim kɛwolo pre ni. 23 A Pedahzur biblɔ Gamaliel na wi Manasseh kɛwolo pre lopom. 24 A Gideoni biblɔ Abidan na wi Benjamin kɛwolo pre lopom.
25 Mblɛ pra kro tɔ pe nu na lɛ Dan kɛwolo. Kena Ammishaddai biblɔ Ahiezer na wi pe lopom, a pra taa pe kro na pe le pra shie. 26 Ocran biblɔ Pagiel wra yiɛklu na Asher kɛwolo pre ni. 27 A Enan biblɔ Ahira na wi Naphtali kɛwolo pre lopom. 28 Kena imi na Israel leele pre na kɔ pe tni haa mna taala peyɛ na na yi kre.
29 Moses na yo u nafun blɔ Hobab ŋmba lɛ na wi Midian blɔ ŋmba praa yeeri Reuel wre pan mbo, “O paan mbe kɔ mna mbe sɛ tra ŋga kee o Tafun Nyiɛkpɔɔ na yo na we o ŋga kre na. Kena ti mbe o sɛ, wa wa mu pe sisaa. Ŋgi na hin? O Tafun Nyiɛkpɔɔ nyu chichiele yo wre Israel leele pan.” 30 A wra je mbo, “Ɔɔhɔn, mba sɛ, mbe ndru mbe sɛ ni wolo pan o waŋgra nu.” 31 A Moses na u tali mbo, “Jande, maa laa o kro mbe sɛ, lawee nyjɛ nu oo tni tablɔ tra ŋga nu kro, mu bawa chin, kena mu jaa yiɛklu na o ni. 32 Na mu tia wre na ŋu sɛ, yirɛ chichiele nyjɛ o Tafun Nyiɛkpɔɔ we o ŋga kro, oo mu ŋga yɛ.”
33 A pra yiri o Tafun Nyiɛkpɔɔ nyua kre jaara, mna nyaari ble taarɛ kolo. A o Tafun Nyiɛkpɔɔ Nyu Nunu Daka kre na yiɛklu pe pan ble taara yire nu mbe pe nyina mna pie tni. 34 Na nyiŋge se pra shie kre o Tafun Nyiɛkpɔɔ tlo kre naa wa mu pe juule. 35 Nyjila ŋga nu daka kre we na shie kpan, mbe Moses yo leele pre pan mbo,
“O Tafun Nyiɛkpɔɔ yiri sholo,
mu loŋgoolo pre gbun
mu nyina o yiɛ,
ti mbe pe fɛ,
mbe yili mu yiɛ.”
36 A na daka kre waa yire kre, mbe u yo mbo,
“O Tafun ndru mu pan,
mu mu leele
kagbenyi kagben pre le.”