Suminyuŋgo Kre Kania
8
A o Tafun Nyiɛkpɔɔ na yo Moses pan mbo, 2 “Yo Aaron pan na na u kania kɔɔnashin yire kan kre, u ti mbe yira nyini mbra nyaa yɛsimi.” 3 A Aaron na yi pe ma. Wra kania kɔɔnashin yire kan kan a yiraa nyaa yɛsimi imi na o Tafun Nyiɛkpɔɔ na Moses nyina kre. 4 Swanyiɛ pra nya mna tɛɛ mu kania kaan kre pe. Mu yire ki nɔɔ na mu sɛ su ki ndra na, swanyiɛ ni pra tɛɛ mu ki pe, imi na o Tafun Nyiɛkpɔɔ na Moses nyina kre.Pe Levi Leele Pre Fa Olive Simi
5 A o Tafun Nyiɛkpɔɔ na yo Moses pan mbo, 6 “Levi leele pre wɔ mu yili Israel leele pre nu, mu pe pe cheche. 7 Imi na mu pe pe yi kre, nyumu cheche ŋga ni pe sisam jee na laari kre nyaara pe na. Mu ti mbe pe pe nyjure nyjɛ yii wa pe na kro klu, mbe pe yirɛ kro je mbe peyɛ pe cheche. 8 Ti mbe pe pan na nablɛm pɔlɔ, na paanu mimi ŋga nu pe olive simi chaa ni, mbe mu nablɛm pɔlɔ shiinwo shɔ mbe tɛɛ mbe sisam sra wɔ. 9 Mbe mu ti mbe Israel leele pre kro pan mbe fni Fninyuŋgo kre yɛsimi, mbe mu ti Levi leele pre yiri mbe yire ki yiɛ. 10 Na mu pan na Levi leele pre ni o Tafun Nyiɛkpɔɔ yiɛ kre, mbe mu ti mbe Israel leele pre kɛ taa taa pe na, 11 mbe Aaron Levi leele pre wru mbe le o Tafun Nyiɛkpɔɔ wre kɛɛ na srayira ŋga pe viŋge Nyiɛkpɔɔ yiɛ, a Israel leele pre na ki woni na o Tafun Nyiɛkpɔɔ kaan. Kena pe ja mbe o Tafun Nyiɛkpɔɔ wre tnumu tun.
12 Fuŋga Levi leele pre we pe kɛnyi taa taa nablɛm pre na, mbe pe wru mbe le o Tafun Nyiɛkpɔɔ kɛɛ. Nunu we pe sisam sra yurɔ, mbe pe nunu wre tɛɛ mbe yurɛ sroo srawɔ, mbe tɛɛ mbe nɛɛrɛ kro wɔ pre na Nyiɛkpɔɔ lalaa. 13 Mbe mu ti mbe Levi leele pre yire Aaron na u biile yiɛ, mbe mu pe wru mbe le o Tafun Nyiɛkpɔɔ kɛɛ na srayira ŋga pe viŋge mbe o Tafun Nyiɛkpɔɔ wre ŋga yi.
14 Kena kre kolo ŋga na mu tro mbe Levi leele pre wɔ mbe yili Israel leele pre nu mbe pe pe ni wolo. 15 Na maa pe pe cheche mu kɔ kre, fuŋga pie ja mbra lee Fninyuŋgo kre nu mbra pe tnumu tuni. 16 Pre ni wɔ Israel leele pre nu mu ni yɛ ŋga, mbe pe yire Israel leele pre bijloe bilɛ kro jeelee na. 17 Ŋga ndaa Egypt leele bijloe bilɛ gbo kro kre, kre ndaa yo na Israel leele pre bijloe bilɛ kro, ni wolo lɛ, na ndro wi o, na yurɔ wi o, ni wo wi. 18 Kena ni Levi leele pre wɔ mu tɛɛ Israel leele bijloe bilɛ titɛɛ. 19 Kena ni Levi leele pre kro wɔ mu yili Israel leele pre nu mu le Aaron na u biile kɛɛ, mbe praa tnumu tuni Fninyuŋgo kre nu mbra tinkɛɛ sra woni mbra pe kaan, imi kie pe na pe wa da Cheche Ndoo kre na kre, mbe sisaa ka wa u da.”
20 Moses na Aaron, na Israel leele pre kro, na Levi leele pre wru mu le o Tafun Nyiɛkpɔɔ kɛɛ imi na wra ki yo Moses pan kre. 21 Levi leele pre na peyɛ pe cheche mna pe yirɛ je, a Aaron na pe wru mu le o Tafun Nyiɛkpɔɔ kɛɛ na sra ŋga pe viŋge Nyiɛkpɔɔ yiɛ yi, mna nyu nunu sra wɔ mna pe pe cheche. 22 Mu yire kre ble kre Levi leele pre na nɔɔ hle na Fninyuŋgo kre tnumu tuni, a Aaron na u biile pre naa pe le. Kena tnumu nyjɛ kee o Tafun Nyiɛkpɔɔ na yo Moses pan kre, yire praa pini.
23 A o Tafun Nyiɛkpɔɔ na yo Moses pan mbo, 24 “Blɔ ŋmba u da yɛlɛ fulo na kunɔ na shie kro we jaa paan tnumu tun Fninyuŋgo kre nu. 25 La, na wa da yɛlɛ lafaa na fuloe shiin na kunɔ kre, ki fna u laa mbe sɛ tni mbe wuu, mbe wa tnumu tun wa na. 26 Na wa sɛ wuuhaa kre, we jaa na yaa u wolo Levi leele pre na, mbe praa pe tnumu tuni Fninyuŋgo wa, la, wa tnumu kre shɔ mbe tun wre titi. Kena imi o Tafun Nyiɛkpɔɔ na tia Moses na pe nyina pe tnumu yi kre.”