Suminyuŋgo Sra Wɔɔ
7
Ŋga ble Moses na Suminyuŋgo kre yire sholo mu kɔ kre, a wra kre na yirɛ nyjɛ yiraa wa ki nu kro nyu nyaa, mna sragbunu kre, na ki kotie yire kro pe cheche mu Nyiɛkpɔɔ ŋga. 2 Fuŋga Israel loplombo pre, na pe jlom loplombo mblɛ pra yiɛ klu mu leele pre tɔɔnri pre kro na pan na pe srayirɛ ni, 3 mna pan mu o Tafun Nyiɛkpɔɔ ŋga. Yirɛ nyjɛ ni pra pan yire naa sookɛɛ kɔɔnanu, na nui kɛmbɔshiin. Ndro nunu na pan na nuu nunu ni, a pe shiin shiin na taala mna sookaa nununu wɔ. A pra pan na pe ni Suminyuŋgo kre yɛsimi. 4 A o Tafun Nyiɛkpɔɔ na yo Moses pan mbo, 5 “Yirɛ yire shɔ, mbe e yi tɛɛ mbe Fninyuŋgo kre tnumu tun. Yi yɔɔlɛ mu Levi leele pre ŋga imi na pie jaa yi tɛɛ mbe tnumu tun mbe da.” 6 A Moses na sookɛɛ yire na nui pre shɔ mna pe yɔɔlɛ mna Levi leele pre ŋga. 7 Wra sookɛɛ shiin, na nui jijirɛ wɔ mu Gershon wolo pre ŋga, imi na pe tnumu da wra le. 8 Mna sookɛɛ jijirɛ, na nui kɔɔnatarɛ wɔ mu Merari wolo pre ŋga, imi na pe tnumu da wra le. Srawɔfun Aaron pɔ Ithamar wraa wa pe nyu na. 9 Moses n na Kohath leele pre ŋga yaka, ŋgi na hin? Pre praa Fninyuŋgo kre, na ki yirɛ kro tru patia na.10 Ŋga pra olive simi wo sragbunu kre na mna ki wru mbe le Nyiɛkpɔɔ kɛɛ kre, loplombo pre kro na pan na pe sra yirɛ ni sragbunu kre yiɛ. 11 A o Tafun Nyiɛkpɔɔ na yo Moses pan mbo, “Yo loplombo pre pan mbe praa paan na pe srayirɛ ni mbra taala blenyini mbe yi tɛɛ mbe sragbunu kre nyu nyaa.”
12 Kena ble ŋga kra yiɛ klu kre, Amminadab pɔ Nahshon wra pan na u sra yirɛ ni. Wre na wi Judah jlom kre lopom. 13 Sra yirɛ nyjɛ ni wra pan na yi, swafiŋge kotolo ŋga snam kie pe kradnɛ taarɛ, na swafiŋge kotolo ŋga nu pie na nyimi leni mbra nyaara kre, ki snam we pe kradnɛ shiin. Kena yire kotie shiin nyjɛ nu pe mimi chichie, na olive simi chaai mbe tɛɛ mbe shɔlɔ sra wɔ. 14 Kre na swanyiɛ kotolo ŋga snam kia da kradnɛ yɔɔ ni, mbe pe tuwe ndiom taan le ki nu, 15 na nablɛm pɔlɔ, na mbaplɔ ŋmba u lɛ, na mbaplɔ ŋmba u li yɛlɛ nunu, mbe pe pe sro mbe tɛɛ mbe sra wɔ mbe Nyiɛkpɔɔ ŋga, 16 mbe kaplɔ tɛɛ mbe sisam sra wɔ. 17 Na nablɛm shiin, na mbapilɛ kunɔ, na sikapilɛ kunɔ, na mbapɔɛlɛɛ bilɛ kunɔ mblɛ pe li yɛlɛ nununu, mbe pe pe tɛɛ mbe wejinyiŋge sra wɔ. Kena yire yirɛ nyjɛ ni Amminadab pɔ na tɛɛ mna sra wɔ.
18 Ble shiinwo kre na, a Zuar pɔ Nethanel ŋmba na wi Issachar jlom yɛklo wre na pan na u sra wɔyirɛ ni. 19 Sra yirɛ nyjɛ ni wra pan na yi, swafiŋge kotolo ŋga snam kie pe kradnɛ taarɛ, na swafiŋge kotolo ŋga nu pe nyimi leni na nyaara, ki snam we pe kradnɛ shiin. Kena yire kotie shiin nyjɛ nu pe mimi chichie, na olive simi chaai mbe tɛɛ mbe shɔlɔ sraa wɔ. 20 Kre na swanyiɛ kotolo ŋga snam kie kro chiɛri mbe da kradnɛ yɔɔ. Mbe pe tuwe ndiom taan le ki nu, 21 na nablɛm pɔlɔ, na mbaplɔ ŋmba u lɛ, na mbaplɔ ŋmba u li yɛlɛ nunu, mbe pe u tɛɛ mbe yirɛ sroo sra wɔ mbe Nyiɛkpɔɔ ŋga. 22 Na kaplɔ ŋmba pie tɛɛ mbe sisam sra wɔ. 23 Na nablɛm shiin, na mbapilɛ kunɔ, na sikapilɛ kunɔ, na mbapɔɛlɛɛ kunɔ mblɛ pe li yɛlɛ nununu, mbe pe pe tɛɛ mbe wejinyiŋge sra wɔ.
24 Ble taarɛwo kre na, Helon pɔ Eliab ŋmba wra pe Zebulun jlom kre yɛklo wre wra pan na u sra wɔyirɛ ni. 25 Sra yirɛ nyjɛ ni wra pan na yi, swafiŋge kotolo ŋga snam kie pe kradnɛ taarɛ, na swafiŋge kotolo ŋga nu pe nyimi leni na nyaara kre, ki snam we pe kradnɛ shiin. Kena yire kotie shiin nyjɛ nu pe mimi chichie, na olive simi chaai mbe tɛɛ mbe shɔlɔ sra wɔ. 26 Kre na swanyiɛ kotolo ŋga snam kia da kradnɛ yɔɔ, mbe pe tuwe ndiom taan le ki nu. 27 Na nablɛm pɔlɔ, na mbaplɔ ŋmba u lɛ, na mbaplɔ ŋmba u li yɛlɛ nunu, mbe pe pe tɛɛ mbe yirɛ sroo sra wɔ mbe Nyiɛkpɔɔ ŋga. 28 Mbe kaplɔ tɛɛ mbe sisam sraa wɔ. 29 Mbe nablɛm shiin, na mbapilɛ kunɔ, na kapilɛ kunɔ, na mbapilɛ kunɔ mblɛ pe li yɛlɛ nununu, mbe pe tɛɛ mbe wejinyiŋge sra wɔ.
30 Ki ble jijirɛwo na, Shedeur pɔ Elizur ŋmba na wi Reuben jlom lopom wre na pan na u srayirɛ ni. 31 Sra yirɛ nyjɛ ni wra pan na yi, swafiŋge kotolo ŋga snam kie pe kradnɛ taarɛ, na swafiŋge kotolo ŋga nu pe nyimi leni na nyaara, ŋga snam kie pe kradnɛ shiin. Kena yire kotie shiin nyjɛ nu pe mimi chichie, na olive simi chaai mbe tɛɛ mbe shɔlɔ sra wɔ. 32 Kre na swanyiɛ kotolo ŋga snam kia da kradnɛ yɔɔ, mbe pe tuwe ndiom taan le ki nu, 33 na nablɛm pɔlɔ, na mbaplɔ ŋmba u lɛ, na mbaplɔ ŋmba u li yɛlɛ nunu, mbe pe pe tɛɛ mbe yurɛ sroo sra wɔ mbe Nyiɛkpɔɔ ŋga. 34 Mbe pe kaplɔ tɛɛ mbe sisam sra wɔ. 35 Mbe nablɛm shiin, na mbapilɛ kunɔ, na sikapilɛ kunɔ, na mbapilɛ kunɔ mblɛ pe li yɛlɛ nununu, mbe pe pe tɛɛ mbe wejinyiŋge sra wɔ.
36 Ki ble kunɔwo na, Zurishaddai pɔ Shelumiel ŋmba wra pe Simeon jlom lopom wre na kra da, a wra pan na u sra wɔyirɛ ni. 37 Yirɛ nyjɛ ni wra pan na yi, swafiŋge kotolo ŋga snam kie pe kradnɛ taarɛ, na swafiŋge kotolo ŋga nu pe nyimi leni na nyaara, ki snam we pe kradnɛ shiin. Kena yire kotie shiin nyjɛ nu pe mimi chichie, na olive simi chaai mbe tɛɛ mbe shɔlɔ sra wɔ. 38 Kre na swanyiɛ kotolo ŋga snam kie kro chiɛri mbe da kradnɛ yɔɔ, mbe pe tuwe ndiom taan le ki nu, 39 na nablɛm pɔlɔ, na mbaplɔ ŋmba u lɛ, na mbaplɔ ŋmba u li yɛlɛ nunu, mbe pe pe tɛɛ mbe yurɛ sroo sra wɔ mbe o Tafun Nyiɛkpɔɔ ŋga. 40 Mbe pe kaplɔ tɛɛ mbe sisam sra wɔ. 41 Mbe nablɛm shiin, na mbapilɛ kunɔ, na sikapilɛ kunɔ, na mbapilɛ kunɔ mblɛ pe li yɛlɛ nununu, mbe pe pe tɛɛ mbe wejinyiŋge sra wɔ.
42 Ki ble kɔɔnanu ble na, Deuel pɔ Eliasaph ŋmba wra pe Gad jlom kre lopom, wre wra pan na u srayirɛ ni. 43 Sra yirɛ nyjɛ ni wra pan na yi, swafiŋge kotolo ŋga snam kie pe kradnɛ taarɛ, na swafiŋge kotolo ŋga nu pe nyimi leni na nyaara, ki snam we pe kradnɛ shiin. Yire kotie shiin nyjɛ nu pe mimi chichie, na olive simi chaai, mbe tɛɛ mbe shɔlɔ sra wɔ. 44 Kre na swanyiɛ kotolo ŋga snam kia da kradnɛ yɔɔ, a pra tuwe ndiom taan le ki nu, 45 na nablɛm pɔlɔ, na mbaplɔ ŋmba u lɛ, na mbaplɔ ŋmba u li yɛlɛ nunu, mbe pe pe tɛɛ mbe yurɔ sroo sra wɔ mbe Nyiɛkpɔɔ ŋga. 46 Mbe kaplɔ tɛɛ mbe sisam sra wɔ. 47 Na nablɛm shiin, na mbapilɛ kunɔ, na kapilɛ kunɔ, na mbapilɛ kunɔ mblɛ pe li yɛlɛ nununu, mbe pe pe tɛɛ mbe wejinyiŋge sra wɔ.
48 Ble kɔɔnashin wo na, Ammihud pɔ Elishama ŋmba wra pe Ephraim jlom kre lopom na kra da, a wra pan na u srayirɛ ni. 49 Sra yirɛ nyjɛ ni wra pan na yi, swafiŋge kotolo ŋga snam kie pe kradnɛ taarɛ, na swafiŋge kotolo ŋga nu pe nyimi leni na nyaara, kie pe kradnɛ shiin. Yire kotie shiin nyjɛ nu pe mimi chichie, na olive simi chaai mbe tɛɛ mbe shɔlɔ sra wɔ. 50 Na swanyiɛ kotolo ŋga snam kia da kradnɛ yɔɔ, a pe tuwe ndiom taan le ki nu, 51 na nablɛm pɔlɔ, na mbaplɔ ŋmba u lɛ, na mbaplɔ ŋmba u li yɛlɛ nunu, mbe pe pe tɛɛ mbe yurɛ sroo wɔ mbe Nyiɛkpɔɔ ŋga. 52 Mbe pe kaplɔ tɛɛ mbe sisam sra wɔ. 53 Na nablɛm shiin, na mbapilɛ kunɔ, na sikapilɛ kunɔ, na mbapilɛ kunɔ mblɛ pe li yɛlɛ nununu, mbe pe pe tɛɛ mbe wejinyiŋge sra wɔ.
54 Ki ble kɔɔnatarɛwo na, Pedahzur pɔ Gamaliel ŋmba wra Manasseh jlom yɛklo wre na kra da, a wra pan na u srayirɛ ni. 55 Sra yirɛ nyjɛ ni wra pan na yi, swafiŋge kotolo ŋga snam kie pe kradnɛ taarɛ, na swafiŋge kotolo ŋga nu pe nyimi leni na nyaara, snam we pe kradnɛ shiin. Kena yire kotie shiin nyjɛ nu pe mimi chichie, na olive simi chaai mbe shɔlɔ sra wɔ. 56 Na swanyiɛ kotolo ŋga snam kia da kradnɛ yɔɔ, a pe tuwe ndiom taan le ki nu. 57 Na nablɛm pɔlɔ, na mbaplɔ ŋmba u lɛ, na mbaplɔ ŋmba u li yɛlɛ nunu, mbe pe tɛɛ mbe yurɛ sroo sra wɔ mbe Nyiɛkpɔɔ ŋga. 58 Na kaplɔ, mbe pe u tɛɛ mbe sisam sra wɔ. 59 Na nablɛm shiin, na mbapilɛ kunɔ, na sikapilɛ kunɔ, na mbapilɛ kunɔ mblɛ pe li yɛlɛ nununu mbe pe pe tɛɛ mbe wejinyiŋge sra wɔ.
60 Ble kɔɔnanyjirɛwo na, Gideoni pɔ ŋmba praa yeeri Abidan, a wra pe Benjamin jlom lopom wre na kra da, a wra pan na u srayirɛ ni. 61 Sra yirɛ nyjɛ ni wra pan na yi, swafiŋge kotolo ŋga snam kie pe kradnɛ taarɛ, na swafiŋge kotolo ŋga nu pe nyumu leni na nyaara kre, ki snam we pe kradnɛ shiin. Yire kotie shiin nyjɛ nu pe mimi chichie, na olive simi chaai mbe tɛɛ mbe shɔlɔ sra wɔ. 62 Kre na swanyiɛ kotolo ŋga snam kia da kradnɛ yɔɔ, a pe tuwe ndiom taan le ki nu. 63 Na nablɛm pɔlɔ, na mbaplɔ ŋmba u lɛ, na mbaplɔ ŋmba u li yɛlɛ nunu mbe pe pe tɛɛ mbe yurɛ sroo sra wɔ mbe Nyiɛkpɔɔ ŋga. 64 Na kaplɔ ŋmba pie tɛɛ mbe sisam sra wɔ. 65 Na nablɛm shiin, na mbapilɛ kunɔ, na sikapilɛ kunɔ, na mbapilɛ kunɔ mblɛ pe li yɛlɛ nununu, mbe pe pe tɛɛ mbe wejinyiŋge sra wɔ.
66 Ble kɛ wo na, Ammishaddai pɔ Ahiezer ŋmba wra pe Dan jlom lopom wre na kra da mbe u sra wɔ. 67 Sra yirɛ nyjɛ ni wra pan na yi, swafiŋge kotolo ŋga snam kie pe kradnɛ taarɛ, na swafiŋge kotolo ŋga nu pe nyumu leni na nyaara, ki snam we pe kradnɛ shiin. Yire kotie shiin nyjɛ nu pe mimi chichie, na olive simi chaai mbe tɛɛ mbe shɔlɔ sra wɔ. 68 Na swanyiɛ kotolo ŋga snam kia da kradnɛ yɔɔ, a pe tuwe ndiom taan le ki nu, 69 na nablɛm pɔlɔ, na mbaplɔ ŋmba u lɛ, na mbaplɔ ŋmba u li yɛlɛ nunu, mbe pe pe tɛɛ mbe yurɛ sroo sra wɔ mbe Nyiɛkpɔɔ ŋga. 70 Na kaplɔ, mbe pe u tɛɛ mbe sisam sra wɔ. 71 Na nablɛm shiin, na mbapilɛ kunɔ, na sikapilɛ kunɔ, na mbapilɛ kunɔ mblɛ pe li yɛlɛ nununu, mbe pe pe tɛɛ mbe wejinyiŋge sra wɔ.
72 Ble kɛmbɔnunu wo na, Ocran pɔ Pagiel ŋmba na wi Asher jlom lopom wre na kra da, a wra pan na u srayirɛ ni. 73 Sra yirɛ nyjɛ ni wra pan na yi, swafiŋge kotolo ŋga snam kie pe kradnɛ taarɛ, na swafiŋge kotolo ŋga nu pe nyimi leni na nyaara, ki snam we pe kradnɛ shiin. Kena yire kotie shiin nyjɛ nu pe mimi chichie, na olive simi chaai mbe tɛɛ mbe shɔlɔ sra wɔ. 74 Na swanyiɛ kotolo ŋga snam kia da kradnɛ yɔɔ, a pe tuwe ndiom taan le ki nu. 75 Na nablɛm pɔlɔ, na mbaplɔ ŋmba u lɛ, na mbaplɔ ŋmba u li yɛlɛ nunu, mbe pe pe tɛɛ mbe yurɛ sroo sra wɔ mbe Nyiɛkpɔɔ ŋga. 76 Na kaplɔ mbe pe u tɛɛ mbe sisam sra wɔ. 77 Na nablɛm shiin, na mbapilɛ kunɔ, na sikapilɛ kunɔ, na mbapilɛ kunɔ mblɛ pe li yɛlɛ nununu, mbe pe pe tɛɛ mbe wejinyiŋge sra wɔ.
78 Ble kɛmbɔshiin ble na, kre Enan pɔ Ahira na pan na u srayirɛ ni. 79 Sra yirɛ nyjɛ ni wra pan na yi, swafiŋge kotolo ŋga snam kie pe kradnɛ taarɛ, na swafiŋge kotolo ŋga nu pe nyimi leni na nyaara, ŋga snam kie pe kradnɛ shiin. Yire kotie shiin nyjɛ nu pe mimi chichie, na olive simi chaai mbe tɛɛ mbe shɔlɔ sra wɔ. 80 Na swanyiɛ kotolo ŋga snam kie pe kradnɛ yɔɔ, a pe tuwe ndiom tɛɛn le ki nu. 81 Na nablɛm pɔlɔ, na mbaplɔ ŋmba u lɛ, na mbaplɔ ŋmba u li yɛlɛ nunu, mbe pe pe tɛɛ mbe yurɛ sroo sra wɔ mbe Nyiɛkpɔɔ ŋga. 82 Na kaplɔ, mbe pe u tɛɛ mbe sisam sra wɔ. 83 Na nablɛm shiin, na mbapilɛ kunɔ, na sikapilɛ kunɔ, na mbapilɛ kunɔ mblɛ pe li yɛlɛ nununu mbe pe tɛɛ mbe wejinyiŋge sra wɔ.
84 Kena ŋga pra olive simi wo sragbunu kre na, mu ki wru mbe le o Tafun Nyiɛkpɔɔ wre kɛɛ kre, sra yirɛ nyjɛ Israel loplombo pre na wɔ yi kre, swafiŋge kotie kɛmbɔshiin, na swafiŋge kotie kɛmbɔshiin nyjɛ nu pe nyimi leni na nyaara kre, na swanyiɛ kotie kɛmbɔshiin. 85 Kena yire swafiŋge kotie yire kro snam na pe kradnɛ fuloe taarɛ. 86 Swanyiɛ kotie kɛmbɔshiin nyjɛ nu pra tuwe ndiom tɛɛn le, yi kro snam na pe kradnɛ taarɛ 87 Yurɛ mblɛ ni pra yurɛ sroo sra wɔ na pe nablɛm pɔɛlɛɛ kɛmbɔshiin, mbapilɛ kɛmbɔshiin, na mbapilɛ mblɛ pra li yɛlɛ nunu kɛmbɔshiin, mna wru mu ya shɔlɔ sra wɔ wee na. Na sikapilɛ kɛmbɔshiin. 88 Yurɛ mblɛ pra tɛɛ mna nyu nunu sra wɔ pre na pe nablɛm fulo na jijirɛ, mbapilɛ fuloe taarɛ, sikapilɛ kɔɔnanu, na mbapilɛ fuloe taarɛ mblɛ pe li yɛlɛ nununu. Kena ŋga pra olive simi wo sragbunu kre na kre, kre na yi sra ŋga pra wɔ mu sragbunu kre wru mu le o Tafun Nyiɛkpɔɔ wre kɛɛ.
89 Ŋga Moses na le Suminyuŋgo wa mbe wre na o Tafun Nyiɛkpɔɔ paara kre, bawa wra mana ka loo na ki paara u pan mu yiri Cherubim shiin pre praa wa o Tafun foorochin jɔɔn ŋga kraa wa Nyiɛkpɔɔ daka kre na kre lalaa.