5 Nyjila ŋga uu wa uyɛ wru ŋgaa daŋga kre nu kre, waa shia u ndra klu. Ki fna u pe cheche mbe sɛ su na ki nyu we to. Ki fna mbe u u ndra nyjure ti, mbe yi lɛ mbe tnutnu.

6 A kre nyjila kre we uyɛ wru mbe Nyiɛkpɔɔ ŋga kre, ki n fna mbe u da gboo na. 7 Hali na u lɛ, ndee u lo, ndee u nyjɔ, ndee u chunu ku, waa shia da gboo wre na mbe uyɛ tɔ nɛɛrɛ ni. Ŋgi na hin? U ndra nyjure yire pe sɛmbɛɛrɛ yira ŋga ki nyina na u uyɛ wru mu Nyiɛkpɔɔ ŋga. 8 Nyjila ŋga nu u uyɛ wru mu Nyiɛkpɔɔ ŋga kre, u pe cheche mu o Tafun Nyiɛkpɔɔ ŋga.

9 Na ki pan na ndro fo mu ku u yiɛ na, mu u nyjure yire tɔ na nɛɛrɛ ni kre, ki fna ki ble kɔɔnashin nyu na, mbe u u ndra kre klu, mbe nɛɛrɛ laa uyɛ na. 10 Ki ble kɔɔnatarɛ wo na, ki fna u pan na katoo kotulo, ndee nyaa kotulo shiin ni, mbe paan srawɔfun wre ŋga Suminyuŋgo kre jlonwee nyu na. 11 Kena srawɔfun wre nunu tɛɛ mbe u sisaa srawɔ, mbe nunu wre sro mbe sraa wɔ, mbe u ndra lɔ, ŋgi na hin? U sisaa pe na u gboo nya. Kre ble kre lam ki fna u nɛɛrɛ laa u ndra na. 12 Na u yo we ndru mbe uyɛ wru mbe le o Tafun Nyiɛkpɔɔ wre kɛɛ kre, ki fna mbe u pan na mbaplɔ ŋmba u li yɛlɛ ni, mbe tɛɛ mbe pimi srawɔ. Ŋgi na hin? Nyjɛ wra klu mu pe yire krɛrɛ kla. Wra uyɛ tɔ na nɛɛrɛ ni yire ble yire nu.

13 Kena na ble nyjɛ nu Nazirite ndro wre uyɛ wru mu Nyiɛkpɔɔ ŋga yire nyu waa to kre, ki fna pe pan na u ni Fninyuŋgo kre jlonwee nyu na. A paala ŋga ki fna u pe yi kre. 14 Ki fna u mbapɔlɔ blɔ ŋmba u n na fumnɔ, a u da yɛlɛ nyu wɔ, mbe pe u tɛɛ mbe yurɛ sroo srawɔ, mbe u mbapɔlɔ chlɔ ŋmba u n na fumnɔ, a u da yɛlɛ nyu tɛɛ mbe sisam sra wɔ, mbe mbaplɔ ŋmba u n na fumnɔ, a u da yɛlɛ nyu tɛɛ mbe wejinyiŋge sra wɔ. 15 Mbe u shɔlɔ sra yirɛ, na simi sra wɔ wo wɔ, mbe paanu nyjɛ nu yiisi n wa kakɛɛ nyini, na mahɛɛn nyjɛ pe mimi chichie, na olive simi chaa mu pe. Yire na yi nyjɛ pe pe na koose yi mu olive simi le yi nu yire ya yi na.

16 Kena srawɔfun wre pan na yi ni o Tafun Nyiɛkpɔɔ yiɛ mbe paan u sisaa, na yirɛ sroo srawɔ. 17 Kena u pan na paanu kakɛɛ nunu nyjɛ nu yiisi n wa yire ni Nyiɛkpɔɔ yiɛ, mbe mbaplɔ wre tɛɛ mbe nyu nunu srawɔ, mbe shɔlɔ, na simi gbɔwo srawɔ na mbe ya. 18 Kena nyjila ŋga ni uu wa mu yire Fninyuŋgo kre jlonwee nyu na wa kre, ki fna mbe pe u ndra nyjure yire klu, mbe sɛ yi le nyu nunu sra kre kanhun ŋga ki nyini kre nu.

19 Na Nazirite ndro wre waa u ndra kre klu mu kɔ kre, srawɔfun wre we mbaplɔ wre pɔɔ ŋga pe sɔɔ kre wɔ mbe le u kɛɛ, mbe paanu nunu, na koose nunu nyjɛ nu yiisi n wa wɔ kakɛɛ kre nu mbe ya u pan. 20 Kena srawɔfun wre yi tɛɛ mbe yirɛ viŋge sra wɔ o Tafun Nyiɛkpɔɔ yiɛ. Yire yirɛ nyjɛ srawɔfun wre wee yi, a yi pe cheche. Kena pe yurɔ wre nyinimi ŋga pe viŋge Nyiɛkpɔɔ yiɛ kre, na yurɔ wre jekpɔlɔ ŋga pe teeri Nyiɛkpɔɔ yiɛ kre wru mbe ya u pan. Kena na yire kee nyjɛ pe krɛrɛ pe mu kɔ, kre Nazirite ndro wre we chiin jaa simi gbɔwo taa nyu na.

21 Na Nazirite ndro wa uyɛ wru mu le o Tafun wre kɛɛ mu da na we yaka wɔ mbe u ŋga kre, ki n fna u kɔ u daŋga kre na. Ki fna u taa Nazirite leele mbra kre na.’”

22 Bawa o Tafun Nyiɛkpɔɔ na yo Moses pan mbo, 23 “Ti mbe Aaron, na u bibilɛ pre loo na, imi ki fna mbe e na Israel leele pre dwan mbe yo yi kre,

27 Kena na e ni mɛɛ tɛɛ mu Israel leele pre dwan kre, mbe pe dwan.”