Klɛntro Ble Lie
9
Ŋga Israel leele pre na yili Egypt tra nu kre, ki yɛlɛ shiinwo kre nyiɛpɔ jlewo kre nu, o Tafun Nyiɛkpɔɔ na paara Moses pan Sinai nyua kre na fimi tra kre nu mbo, 2 “Ti mbe Israel leele pre Klɛntro ble kre yɛlɛ nyu li. 3 Nyiɛpɔ jlewo kre ble kɛmbɔjijirɛwo kre yilakɔŋgɔ nyu na ki fna e ble lie kre nɔɔ hle. E ble kre li kolo ŋga ni e nyina kre na.” 4 A Moses na ki yo Israel leele pre pan mbe pe Klɛntro ble kre yɛlɛ nyu li. 5 A pra Klɛntro ble kre yɛlɛ nyu li kre yɛlɛ shiinwo kre nyiɛpɔ jlewo kre ble kɛmbɔjijirɛwo kre yilakɔŋgɔ, Sinai tablɔ tra kre nu. Pra ki li imi na o Tafun Nyiɛkpɔɔ na pe nyina kre. 6 Pe plɛ nsra ja mna ble kre li, ŋgi na hin? Na pe da gboo na, ki tia pe nsra pe cheche paala kolo na. Ki tia pra pan Moses na Aaron pan ki ble kre, 7 mna pan mu wie mbo, “O da gboo na mu oyɛ tɔ nɛɛrɛ ni. Kena ŋgi ki tia wre na Israel leele pre wa jaa chaa mbe sra wɔ mbe o Tafun Nyiɛkpɔɔ ŋga nyjila nunu na hin?” 8 A Moses na yo mbo, “E shie mbe ni o Tafun Nyiɛkpɔɔ wie tun, mbe loo kee ŋga we yo.”9 O Tafun Nyiɛkpɔɔ na yo Moses pan mbo, 10 “Yo Israel leele pre pan na pe wa waa da gboo na, ndee na u kolo kun mu sɛ haalee a kia ti u jaa ble kre li kre, 11 pie jaa ble kre li ki nyiɛpɔ ŋga kie taa kre ble kɛmbɔjijirɛwo kre yilakɔŋgɔ nyu na. Ki fna pe wrɛ susrom, na paanu ŋga pe n fɔ na yiisi ni tɛɛ mbe mbɔɔ wre ka. 12 Pia shia mbɔɔ wre ka mbe ka ti mbe nyiŋge ki se, a pia shia u kajle ja. Ki fna mbe pe taa Klɛntro ble lie mbra yire kolo na imi na ki fna. 13 La na wa n le nɛɛrɛ nu, a u n wa kolo kɔɔn nu, a u je u n Klɛntro ble kre li kre, ki n fna mbe u pe Nyiɛkpɔɔ ndro na. Ŋgi na hin? Ufun wre n sra ŋga ki fna u wɔ nyjila ŋga ki fna nu kre wɔ mu o Tafun Nyiɛkpɔɔ ŋga. Kre ndro wre fna mbe u sisaa ŋga u pe kre fɔtɔɔrɔ ta. 14 A na fuŋuu wa e nu na chaa mbe Klɛntro ble kre ka li kre, ki fna mbe u li ki mbra yire kro na. Mbra nunu kre chɔɔ na yire na e fumblɔ kro fna mbe taa.”
Tlo Ŋga Ki Israel Leele Nyina Kolo
15 Ŋga ble pra Yoŋgo Nyuŋgo kre yire mu kan sholo kre, ki ble kre tlo kre na pan mu ki tɔ poŋgo. A mu yire yilakɔŋgɔ kre mu sɛ su ki nyisee nyu na, pan kra pe na kanhun yi. 16 Kena pan kraa piin nyjila kro nu, tlo kre naa wa Yoŋgo Nyuŋgo kre ndra na, na ble wɔ, mbe ki kaari kanhun. 17 Kena na tlo kre kɔ mu laa Yoŋgo Nyuŋgo kre ndra na na shie kre, mbe pe taa ki na. A mna kie da mbe yire kpan, kena bawa pie tni mbe pe yonyi nyinyi kan kan mbe tni wa. 18 Kena o Tafun Nyiɛkpɔɔ nyu kee na praa taari, mna we yo pe tni kre, bawa pie tni. Kena na tlo kre ma ki kɔ ki titɛɛ na shie, bawa pie kro mbe tni. 19 Kena na tlo kre waa kro Yoŋgo Nyuŋgo kre na mu mu kre, pan pie mu kre ndoo kre nu imi na o Tafun Nyiɛkpɔɔ chaa. 20 Nyjila ka nu tlo kre wa mu, kena na pie mu pe titɛɛ, na pia mu, o Tafun Nyiɛkpɔɔ wre pan ki nyi. 21 Nyjila ka nu tlo kre we yire titɛɛ yilakɔŋgɔ, na nyiŋge waa na sii mbe ki kɔ. Kena na ki kɔ bnimi o, ndee na blee yi o, na lafo na yi o, nyjila ŋga nu tlo kre we kɔ ki titɛɛ mbra shie kpan, ki fna mbe pe yiri mbe taa ki na. 22 Kena na wɔmu kre we kro Yoŋgo Nyuŋgo kre na ble shiin o, na nyiɛpɔ yi o, na yɛlɛ nyu yi o, Israel leele pre we kro pe titɛɛ mbe sɛ su na kie kɔ ki titɛɛ mbe pe chiin kɔ wa mbe taa ki na. 23 Kena na pie tni lawee ka nu o, o Tafun Nyiɛkpɔɔ nyu kee na pie taa, a na pie sɛ naa, u nyu ŋga we yo Moses pan kre na pie taa.