5 O Tafun wre na yo Moses pan mbo, 6 “Ti mbe Israel leele pre loo, bilɛ na chiɛlɛ kro, pe ŋmba we u ŋmbrɔ pe sisaa, kena ufun pimi li ni yiɛ, ŋgi na hin? U n kpra li na nini. 7 Ki fna mbe ufun u sisaa kro yo, na yira u kla, mbe u ki fɔlɔ tɔ poŋgo. Mbe ki fɔlɔ kre yɔ knɔ, mbe ki yɔm nunu tɔ mbe ya ki na. 8 La, na ŋmba u pe sisaa wre ku, a leele n wa ufun pan mbe u fɔlɔ kre tɔ mbe pe ŋga naa, kena mi e Tafun Nyiɛkpɔɔ wo yi, kena fɔlɔ kre tɔ mbe srawɔfɛɛnlɛ pre ŋga, mbe mbaplɔ ya ki na, ŋmba ni pie tɛɛ mbe tinkɛɛ sra wɔ mbe u ŋga. 9 A cheche yirɛ nyjɛ ni Israel leele pre we paan srawɔfun kɛ kro, srawɔfun wre wee yi. 10 Cheche yira ŋga pie paan srawɔfun ŋga kro u wo yi mbe u ki wru.”

11 A o Tafun wre na yo Moses pan mbo, 12 “Yo Israel leele pre pan na, na ki pan na wa chɔ yili u kro, a u n kpra li na u ni, 13 mu sɛ sni na blɔ fuŋu pan, a u plɔ n ki chin, a ndro n u nya, 14 a ki pan na yenyjam tia blɔ wre na u chɔ wre jawa kre kee kre ni, na jawa na u chɔ wre u tɔ nɛɛrɛ ni, ndee na chlɔ wre n le nɛɛrɛ kre, 15 kena blɔ wre u sɛ na u chɔ wre ni srawɔfun wre yiɛ na, mbe u shɔlɔ mimi ŋga snam kie da kradnɛ shiin ya, mbe sɛ srawɔfun wre ŋga. Waa shia olive simi, ndee tuwe ndiom taan ya ki na, ŋgi na hin? Yi pe yenyjam srawɔɔ yira ŋga ni pie tɛɛ mbe kpra chin.

16 Kena srawɔfun wre we ti chlɔ wre yire o Tafun Nyiɛkpɔɔ yiɛ, 17 mbe u nyumu ŋga ki pe cheche le chɔ nu, mbe Suminyuŋgo tra kre ka ko mbe chaa ki nu. 18 Na chlɔ wre yire o Tafun Nyiɛkpɔɔ yiɛ kre, srawɔfun wre we chlɔ wre ndra nyjure saanla, mbe kpra kɔɔn shɔlɔ mimi kre le u kɛɛ. Mbe srawɔfun wre chɔ ŋga nu nyumu susrom ŋga ki paan na suŋgɔ ni kre yii mbe yire u yiɛ. 19 Srawɔfun wre u da mbe wo chlɔ wre ŋga mbe yo na, ‘Na blɔ wa n sni na mu ni, a mu n yili mu plɔ kro mu sɛ muyɛ tɔ na nɛɛrɛ ni nyjila ŋga muu wa mu plɔ pan kre, kena kre nyumu susrom ŋga ki paan na suŋgɔ ni ŋga wa pan na sisaa ni mu na.’ 20 La, na mu yili mu plɔ kro, mu sɛ blɔ fɔŋgɔ pan, mu muyɛ tɔ na nɛɛrɛ ni naa. 21 Kena o Tafun Nyiɛkpɔɔ wre u ti mbe mu mɛɛ kuraa pe suŋgɔ mu leele nu, mbe mu fɛlɛhaa tin, mbe mu lɛɛ nyi. 22 Kre nyumu ŋga ki tii mu lɛɛ, mbe ti mu lɛɛ tin, mbe mu fɛlɛhaa tin, mbe chlɔ wre yo, ‘Ami, o Tafun Nyiɛkpɔɔ u ti ki pe ma.’

23 Kena srawɔfun wre suŋgɔ kee nyjɛ nyunɔ yurɔ hlɛ na, mbe ki je mbe le nyumu susrom kre nu. 24 Mbe u ti chlɔ wre ki gbɔ, na ki pan na yɛŋgɛ yi, kie ti suŋgɔ kre u yii, mbe kee susrom u nya. 25 Mbe srawɔfun wre shɔlɔ mimi kre shɔ chlɔ wre kɛɛ, mbe ki viŋge Nyiɛkpɔɔ yiɛ mbe sɛ ki taa sragbunu kre na. 26 Kena srawɔfun wre mimi kɛnyini wɔ mbe ki sro sragbunu kre na dansiɛrɛ na. Kre kɔkro kre, mbe u ti mbe chlɔ wre nyumu kre gbɔ. 27 Na ki pan na yɛŋgɛ u le nɛɛrɛ nu, a u n kpra li na u plɔ ni, mu suŋgɔ nyumu kre gbɔ kre, nyumu kre we le u lɛɛ, mbe ti mbe kanyana kpɔɔ u nya. U lɛɛ we nyi, a wa jaa se, mbe u mɛɛ pe afuŋgo mɛɛ u leele nu. 28 La na u n le nɛɛrɛ nu, a u pe cheche, yaka wa u ta, a we na se.

29 Kre mbra ŋga, kie sni wa mbe chlɔ blɛchaarafun ŋga. Na ki pan na chlɔ yili u plɔ kro, mu uyɛ tɔ nɛɛrɛ ni, 30 ndee na ki pan na blɔ wre yenyjam yiri, a wra u chɔ wre jawa ma kre, kena srawɔfun wre u pan na chlɔ wre ni o Tafun Nyiɛkpɔɔ wre yiɛ, mbe srawɔfun wre kre mbra ŋga li na u ni. 31 Na ki waa to chlɔ wre na, kena blɔ wre n sisaa pe. La, chlɔ wre we u sisam fɔtɔɔrɔ ta imi na ki fna.”